+7 (701) 759 90 19
USD 436.29 EUR 492.83
RUB 5.92 CNY 68.48
جاڭالىقتار

التايداعى شوپاندار تۋريستەردى قوي باعۋعا شاقىردى - شەتەلدەگى قازاق ءتىلدى ب ا ق- قا شولۋ

17 قازان 13:07
:ءبولىسۋ
التايداعى شوپاندار تۋريستەردى قوي باعۋعا شاقىردى - شەتەلدەگى قازاق ءتىلدى ب ا ق- قا شولۋ

نۇر- سۇلتان. قازاقپارات - «قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

التايداعى شوپاندار تۋريستەردى قوي باعۋعا شاقىردى - «اعاجاي- التاي اقپارات» سايتى

قىتايدىڭ التاي ايماعىنىڭ بۋرىلتوعاي اۋدانىندا «التايدا مەنىڭ قويىم بار» اتتى تۋريستەردى التاي جەرىنە كەلىپ «قوي باعۋعا» شاقىرعان ەرەكشە جوبانىڭ تۇساۋكەسەر ءراسىمى ءوتتى، دەپ جازادى kazakh.altxw.com سايتى.

اتالعان ب ا ق- تىڭ جازۋىنشا، بۇل ەرەكشە جوبا بۋرىلتوعاي اۋدانىندا كوكتەم مەن كۇز ايلارىندا ۇيىمداستىرىلىپ، تۋريستەر ءۇشىن «وتباسىلىق فەرما» دايىنداپ بەرەدى. وسى باعدارلامانىڭ جوسپارى بويىنشا قىزىعۋشىلىق تانىتقان ادامدار قوزى ساتىپ الىپ، ونى جەرگىلىكتى شوپانداردىڭ كومەگىمەن «ونلايىن باعىپ» ءوسىرىپ، باقىلاپ وتىرادى. تىپتەن ولار التايدىڭ تاماشا تابيعاتىنا دەمالۋعا كەلىپ، قويلارىن وزدەرى باعىپ، جايۋىنا، قويشىلار ءومىرىن باستان كەشىرىپ كورۋىنە دە مۇمكىندىك بار.

بۇل ەرەكشە باستامانى مادەني قۇندىلىقتاردى ناسيحاتتاپ جۇرگەن شىنجاڭداعى بەلگىلى كومپانيا ۇسىنعان. ال وسى ىسكە اتسالىسىپ جاتقان شوپاندار بۋرىلتوعاي اۋدانىنىڭ شىباروي اۋىلىنىڭ تۇرعىندارى. قانداستارىمىز مەكەن ەتكەن بۇل اۋىلدا 10 مىڭ باس قوي بار. جەرگىلىكتى بيلىك وسى جوبا ارقىلى ايماققا تۋريستەردى تارتىپ، اۋىل تۇرعىندارىنىڭ كىرىسىن ارتتىرماق.

كوشپەندىلەر ويىندارى بيىل تۇركيادا وتەدى - TRT


دۇنيەجۇزىلىك كوشپەندىلەر ويىندارى بيىل تۇركيانىڭ يزنيك قالاسىندا ۇيىمداستىرىلادى، دەپ حابارلايدى تۇركيا راديو تەليەۆيزيا پورتالى.

اتالعان ب ا ق- تىڭ جازۋىنشا، I- ءشى دۇنيەجۇزىلىك كوشپەندىلەر ويىندارى قىرعىزستان ۇكىمەتىنىڭ ۇسىنىسىمەن تۇركى كەڭەسىنىڭ ەكىنشى ءسامميتى اياسىندا وتكىزىلگەن. بۇل ويىن تەك تۇركىتەكتەس حالىقتار ءۇشىن عانا ەمەس، الەمنىڭ بارلىق كوشپەلى حالىقتارىنىڭ رۋحاني ساناسى مەن تاريحي جادىن جاڭعىرتۋعا باعىتتالعان.

«دۇنيەجۇزىلىك ەتنوسپورت كونفەدەراتسياسىنىڭ قولداۋىمەن وتكىزىلەتىن دۇنيەجۇزىلىك كوشپەندىلەر ويىنى وسى كۇنگە دەيىن 3 رەت قىرعىزستاندا بولىپ ءوتتى. ءبىرىنشىسى 2014 -جىلدىڭ 9-14 قىركۇيەك كۇندەرى اراسىندا ىستىقكول ايماعىندا ءوتتى. جارىسقا 19 ەلدەن سپورتشىلار قاتىستى. ەكىنشىسى 2016 -جىلدىڭ 3-8 -قىركۇيەك كۇندەرى اراسىندا «كۇش بىرلىگى» دەگەن ۇرانمەن ءوتتى. بۇل جولعى ويىنداردا 53 ەلدەن كەلگەن سپورتشىلار باعىن سىنادى.

2018 -جىلى وتكەن ءۇشىنشى دۇنيەجۇزىلىك كوشپەندىلەر ويىندارىنا 82 ەلدەن كەلگەن 2000 مىڭعا جۋىق سپورتشى قاتىستى. ءتورتىنشى دۇنيەجۇزىلىك كوشپەندىلەر ويىندارىن تۇركيادا ۇيىمداستىرۋ تۋرالى شەشىم قابىلدانعان بولاتىن، الايدا كوروناۆيرۋستىڭ ورشۋىنە بايلانىستى ويىندار كەيىنگە قالدىرىلدى. بيىل دۇنيەجۇزىلىك كوشپەندىلەر ويىندارىنىڭ تۇركيانىڭ يزنيك قالاسىندا ۇيىمداستىرىلۋى جوسپارلانىپ وتىر»، - دەپ جازادى TRT.

ق ر پرەزيدەنتى موڭعوليانىڭ سىرتقى قاتىناستار ءمينيسترى باتمونحيين باتتسەتسەگتى قابىلدادى - KAZNEWS


قازاقستان رەسپۋبليكاسىنىڭ پرەزيدەنتى قاسىم- جومارت توقايەۆ موڭعوليانىڭ سىرتقى قاتىناستار ءمينيسترى باتمونحيين باتتسەتسەگتى قابىلدادى، دەپ جازادى موڭعوليانىڭ Kaznews اقپاراتتىق پورتالى.

اتالعان ب ا ق- تىڭ جازۋىنشا، كەزدەسۋ بارىسىندا قازاقستان رەسپۋبليكاسىنىڭ مەملەكەت باسشىسى قاسىم- جومارت توقايەۆ قارقىندى دامىپ كەلە جاتقان قازاق- موڭعول قارىم- قاتىناستارىنا توقتالدى.

«موڭعوليا - ءبىزدىڭ سەنىمدى ءارى ستراتەگيالىق سەرىكتەسىمىز. مەملەكەتتەرىمىزدى ورتاق تاريحىمىز بىرىكتىرەدى. موڭعول حالقىنا، ءسىزدىڭ مەملەكەتىڭىزگە دەگەن قۇرمەتىمىز ەرەكشە. سىزدەر ءبىزدىڭ حالىقارالىق باستامالارىمىزعا تۇسىنىستىك تانىتىپ، ۇنەمى قولداۋ كورسەتەسىزدەر. سونداي- اق حالىقارالىق الاڭداردا بىرگە بەلسەندى جۇمىس ىستەپ كەلەمىز. وسى ىنتىماقتاستىعىمىزدى ودان ءارى ارتتىرىپ، ءىس جۇزىندە نىعايتا بەرۋىمىز قاجەت دەپ سانايمىن. بۇل، ەڭ الدىمەن، ساۋدا- ەكونوميكالىق ىقپالداستىققا قاتىستى. ءبىز كولىك لوگيستيكاسى سالاسىن پىسىقتاي ءتۇسۋىمىز كەرەك»، - دەدى ق ر پرەزيدەنتى. مەملەكەت باسشىسى قالىپتاسقان ەكىجاقتى ىنتىماقتاستىقتىڭ الەۋەتىن بارىنشا پايدالانۋعا شاقىردى.
«وسى ءساتتى پايدالانا وتىرىپ، ەتنيكالىق قازاقتارعا كورسەتىلىپ وتىرعان قۇرمەتى پەن قامقورلىعى ءۇشىن ءسىزدىڭ ەلدىڭ باسشىلىعىنا جانە موڭعول حالقىنا ريزاشىلىعىمدى بىلدىرەمىن. موڭعوليا قازاقتارىنىڭ ءتىلىن، مادەنيەتى مەن ءداستۇرىن ساقتاۋ ماسەلەلەرى بويىنشا تىعىز ىنتىماقتاستىعىمىز جالعاسا بەرەدى دەپ ۇمىتتەنەمىن. بۇل - ءسىزدىڭ مەملەكەتىڭىز جۇرگىزىپ وتىرعان ۇلتتىق ساياساتتىڭ ناتيجەسى. مۇنى زور ريزاشىلىقپەن اتاپ وتكىم كەلەدى»، - دەدى قاسىم- جومارت توقايەۆ.

كەزدەسۋ سوڭىندا ق ر مەملەكەت باسشىسى قاسىم- جومارت توقايەۆ موڭعوليا پرەزيدەنتى ۋحنااگيين ءحۇرەلسۇحتى قازاقستان رەسپۋبليكاسىنا رەسمي ساپارمەن كەلۋگە شاقىراتىنىن ايتتى. قازاقستان رەسپۋبليكاسىنىڭ مەملەكەت باسشىسى اتالعان رەسمي ساپار قازاقستان مەن موڭعوليا اراسىنداعى ىنتىماقتاستىقتىڭ دامۋىنا تىڭ سەرپىن بەرەدى دەپ سانايدى.

قازاقستان ەلشىسى جىزاق وبلىسىنا جۇمىس ساپارىمەن باردى - «ءوزا» اقپاراتتىق اگەنتتىگى


2021 -جىلدىڭ 9-10 قازان كۇندەرى قازاقستان رەسپۋبليكاسىنىڭ وزبەكستان رەسپۋبليكاسىنداعى توتەنشە جانە وكىلەتتى ەلشىسى د. ساتىبالدى جۇمىس ساپارىمەن جىزاق وبلىسىندا بولدى، دەپ جازادى وزبەكستاننىڭ « ءوزا» مەملەكەتتىك اقپاراتتىق اگەنتتىگى.

«ساپار بارىسىندا د. ساتىبالدى زەمين اۋدانىنداعى «دۋوبا» ازاماتتارىنىڭ اۋىلدىق جيىنى تۇرعىندارى ءۇشىن جاسالعان جاعداي، سونداي- اق اۋىلدىق دارىگەرلىك پۋنكت پەن تىگىن شەبەرحاناسىنىڭ قىزمەتىمەن تانىستى.

ەلشى سونىمەن قاتار وبلىس ورتالىعىندا ورنالاسقان جاڭا IT - پاركپەن تانىستى. سونداي اق، ەلشى «ابات ماحاللا» باعدارلاماسىنا سايكەس، مەملەكەتتىڭ الەۋمەتتىك جانە وندىرىستىك، ونىڭ ىشىندە اۋىل شارۋاشىلىعى سالاسىنداعى ينفراقۇرىلىمدى دامىتىپ، جاستاردى جۇمىسپەن قامتۋ بويىنشا جۇرگىزىپ وتىرعان جۇمىستارىمەن دە تانىستى. ءوز كەزەگىندە، قازاقستان ەلشىسى د. ساتىبالدى وبلىستاعى №29 قايرىمدىلىق ۇيىندە بولىپ، ورتالىق ديرەكتورىنا قازاقستان تاۋەلسىزدىگىنىڭ 30 -جىلدىعىنا وراي وزبەك تىلىنە اۋدارىلعان اباي قۇنانبايەۆتىڭ «قارا سوزدەرى» كىتابىن تابىس ەتتى»، - دەپ جازادى «ءو ز ا» اقپاراتتىق اگەنتتىگى.


ۇجىمدىق قاۋىپسىزدىك تۋرالى شارت ۇيىمىنا مۇشە ەلدەر اۋعانستاننىڭ تاجىكستانمەن شەكاراسىندا اسكەري جاتتىعۋ وتكىزەدى – فارس


«AVA اقپارات اگەنتتىگىنىڭ حابارلاۋىنشا، ۇجىمدىق قاۋىپسىزدىك تۋرالى شارت ۇيىمىنا مۇشە ەلدەر 22-23-قازاندا تاجىكستاننىڭ اۋعانستانمەن شەكاراسىندا ەكى كۇندىك اسكەري جاتتىعۋ وتكىزۋدى جوسپارلاپ وتىر. بۇل جاتتىعۋعا CSTO- عا مۇشە تاجىكستان، قىرعىزستان، قازاقستان، ارمەنيا جانە بەلارۋس ەلدەرىنىڭ كۇشتەرى قاتىسادى. تاجىكستان اۋعانستانمەن ەڭ ۇزاق شەكاراعا يە»، - دەپ حابارلايدى يراننىڭ Parstoday اقپارات اگەنتتىگى.

تەرمىزدە وزبەكستان - اۋعانستان كەلىسسوزدەر جۇرگىزۋدە - «ءو ز ا» اقپاراتتىق اگەنتتىگى

16-قازاندا اۋعانستان ۋاقىتشا ۇكىمەتى باسشىسىنىڭ ورىنباسارى مىندەتىن اتقارۋشى ابدۋل سالام حانافي باستاعان دەلەگاتسيا تەرمىزگە كەلدى، دەپ جازادى وزبەكستاننىڭ «ءوزا» مەملەكەتتىك اقپاراتتىق اگەنتتىگى.

«كەزدەسۋدە وزبەكستان دەلەگاتسياسىن پرەمەر- ءمينيستردىڭ ورىنباسارى - ينۆەستيتسيالار جانە سىرتقى ساۋدا ءمينيسترى ساردور ۋمۋرزاكوۆ باسقارۋدا. بۇل كەلىسسوزدەر وزبەكستان سىرتقى ىستەر ءمينيسترى ابدۋلازيز كاميلوۆتىڭ 2021 -جىلدىڭ 7-قازانىندا اۋعانستانعا جۇمىس ساپارى كەزىندە قول جەتكىزىلگەن ۋاعدالاستىقتاردى ىسكە اسىرۋ اياسىندا وتەدى»، - دەپ جازادى «ءو ز ا» اقپاراتتىق اگەنتتىگى.

اۆتور: باقىتجول كاكەش



:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
بەيسەن سۇلتان
بەيسەن سۇلتان
954-049

مۇراعات