قالادان اۋىلعا قونىس اۋدارعان اقمولالىق كەلىنشەك اتا كاسىپتى وركەندەتۋدە

كوكشەتاۋ. قازاقپارات - اۋىلدىق جەردە تۇراتىن ادامنىڭ باستى بايلىعى - قولىنداعى مالى. ىشەر اسىڭ دا، كيەر كيىمىڭ دە وسى مالدىڭ ەسەبىنەن. بۇگىندە اقمولا وبلىسىندا وسى اتا كاسىپتى جاڭعىرتىپ، ءناپاقاسىن تاۋىپ وتىرعان شارۋالار بارشىلىق.

سونىڭ ءبىرى - قورعالجىن اۋدانىنداعى سابىندى اۋىلىنىڭ تۇرعىنى ءلاززات ءابىلدينوۆا مەملەكەتتىك باعدارلامانىڭ ارقاسىندا مال باسىن كوبەيتىپ، اتا كاسىپتى وركەندەتۋدە، دەپ حابارلايدى قازاقپارات ءتىلشىسى.

قوي باعىپ، سيىر ساۋۋ كەيىپكەرىمىز ءلاززات ءابىلدينوۆانىڭ كۇندەلىكتى ءىسى. ول جۇبايىمەن بىرگە 2014 -جىلى ءومىرىن تۇبەگەيلى وزگەرتۋ تۋرالى شەشىم قابىلدادى. بۇعان الەۋمەتتىك- تۇرمىستىق جاعدايلار تۇرتكى بولىپتى. ءلاززات جۇمىسىندا قىسقارۋعا ۇشىرايدى. وسىدان ول كوپ ويلانباستان، كۇيەۋىنىڭ تۋعان اۋىلىنا كوشىپ، ءوز ءىسىن اشۋعا بەل بۋادى. جيناعان قارجىسىنا قورعالجىن اۋدانىنىڭ سابىندى اۋىلىنان ءۇي ساتىپ الادى. ال كولىگىن ساتقان اقشاعا ۇلكەن قورا سالادى، وسىلايشا ول فەرمەرلىك شارۋاشىلىقتى دامىتۋعا دەن قويادى.

«بولاشاق اۋىلدا دەپ ويلايمىن. الەۋمەتتىك- تۇرمىستىق قيىندىقتارعا بايلانىستى قالادان اۋىلعا كوشىپ كەلدىم. اۋىلدان ءوز قاراجاتىمىزبەن ءۇي ساتىپ الدىق. ەسكى ءۇيدى جوندەپ، ماشينامىزدى ساتىپ، قورا سالدىق»، - دەپ ءسوزىن باستادى كەيىپكەرىمىز «مەن نەگىزى قالانىڭ قىزىمىن، اۋىل ءومىرىنىڭ بارلىق قىر- سىرىنان حابارسىز بولدىم. ءبىراق «ءومىر ۇيرەتەدى» دەمەكشى، كۇيەۋىم مەن ينتەرنەتتىڭ ارقاسىندا كوپ نارسەنى ۇيرەندىم. ۇلكەن كىسىلەردىڭ اقىل- كەڭەسىنە قۇلاق ءتۇردىم. وسىلايشا، سيىر ساۋۋدى، ءسۇت سالىپ، ماي ايىرۋدى ۇيرەندىم. باستاپقىدا، ارينە قيىندىقتار بولعان. مال ساتىپ الاتىن قارجىسى بولماعان سوڭ ءلاززات «اتامەكەن» ۇلتتىق كاسىپكەرلىك پالاتاسىنىڭ شاعىن جانە ورتا بيزنەستى قولداۋ جونىندەگى باعدارلاماسىنىڭ ارقاسىندا كاسىپكەرلىك قىزمەت نەگىزدەرى كۋرسىنان ءوتىپ، جەڭىلدەتىلگەن پايىزدىق مولشەرلەمەمەن نەسيە العان.

«جوبالىق جۇمىسىمدى ءساتتى قورعاپ شىعىپ، جەكە كاسىپكەرلىگىمدى اشىپ، ءتيىمدى شارتتارمەن 2 ميلليون تەڭگە كولەمىندە ۇزاق مەرزىمدى نەسيە الدىم. بىردەن ايتايىن بۇل بىزگە ۇلكەن كومەك بولدى. وسى قاراجىعا 7 باس سيىر ساتىپ الدىق، ءىسىمىز وڭ باستى»، - دەيدى ءلاززات ءابىلدينوۆا.

حاكىم ابايدىڭ «ەڭبەك ەتسەڭ ەرىنبەي، تويادى قارنىڭ تىلەنبەي» ولەڭ جولدارى كاسىپكەر ايەلدىڭ ومىرلىك ۇستانىمىنا اينالعان. ونىڭ بۇل ءىستى باستاعانىنا دا 5 جىلعا جۋىقتاپتى. وسى ازا عانا ۋاقىتتىڭ ىشىندە ول مال باسىن ەكى ەسەگە كوبەيتكەن. ەندىگى ماقساتى مال تۇقىمىن اسىلداندىرىپ، ءسۇت فەرماسىن سالۋ. قازىرگى تاڭدا، قۇرىلىس جۇمىستارى باستالىپ تا كەتكەن.

«الداعى جوسپارلارىمىز وراسان زور. بورداقىلاۋ الاڭىن سالدىق. ەندى 30-50 سيىرعا ارنالعان ۇلكەن ءسۇت فەرماسىن اشقىمىز كەلەدى. جالعىز پروبلەما ول- جايلىمدىق جەر مەن شابىندىقتىڭ جوقتىعى. ەگەر مەملەكەت، جەرگىلىكتى اتقارۋشى ورگاندار بىزگە جەر بولسە، مالعا ءشوپ شابۋ ءۇشىن تەحنيكانى ليزينگىگە الار ەدىك. ءشوپ وتە قىمبات، ونى وسىنداي كوپ مالعا ساتىپ الۋ ءتيىمدى ەمەس. وسى ماسەلە شەشىمىن تاۋىپ جاتسا، سۋبسيديا الىپ، اسىل تۇقىمدى مال اكەلەمىن»، - دەيدى كاسىپكەر ايەل.

بۇگىنگى تاڭدا ءلاززات ءابىلدينوۆانىڭ «العا» وتباسىلىق فەرماسىنىڭ تابيعي تازا ءسۇت جانە ءسۇت ونىمدەرىنە سۇرانىس كۇن ساناپ ارتىپ كەلەدى. وسىنىڭ ارقاسىندا وتباسىلىق بيزنەسى دامىپ، تابىسى دا ارتا باستاعان.

«ساۋىن سيىرلاردان بولەك، قازىرگى ۋاقىتتا بىزدە 27 باس ءىرى بورداقىلاۋدا تۇر. 23 جىلقىمىز، 100 گە جۋىق قويىمىز، ءبىراز قاز، تاۋىق جانە ۇيرەگىمىز بار. «العا» وتباسىلىق فەرمامىزدا ەكولوگيالىق جاعىنان تازا ونىمدەر - ءسۇت جانە ءسۇت ونىمدەرىن، ماي، قايماق، سۇزبە، ايران، قۇرت، مال ەتى، قۇس ەتى جانە جۇمىرتقا ساتامىز. مىنە، بىرەر جىل بولدى، بيە بايلاپ، ءسۇتىن وڭدەپ كەلەمىز. ساتۋعا شىعارامىز، ۇيگە كەلىپ- كەتكەن مەيماندار ءشولىن باسادى. بۇل ءبىر جاعىنان وزىڭە پايدا بولسا، ەكىنشى جاعىنان، ۇلتتىق ءداستۇرىمىزدى ۇلىقتاۋ دەپ بىلەمىن»، - دەيدى كاسىپكەر ايەل.

وسىلايشا، بۇگىندە مال وسىرۋگە شىنداپ بەت بۇرعان ءلاززات ءابىلدينوۆانىڭ ەلوردا بەلدەۋىن ەت جانە سۇتپەن قامتاماسىز ەتۋدە

قوسار ۇلەسى مول.