اۋعانستاندى تەڭدەسسىز قيىندىقتارمەن جالعىز قالدىرماۋىمىز قاجەت - ق ر پرەزيدەنتى
بۇل تۋرالى ت م د ۇيىمىنا مۇشە مەملەكەتتەر باسشىلارى كەڭەسىنىڭ كەزەكتى وتىرىسىندا قازاقستان پرەزيدەنتى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.
«قازىرگى زامان بولمىسى ت م د- نىڭ قاۋىپسىزدىك سالاسىنداعى ىنتىماقتاستىق تەتىكتەرىن جەتىلدىرۋدى تالاپ ەتەدى. بۇل سالاداعى ءبىزدىڭ ءوزارا ءىس- قيمىلىمىزدىڭ نەگىزگى كونتۋراسى اسكەري ىنتىماقتاستىق تۇجىرىمداماسىندا، سونىمەن قاتار 2025 -جىلعا دەيىن سىرتقى شەكارانىڭ شەكارالىق قاۋىپسىزدىگىن نىعايتۋ باعدارلاماسىندا بەلگىلەنگەن. بۇعان قوسا، جۇرگىزىلەر جۇمىستا تەرروريزم، ءدىني ەكسترەميزم، ەسىرتكى ساۋداسىنان تۋىندايتىن سىن- قاتەرلەرگە بىرلەسىپ قارسى تۇرۋ ماسەلەلەرىنە ەرەكشە باسىمدىق بەرۋ قاجەت. بۇل سىن- قاتەرلەر اۋعانستاندا ورىن العان جاعدايعا بايلانىستى ءبىرىنشى كەزەكتى مانگە يە بولىپ وتىر»، - دەدى قاسىم- جومارت توقايەۆ.
ق ر پرەزيدەنتىنىڭ اتاپ وتۋىنشە، قازاقستان اۋعان ماسەلەسىندە ب ۇ ۇ ۇستانىمىن قولدايدى. بۇل ەلدەگى كۇردەلى گۋمانيتارلىق جاعداي بۇكىل الەمدىك قوعامداستىقتىڭ نازارىندا بولۋى ءتيىس. ءبىزدىڭ ساياسي كوزقاراسىمىز بەن جەكە نانىم- سەنىمىمىز قانداي بولسا دا، اۋعانستاندى تەڭدەسسىز قيىندىقتارمەن جالعىز قالدىرماۋىمىز قاجەت. بۇل ىستەگى ناقتى ۇلەس اۋعان حالقىنا گۋمانيتارلىق كومەك بولماق. قازاقستان قازىردىڭ وزىندە ازىق- تۇلىك پەن ءبىرىنشى قاجەتتى تاۋارلاردى جەتكىزۋگە كىرىسىپ كەتتى. بۇل جۇمىستى جۇيەلەۋ ءۇشىن اۋعانستانعا حالىقارالىق كومەك كورسەتۋ جونىندەگى لوگيستيكالىق حاب قۇرۋدى ۇسىنامىز. اۋعانستانعا داعدارىستىڭ وتكىر كەزەڭىن ەڭسەرگەننەن كەيىن دە ب ۇ ۇ ينستيتۋتتارى تاراپىنان مۇنان ارعى دا جۇيەلى قولداۋدىڭ قاجەت بولاتىندىعى ءسوزسىز. وسىناۋ ماڭىزدى مىندەتكە ءبىز ۇسىنىپ وتىرعان الماتىدا ب ۇ ۇ- نىڭ وڭىرلىك ورتالىعىن قۇرۋ تۋرالى باستاما جاۋاپ بەرە الادى. دوستاستىق ەلدەرىنىڭ وسى جوسپارلاردىڭ جۇزەگە اسىرىلۋىنا جاردەم بەرەتىندىگىنە ۇمىتتەنەمىز»، - دەدى مەملەكەت باسشىسى.
اۆتور: مارلان جيەمباي