قازاقستان قوعامىنىڭ قۇرىلىمى تۇبەگەيلى وزگەردى - سەنات ءتوراعاسى
بۇل تۋرالى ق ر پارلامەنتى سەناتىنىڭ ءتوراعاسى ماۋلەن اشىمبايەۆ ايتتى، دەپ حابارلايدى قازاقپارات ءتىلشىسى.
«وتكەن 30 جىلدىڭ ىشىندە قازاقستان كوپتەگەن سالادا زور تابىستارعا قول جەتكىزدى. مەملەكەتتىلىگىمىزدى قۇرۋ مەن نىعايتۋ ءۇشىن وتە كوپ دۇنيە جاسالدى. بۇگىندە وسى جىلداردىڭ ىشىندە قازاقستان ەگەمەن مەملەكەت رەتىندە قالىپتاستى دەپ تولىقتاي سەنىممەن ايتا الامىز»، - دەدى سەنات سپيكەرى قازاقستان الەۋمەتتانۋشىلارىنىڭ VII كونگرەسىندە.
ونىڭ ايتۋىنشا مەملەكەتتىك باسقارۋ جۇيەسىندە، ەكونوميكالىق، الەۋمەتتىك، ساياسي جانە مادەني- گۋمانيتارلىق سالالاردا دا بايىپتى وزگەرىستەر بولادى.
«ءوزىنىڭ تۇراقتىلىعى مەن تيىمدىلىگىن كورسەتكەن سىرتقى جانە ىشكى ساياسات مودەلى قالىپتاستى. بۇعان قوسا، قوعامنىڭ وزىندە دە ساپالى ترانسفورماتسيا ورىن الدى. رەفورمالار پاراديگمالى الەۋمەتتىك وزگەرىستەرگە سەپ بولدى. قازاقستان قوعامىنىڭ قۇرىلىمى تۇبەگەيلى وزگەردى»، - دەدى ماۋلەن اشىمبايەۆ.
اۆتور: مارلان جيەمباي