قىزىلوردالىق ونەرتاپقىش الماتى اۋاسىن جاقسارتۋعا ۇلەس قوسپاق

الماتى. قازاقپارات - قىزىلوردا قالاسىنىڭ تۇرعىنى مارات پالماحوۆ الماتىنىڭ اۋاسىن جاقسارتۋعا ءوز ۇلەسىن قوسپاق.

ول تۋرالى ونەرتاپقىش «قازاقپارات» تىلشىسىنە ايتىپ بەردى، دەپ حابارلايدى قازاقپارات ءتىلشىسى.

جاس ونەرتاپقىش الماتى ەكولوگياسىن جاقسارتۋ تۋرالى يدەيا قايدان كەلگەنىن ايتتى.

«بۇل يدەيا ماعان «ەكسپو-2017» حالىقارالىق كورمەسى ءوتىپ جاتقاندا، ەكولوگيالىق جوبالاردى كورگەن كەزدە كەلدى. سول كەزدە مەن «ماڭگىلىك قوزعالتقىش» دەپ اتالاتىن جوبامنىڭ ءپروتوتيپىن ازىرلەپ جاتقان بولاتىنمىن»، - دەيدى مارات.

ال جوبالىق «وازيس» اۋا تازارتقىش قۇرىلعىسىن جاساپ شىعارۋعا ماراتتىڭ ءۇش جىل ۋاقىتى كەتكەن. مارات ونىڭ قىزمەتى جانە ورناتۋ جولدارىمەن ءبولىستى.

«اۋا تازالاعىش قۇرىلعىلاردى قالادا ورناتۋ ءۇشىن بيىك عيماراتتاردىڭ ۇستىنە ولاردى جانە ناسوستاردى بىرگە ورناتۋ كەرەك. قۇرىلعى اۋانى تۇگەلدەي تسيركۋلياتسيا جاساپ، اۋىستىرادى. ياعني، اگرەگات لاس اۋانى تولىعىمەن تارتىپ الىپ، ناسوسقا جىبەرەدى. ناسوس اۋانى تازالاپ، اۋا اينالىمى بار جاققا تاسىمالدايدى»، - دەيدى ول.

ماراتتىڭ ايتۋىنشا، الەمدە بۇل قۇرىلعىعا ۇقساس انالوگ جوق، سەبەبى، ونىڭ اۋقىمى ۇلكەن، بۇكىل قالانى قامتىماق. سونداي- اق، ول 12 اي، اپتاسىنا 7 كۇن، تاۋلىگىنە 24 ساعات بويى ءۇزىلىسسىز جۇمىس ىستەمەك. كليماتقا تاۋەلدى ەمەس. ونەرتاپقىش ماراتتىڭ اسقاق ارمانى دا بار ەكەن.

«بولاشاقتا قازاقستاننىڭ ەكولوگيالىق تازا جانە الدىڭعى قاتارلى ەل بولۋىنا ۇلەس قوسقىم كەلەدى. تەك شەت ەلدە عانا ەمەس، ءبىزدىڭ جەرىمىزدە دە مىقتى «ميلار» مەن جوبالار بار ەكەنىن الەمگە كورسەتىپ، مويىنداتقىم كەلەدى»، - دەيدى مارات.

ال ازىرگە بۇگىنگى جوباسىن الماتى قالاسىندا جۇزەگە اسىرعىسى كەلەدى. ءبىراق، ول ءۇشىن ءىس-قيمىل ەركىندىگى، سىناق جۇرگىزۋگە عيمارات، قارجىلىق جانە تەحنيكالىق قولداۋ قاجەت ەكەنىن دە جاسىرمايدى.