نۇر- سۇلتان تۇرعىندارى «كوگىلدىر وتىندى» پايدالانا باستادى
جەكە سەكتور ءتۇتىننىڭ نەگىزگى كوزدەرىنىڭ ءبىرى بولىپ سانالادى. وسىلايشا، بۇگىندە كەلەسى اۋداندار گاز بەرۋمەن قامتاماسىز ەتىلدى:
1) «پرومىشلەننىي» ت/ا (قوشقاربايەۆ داڭعىلىنان وڭتۇستىككە قاراي تولىعىمەن)؛
2) مومىش ۇلى داڭعىلى - ابىلايحان داڭعىلى - قوشقاربايەۆ داڭعىلى - قورداي كوشەسى شەكاراسىندا؛
3) قۇدايبەردى ۇلى داڭعىلى - بۋراباي - ابىلايحان داڭعىلى - مۇستافين كوشەسى؛
4) قوبىلاندى باتىر كوشەسى - لەپسى كوشەسى - قۇدايبەردى ۇلى داڭعىلى - بۋراباي كوشەسى. وسى اۋدانداردا تۇراتىن تۇرعىندار ءۇيدى گازعا قوسۋعا ءوتىنىم بەرۋ ءۇشىن «قازترانس گاز ايماق» ا ق- عا (رەسپۋبليكا داڭعىلى، 24) جۇگىنۋى قاجەت.
وڭتۇستىك- شىعىس تۇرعىن الابىنىڭ قالعان بولىگى بويىنشا ىسكە قوسۋ- رەتتەۋ جۇمىستارى جۇرگىزىلۋدە، گازدى ىسكە قوسۋ كەزەڭ- كەزەڭىمەن ءبىر اي ىشىندە ورىندالادى. قازاق اۋىل (قاراوتكەل) شاعىن اۋدانى بويىنشا قۇرىلىس- مونتاجداۋ جۇمىستارى جۇرگىزىلۋدە.
«بۇل ءبىز ءۇشىن وتە قۋانىشتى وقيعا. كەشە ۇيىمىزگە گاز كىردى. ەندى تۇنىمەن پەشتى كۇزەتىپ، تەكسەرۋدىڭ قاجەتى جوق. تاڭەرتەڭ قازاندىقتى تەكسەردىم، ءبارى تازا، ءۇي دە تازا، جىلى. بۇرىن تۇندە 3-4 رەت پەشكە كومىر سالۋعا تۋرا كەلەتىن. قازىر مۇنىڭ ءبارىن ىستەۋدىڭ قاجەتى جوق»، - دەدى وڭتۇستىك- شىعىس تۇرعىنى ەردەن وماروۆ.
«ءبىزدىڭ وڭتۇستىك- شىعىس ەلدى مەكەنىندە تۇرعانىمىزعا 20 جىل بولدى. پەش جاعىپ، سونىڭ تۇتىنىمەن دەمالاتىنبىز. ەندى بىزگە گاز كەلدى. وتە قۋانىشتىمىز. بىزگە جەڭىل بولدى، ونىڭ ۇستىنە ەكولوگيا دا جاقسارادى»، - دەدى وڭتۇستىك- شىعىس تۇرعىن الابىنىڭ تۇرعىنى ءامىرجان بولسانبەكوۆ.
نۇر- سۇلتاندا قالانى گازداندىرۋ بويىنشا اۋقىمدى جۇمىستار جالعاسۋدا. ەكى جىل ىشىندە ەلوردادا 645 شاقىرىمنان استام كۆارتالىشىلىك گازبەن جابدىقتاۋ جەلىلەرى سالىندى. گازعا كوكتال-1، كوكتال-2، تەمىرجولشىلار، اگروقالاشىق بولىگى جانە وڭتۇستىك- شىعىس تۇرعىن الاپتارىنىڭ تۇرعىندارى قوسىلدى.
وسى كۇزدە پرومىشلەننىي، اگروقالاشىق جانە وڭتۇستىك- شىعىس (قوسىلماعان بولىكتەر) تۇرعىندارى گازعا قوسىلادى. سونداي- اق، «قازترانس گاز ايماق» ا ق كۇيگەنجار، ميچۋرينو، ينتەرناتسيونالنىي ەلدى مەكەندەرىندە گازبەن جابدىقتاۋ جەلىلەرىنىڭ قۇرىلىسىن جۇرگىزۋدە. گازداندىرۋ - ەلباسىنىڭ اۋقىمدى جوباسى. جوبا قالا تۇرعىندارىنىڭ ءومىر ءسۇرۋ ساپاسىن ارتتىرىپ، قالا ەكولوگياسىن ايتارلىقتاي جاقسارتۋعا مۇمكىندىك بەرەدى. قالانى گازداندىرۋ ماسەلەسى مەملەكەت باسشىسىنىڭ باقىلاۋىندا.