قىزىلوردا وبلىسىندا شىنى زاۋىتىنىڭ قۇرىلىسى بيىل اياقتالادى

قىزىلوردا. قازاقپارات - قىزىلوردا وبلىسىندا شىنى زاۋىتىنىڭ قۇرىلىسى بيىل اياقتالادى، دەپ حابارلايدى قازاقپارات ءتىلشىسى.

وڭىردە يندۋستريالاندىرۋ باعدارلاماسى اياسىندا قۇنى 543 ميلليارد تەڭگەنى قۇرايتىن 46 جوبا جۇزەگە اسىرىلۋدا. ناتيجەسىندە 7 مىڭنان استام جۇمىس ورنى قۇرىلادى. بىلتىر 5 جوبا ىسكە قوسىلدى. 10 جوبا قۇرىلىس يندۋسترياسى سالاسىنا باعىتتالعان.

«ءىرى ستراتەگيالىق جوبامىزدىڭ ءبىرى - شىنى زاۋىتىنىڭ قۇرىلىسى بيىل اياقتالادى. كاسىپورىننىڭ اياسىندا بىرنەشە ىلەسپە كاسىپورىندار قۇرۋ بويىنشا جۇمىستار باستالدى. قازىر 2 ىلەسپە جوبا - شىنى تالشىقتارى مەن كومپوزيتتىك ماتەريالدار جانە اينا ءوندىرىسى بويىنشا جوبالاۋ جۇمىستارى جۇرگىزىلۋدە. قۇرىلىس يندۋسترياسى سالاسىندا الداعى ۋاقىتتا كەرامزيت، ارماتۋرا، 2 اسفالتبەتون شىعاراتىن زاۋىتتارى اشىلىپ، قۇرعاق قۇرىلىس قوسپالارىن وندىرەتىن سەح كەڭەيتىلەدى»، - دەدى وبلىستىق يندۋستريالىق- يننوۆاتسيالىق دامۋ باسقارماسىنىڭ باسشىسى رينات سۇلتانگەرەيەۆ.

ءوڭىردىڭ ەرەكشەلىگىنە سايكەس 46 جوبانىڭ ىشىندە اگروونەركاسىپ سالاسىنداعى جوبالاردىڭ 26-نىڭ ۇلەسى باسىم. ونىڭ ىشىندە، 3 جوبا بىلتىرعى جىلى ىسكە قوسىلدى. ولار ارال اۋدانىندا ەكى بالىق وڭدەۋ سەحى، جالاعاش اۋدانىندا تىڭايتقىشتار شىعاراتىن «اگروحيم سەرۆيس» سەرىكتەستىگى. بيىل وسى سالادا تاعى 2 جوبا ىسكە قوسىلماق.