سەناتور بىرنەشە ءپاندى وقىتاتىن اۋىل مۇعالىمىنىڭ ماسەلەسىن كوتەردى

نۇر-سۇلتان. قازاقپارات - سەناتور اقىلبەك كۇرىشبايەۆ ءوزىنىڭ دەپۋتاتتىق ساۋالىندا اۋىل جاستارىنىڭ جوعارى بىلىمگە قول جەتكىزۋ پروبلەماسىن ايتتى، دەپ حابارلايدى قازاقپارات ءتىلشىسى.

دەپۋتات اۋىلداعى ءبىلىم دەڭگەيى كوبىنەسە قالالىق دەڭگەيدەن ارتتا قالاتىنىن اتاپ ءوتتى. اۋىلدىق جەرلەردە پەداگوگتاردىڭ تاپشىلىعى 2100 دەن استام ادامدى قۇرايدى، بۇل رەسپۋبليكانىڭ پەداگوگ كادرلارعا دەگەن زارۋلىكتىڭ %60 عا جۋىعى بولىپ وتىر. سونىڭ ناتيجەسىندە كوپتەگەن اۋىل بالالارى گرانت الۋ ءۇشىن ۇ ب ت- دا قاجەتتى بالل جيناي المايدى، ال ولاردىڭ كوپشىلىگىندە اقىلى وقۋعا مۇمكىندىك جوق.

سەناتور اگرارلىق ماماندىقتارعا ءتۇسۋ ءۇشىن اۋىلدىق كۆوتانى %30 دان %50 عا دەيىن كوتەرۋدى ۇسىنىپ وتىر. دەپۋتات جىل سايىن جوعارى وقۋ ورىندارى تۇلەكتەرىنىڭ تەك %30 ى عانا اۋىلعا جۇمىسقا كەلەتىنى، سونىڭ سالدارىنان ەل بيۋدجەتىندە جىل سايىن 1,5 ميلليارد تەڭگەگە ءتيىمسىز جۇمسالاتىنى تۋرالى دەرەكتى كەلتىردى.

«كوپتەگەن جىلدار بويى پارلامەنت دەپۋتاتتارى ءبىلىم جانە عىلىم مينيسترلىگىنىڭ الدىندا اۋىل مەكتەپتەرىنىڭ تۇلەكتەرىنە اگرارلىق ماماندىقتارعا ءتۇسۋ ءۇشىن اۋىلدىق كۆوتانى %30 دان كەم دەگەندە %50 عا دەيىن ارتتىرۋ قاجەتتىلىگى تۋرالى ماسەلەنى كوتەرىپ كەلەدى. ءبىراق ماسەلە تاباندى تۇردە شەشىلمەي وتىر. اگرارلىق ۋنيۆەرسيتەتتەردى بىتىرۋشىلەردىڭ، اۋىلدىق جەرلەرگە جىل سايىن تەك %30 ى عانا جۇمىسقا ورنالاسادى، قالعاندارى مەملەكەتتىك قاراجات ەسەبىنەن وقىپ، جۇمىسسىزدار قاتارىن تولىقتىرا وتىرىپ، قالالاردا قالادى»، - دەپ مالىمدەدى سەناتور اقىلبەك كۇرىشبايەۆ.

سەناتور ەلىمىزدە ءبىلىم بەرۋ گرانتتارىن ءبولۋ تەتىگىنە وزگەرىستەر ەنگىزەتىن كەز كەلدى دەپ سانايدى. ول مەملەكەتتىك گرانت پەن ستيپەنديانى تەست ناتيجەسى مەن ۇلگەرىمى نەگىزىندە عانا ەمەس، سونداي-اق مەملەكەتتىڭ قولداۋىنسىز وقي المايتىندارعا الەۋمەتتىك كومەك كورسەتۋ ماقساتىندا ءبولۋ قاجەتتىگىن دە اتاپ ءوتتى.

«اۋىل مەكتەپتەرىندە ءبىر مۇعالىم فيزيكا، ادەبيەت جانە مۋزىكانى وقىتاتىن جاعدايلار بار. قالا مەن اۋىل مەكتەپتەرىنىڭ ماتەريالدىق- تەحنيكالىق بازاسى سالىستىرۋعا كەلمەيدى» - دەدى دەپۋتات.

اۆتور: رۋسلان عابباسوۆ