قىزدار ۋنيۆەرسيتەتىنىڭ جەرىن يەمدەنگەن لاۋازىمدى تۇلعالار ۇستالدى

نۇر- سۇلتان. قازاقپارات - قازاق ۇلتتىق قىزدار پەداگوگيكالىق ۋنيۆەرسيتەتىنە تيەسىلى جەر ۋچاسكەسىن يەمدەنىپ، ساتىپ جىبەردى دەگەن كۇدىكپەن ءبىرقاتار لاۋازىمدى تۇلعا ۇستالدى.

قازاقپارات بۇل تۋرالى ق ر سىبايلاس جەمقورلىققا قارسى ءىس- قيمىل اگەنتتىگىنە سىلتەمە جاساپ حابارلايدى.

«الماتى وبلىسى بويىنشا سىبايلاس جەمقورلىققا قارسى قىزمەت قازاق ۇلتتىق قىزدار پەداگوگيكالىق ۋنيۆەرسيتەتىنىڭ بۇرىنعى قىزمەتكەرىن، «الماتى وبلىسى بويىنشا ازاماتتارعا ارنالعان ۇكىمەت» ك ە ا ق فيليالى قاراساي اۋداندىق تىركەۋ جانە جەر كاداسترى ءبولىمىنىڭ، قاراساي اۋدانى اكىمدىگىنىڭ جەر قاتىناستارى ءبولىمىنىڭ باسشىلارىن 2018 -جىلى كەمەرتوعان كەنتىندە ورنالاسقان اۋدانى 9،0 گ ا جەر ۋچاسكەسى تۇرىندەگى ۋنيۆەرسيتەتتىڭ مۇلكىن ۇرلادى دەگەن كۇدىكپەن ۇستادى»، - دەلىنگەن حابارلامادا.

ءمالىم ەتىلگەندەي، ۋنيۆەرسيتەتتىڭ جەر ۋچاسكەسى ءبىرقاتار ۋچاسكەلەرگە زاڭسىز بولىنگەن جانە ۇستالعان تۇلعالارعا جالعان قۇجاتتار ارقىلى ۇلەستەس بولىپ راسىمدەلگەن. ال كەيىننەن ادال نيەتتى ساتىپ الۋشىلارعا ساتىلعان.

«وسى تۇلعالار 2021 -جىلدىڭ قاڭتارىندا قىلمىس ىزدەرىن جاسىرۋ جانە جەر ۋچاسكەسىن ۋنيۆەرسيتەت بالانسىنا جالعان قايتارۋ ماقساتىندا مەملەكەتتىڭ جەر قورىنان قۇقىق بەلگىلەيتىن قۇجاتتارسىز سانيتارلىق ايماقتاعى جانە جەكە مەنشىككە بەرۋگە جاتپايتىن كولدى كەنتىندە ورنالاسقان جەر ۋچاسكەسىن زاڭسىز بولگەن. بۇگىنگى تاڭدا بارلىق كۇدىكتىلەرگە سوتتىڭ سانكتسياسىمەن بۇلتارتپاۋ شاراسى تاعايىندالدى. تەرگەۋ جالعاسۋدا، جاسالعان قىلمىسقا قاتىسى بار باسقا ادامداردى انىقتاۋ ماقساتىندا قاجەتتى تەرگەۋ شارالارى جۇرگىزىلۋدە»، - دەدى ۆەدومستۆودان.