+7 (701) 759 90 19
USD 425.78 EUR 494.08
RUB 5.98 CNY 66.23
جاڭالىقتار

شەكارالاس ەلدەردەن كەلەتىن سۋ كولەمىنىڭ تومەندەۋى بايقالادى - قاسىم-جومارت توقايەۆ

13 قازان 19:22
:ءبولىسۋ
شەكارالاس ەلدەردەن كەلەتىن سۋ كولەمىنىڭ تومەندەۋى بايقالادى - قاسىم-جومارت توقايەۆ

نۇر-سۇلتان. قازاقپارات - مەملەكەت باسشىسى قاسىم-جومارت توقايەۆ ەلوردادا ءوتىپ جاتقان «پاريج كەلىسىمىنىڭ ماقساتتارىنا قول جەتكىزۋ جولدارى جانە قازاقستاننىڭ كومىرتەگى بەيتاراپتىلىعى» اتتى حالىقارالىق كونفەرەنسيادا كورشى ەلدەردەن كەلەتىن ترانسشەكارالىق وزەندەردىڭ پروبلەماسىن كوتەردى، دەپ حابارلايدى قازاقپارات ءتىلشىسى.

«ب ۇ ۇ مالىمەتتەرى بويىنشا، جاھاندىق جىلىنۋ مەن انتروپوگەندىك اسەرگە بايلانىستى 2030-جىلعا قاراي الەمدىك سۋ تاپشىلىعى %40 جەتۋى مۇمكىن»، - دەدى قاسىم-جومارت توقايەۆ.

پرەزيدەنتتىڭ ايتۋىنا قاراعاندا، قازاقستانداعى سۋ قاۋىپسىزدىگى كوبىنەسە ترانسشەكارالىق وزەندەردىڭ گيدرولوگيالىق جانە ەكولوگيالىق جاعدايىنا بايلانىستى.

«بۇگىندە شەكتەس ەلدەردەن كەلەتىن سۋ كولەمىنىڭ تومەندەۋى بايقالادى. بۇل وزەندەر مەن كولدەردىڭ تابيعي سۋ تەڭگەرىمىنىڭ بۇزىلۋىنا، سونداي-اق ەلدىڭ ءبىرقاتار وڭىرلەرىندەگى ەكولوگيالىق جاعدايدىڭ ناشارلاۋىنا الىپ كەلۋدە»، - دەگەن مەملەكەت باسشىسى حالىقارالىق ۇيىمداردى بۇل ىستە قولداۋ كورسەتۋگە شاقىردى.

«ب ۇ ۇ تۋىنىڭ استىندا ترانسشەكارالىق سۋ اعىندارىن قورعاۋ جانە پايدالانۋ ماسەلەلەرىن رەتتەيتىن ءبىرقاتار حالىقارالىق كەلىسىمدەر قابىلداندى. كەڭەيتىلگەن ديالوگ پەن ىنتىماقتاستىق جولىمەن حالىقارالىق مىندەتتەمەلەردى ءىس جۇزىندە ورىنداۋ جونىندەگى كۇش-جىگەردى ۇيلەستىرۋ قاجەتتىگى ءپىسىپ-جەتىلدى دەپ ويلايمىن. بۇل ماسەلەدە ءبىز سەرىكتەستەر مەن حالىقارالىق قوعامداستىقتىڭ قولداۋىنا سەنىم ارتامىز»، - دەپ تۇيىندەدى مەملەكەت باسشىسى.


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
ريزابەك نۇسىپبەك
ريزابەك نۇسىپبەك
954-049

مۇراعات