ادام قۇقىقتارى جونىندەگى ۋاكىلدىڭ قىزمەتىنە ارالاسقاندار جازاعا تارتىلادى
بۇل تۋرالى ماجىلىستە دەپۋتات يرينا ۋنجاكوۆا ءمالىم ەتتى، دەپ حابارلايدى قازاقپارات ءتىلشىسى.
بۇگىن ماجىلىستە «قازاقستان رەسپۋبليكاسىنداعى ادام قۇقىقتارى جونىندەگى ۋاكىل تۋرالى» زاڭ جوباسى ىلەسپە تۇزەتۋلەرىمەن تانىستىرىلدى.
«قازاقستان رەسپۋبليكاسىنداعى ادام قۇقىقتارى جونىندەگى ۋاكىلدىڭ قىزمەتىنە ارالاسىپ، كەدەرگى جاساۋ فاكتىسى بويىنشا اكىمشىلىك جازا قاراستىرىلعان. كودەكسكە ءتيىستى تۇزەتۋلەردى ەنگىزبەكپىز»، - دەدى ي. ۋنجاكوۆا زاڭ جوباسىن تانىستىرۋ كەزىندە.
بۇدان بۇرىن حابارلانعانداي، ادام قۇقىقتارى جونىندەگى ۋاكىلدىڭ مارتەبەسىن كوتەرەتىن قادامدار ىسكە قوسىلادى.
«زاڭ جوباسىندا دەربەس قۇقىقتىلىققا يە بولۋ سياقتى قوسىمشا بار. بۇل ءوز كەزەگىندە وسى قىزمەت ءۇشىن ماڭىزدى. ياعني ۋاكىل تۇتقىندالمايدى، قاماۋعا الىنبايدى، قىلمىستىق ءارى اكىمشىلىك جاۋاپقا تارتىلمايدى، سونداي- اق ءتىنتۋ مەن جەكە تەكسەرۋ جۇرگىزىلمەيدى»، - دەدى دەپۋتات.
«ادام قۇقىقتارى جونىندەگى ۋاكىل قىزمەتىن قانداي دا ءبىر جولمەن شەكتەۋگە تىيىم سالىنادى. ول تاۋەلسىز بولادى جانە قانداي دا ءبىر مەملەكەتتىك ورگاندارعا جانە لاۋازىم يەلەرىنە ەسەپ بەرمەيدى»، - دەدى ي. ۋنجاكوۆا زاڭ جوباسىن تانىستىرۋ كەزىندە.
اۆتور: رۋسلان عابباسوۆ