ەلوردادا قارجى پيراميدالارىنىڭ قىزمەتى كوپتەپ تارالۋدا

نۇر- سۇلتان. قازاقپارات - ينتەرنەت جەلىسىندە پيراميدا تۇرىمەن جۇمىس ىستەپ جۇرگەن سايتتاردىڭ «ەگىزدەرى» كوپتەپ تارالۋدا.

الاياقتار بىرنەشە سايت قۇرىپ، ولاردى كوبىنە Advacash, Forex, Binance, MetaTrade جانە ت. ب سايتتاردىڭ اتىمەن ۇسىنۋدا، دەپ حابارلايدى قازاقپارات نۇر- سۇلتان قالاسى پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.

باستاپقىدا الاياقتار جاپپاي حات تاراتىپ، ءتۇرلى سايتتار مەن الەۋمەتتىك جەلىلەردە جارنامالىق ۇسىنىستار جاريالايدى، ءتۇرلى ابونەنتتىك نومىرلەردەن تەلەفون سوعادى. كريپتوبيرجالاردا ساۋدانى جۇزەگە اسىرۋ ءۇشىن پلاتفورماعا اقشا ينۆەستيتسيالاۋدى ۇسىنادى. بۇل جارنامالاردا ماسەلەن، 100 دوللار سالساڭ، ونى 10 ەسە كوبەيتۋگە بولاتىنى ايتىلعان. ودان كەيىن قاسكۇنەمدەر بروكەردىڭ جالعان سايتى مەن جەكە كابينەتىن قۇرىپ، بولاشاق «قۇربانىنا» قولجەتىمدى ەتەدى.

بۇل رەتتە الاياقتار جەكە كابينەتتە شوتتىڭ اقشاعا قانشالىقتى تولعانىن پايدالانۋشىمەن بىردەي كورە الادى. ودان كەيىن پايدالانۋشى فورەكس- بيرجادا ويىنعا كىرىسىپ، ۇتا باستايدى. الايدا ءىس جۇزىندە بۇل «ويىندى» قاشىقتان الاياقتار باسقارادى. ويىن قىزىعىنا كىرىپ كەتكەن پايدالانۋشى اقشانى ودان دا كوپ تىگىپ، ونى ويىن بارىسىندا ۇتتى دەپ سانايدى، ءىس جۇزىندە بارلىق قاراجاتتى الاياقتار تارتىپ الادى. پايدالانۋشى ۇتىسىن جەكە كابينەتتەن شىعارۋ شەشىمىن قابىلداعاندا، بروكەر ويىننان شىعۋ ءۇشىن ساقتاندىرۋ جارناسىن، ايىپپۇل سانكيالارىن تولەۋ جانە ويدان شىعارىلعان ت. ب شارتتاردى ورىنداۋ قاجەت ەكەنىن ايتادى. بۇل پروتسەسس ۇزاق ۋاقىتقا سوزىلۋى مۇمكىن، ودان كەيىن بروكەردەن بايلانىس ءۇزىلىپ، سايت جابىلىپ ۇلگەرەدى.

نۇر- سۇلتان قالاسى پوليتسيا دەپارتامەنتى كريمينالدىق پوليتسيا باسقارماسىنىڭ باستىعى دميتريي دەميدوۆ الاياقتار ارەكەتتەرىنىڭ قالاي قۇربانى بولماۋ تۋرالى بايانداپ بەردى:

«ەڭ باستىسى - قىراعى بولىپ، عاجايىپ بولاتىنىنا سەنبەۋ كەرەك، ەشقانداي پيراميدالاردىڭ جۇمىس ىستەمەيتىنىن ۇمىتپاعان ءجون. بىرىنشىدەن، ديلەردىڭ ليتسەنزياسىنىڭ بار- جوعىن تەكسەرۋ قاجەت. ونى ينتەرنەتتەن قاراۋعا بولادى. ەكىنشىدەن، تولەم مالىمەتتەرىن تولتىرۋ جانە اقشالاي قاراجاتتى اۋدارار الدىندا سايتتىڭ ادرەسىن مۇقيات تەكسەرگەن ابزال. زاڭناماعا سايكەس، ازاماتتاردىڭ جەكە مالىمەتتەرىن وڭدەيتىن كەز كەلگەن رەسۋرس ەلىمىزدىڭ اۋماعىندا ورنالاسۋى ءتيىس. ەگەر حوستينگ شەتەل مەملەكەتىنىڭ اۋماعىندا ورنالاسقان بولسا - قوسىمشانى جاۋىپ، بۇل تاراپپەن بايلانىستى ءۇزىڭىز. سونداي- اق، دومەن سۋ جاڭا بولىپ، جەكە تۇلعانىڭ اتىنا تىركەلسە، ونىمەن بايلانىسۋ قاجەت ەمەس».

اۆتور: اياۋلىم التىنبەك