اقمولا وبلىسىنىڭ ءبىرقاتار اۋدانىندا كوروناۆيرۋسقا قارسى ۆاكسيناتسيا اياقتالدى

نۇر-سۇلتان. قازاقپارات - اقمولا وبلىسىنىڭ ءبىرقاتار اۋدانىندا تۇرعىنداردى كوروناۆيرۋس ينفەكسياسىنا قارسى ۆاكسينالاۋ اياقتالدى.

بۇل تۋرالى اقمولا وبلىسى اكىمىنىڭ ورىنباسارى اينا ءمىسىرالىموۆا ايتتى، دەپ حابارلايدى قازاقپارات ءتىلشىسى.

«ۆاكسيناتسياعا قاتىستى ايتار بولسام، ەكپەنىڭ 1-كومپونەنتى شامامەن 300 مىڭ ادامعا سالىندى. بۇل - ەكپە الۋعا ءتيستى حالىقتىڭ 69,1 پايىزى. ال ەكىنشى كومپونەنت 250 مىڭنان استام ادامعا نەمەسە ەكپە الۋى قاجەتتى تۇرعىنداردىڭ 61,4 پايىزىنا سالىندى. اتالعان جۇمىس جەرگىلىكتى اتقارۋشى ورگانداردىڭ، وبلىس باسشىلىعىنىڭ تۇراقتى باقىلاۋىندا. كوروناۆيرۋس ينفەكسياسىنىڭ الدىن الۋ جانە ءوزارا ءىس-قيمىل جونىندەگى ۆەدومستۆوارالىق كوميسسيا وتىرىسى ۇنەمى وتكىزىلەدى»، - دەدى ول ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.

ونىڭ اتاپ وتۋىنشە، سوڭعى ايلاردىڭ ىشىندە وڭىردە ۆاكسيناتسياعا بايلانىستى حالىقپەن جۇمىس كۇشەيتىلدى. ەكپە بريگادالارىنىڭ سانى 30 دان 130 دان استامعا دەيىن ۇلعايدى.

ۆاكسيناتسيا جۇمىسىنا 260 ەكپە پۋنكتى مەن ۇتقىر بريگادالار جۇمىلدىرىلعان. ال وبلىستىڭ شالعاي اۋىلدارىنىڭ تۇرعىندارىن ۆاكسينالاۋ ءۇشىن 11 جىلجىمالى كەشەن جۇمىس ىستەپ جاتىر.

«بىزدە حالىق سانى از اۋداندار دا بار. وندا جوسپار شەگىندە حالىقتى ۆاكسيناتسيالاۋ اياقتالدى. جۇمىستى جالعاستىرىپ جاتىرمىز جانە بوساعان جىلجىمالى مەديتسينالىق كەشەندەردى ونىڭ قىزمەتىن قاجەتسىنىپ وتىرعان ەلدى مەكەندەرگە جىبەرىپ جاتىرمىز»، - دەدى اينا ءمىسىرالىموۆا.