مەملەكەت باسشىسىنىڭ ب ۇ ۇ باس اسساملەياسىنىڭ جوعارى دەڭگەيدەگى پلەنارلىق وتىرىسىندا سويلەگەن ءسوزى

نۇر-سۇلتان. قازاقپارات - مەملەكەت باسشىسى قاسىم-جومارت توقايەۆتىڭ يادرولىق قارۋدى تولىق جويۋ جولىنداعى حالىقارالىق كۇرەس كۇنىنە ارنالعان جوعارى دەڭگەيدەگى پلەنارلىق وتىرىستا سويلەگەن ءسوزى جاريالاندى، دەپ حابارلايدى قازاقپارات اقورداعا سىلتەمە جاساپ.

قازاقپارات ق ر پرەزيدەنتى ءسوزىنىڭ تولىق ءماتىنىن ۇسىنادى.

قۇرمەتتى پرەزيدەنت مىرزا!

قۇرمەتتى باس حاتشى!

حانىمدار مەن مىرزالار!

پرەزيدەنت مىرزا، وسىنداي اسا ماڭىزدى جيىن ۇيىمداستىرعانىڭىز ءۇشىن سىزگە العىس بىلدىرەمىن. بۇگىندە ادامزات COVID-19 پاندەمياسىنىڭ اسەرىنەن ءالى زارداپ شەگۋدە. ىندەت قوعامنىڭ قانشالىقتى ءالسىز ءارى مۇنداي داعدارىسقا دايىن ەمەس ەكەنىن كورسەتىپ بەردى.

ۆيرۋستىڭ زاردابى كوپ جاعدايدا اۋىر ەكەنىنە قاراماستان، ادامزاتتىڭ شىنايى تىنىس-تىرشىلىگىنە قاۋىپ توندىرمەيدى. الايدا، ونى يادرولىق قارۋدىڭ ناقتى قاۋپىنە قارسى بىرلەسكەن كۇش-جىگەرىمىزدى ارتتىرا ءتۇسۋ قاجەت ەكەنىن بىلدىرەتىن دابىل بەلگىسى دەۋگە بولادى.

كەيبىر ەلدەردە جاسالىپ جاتقان يادرولىق باعدارلامالاردىڭ قارقىن الۋىن ۇنەمى تونەتىن تەررورلىق قاۋىپ-قاتەرمەن بايلانىستىراتىن بولساق، اقىرزامان ورناتاتىن قارۋلاردىڭ قولدانىلۋ قاۋپى ارتا تۇسكەنىن بايقايمىز.

دەگەنمەن، جۋىردا عانا بۇل باعىتتا بەلگىلى ءبىر دەڭگەيدە وڭ قادامدار جاسالىپ جاتقانىنا كۋا بولدىق.

مىسالى، - يادرولىق قارۋعا تىيىم سالۋ تۋرالى شارت كۇشىنە ەندى؛

- يرانمەن اراداعى يادرولىق قارۋعا قاتىستى مامىلەنى قالىپقا كەلتىرۋ جونىندەگى كەلىسسوزدەر قايتا قارالۋدا؛

- شابۋىلداۋعا ارنالعان قارۋلاردى ازايتۋ جونىندەگى جاڭا شارت ۇزارتىلدى؛

- ا ق ش پەن رەسەي اراسىندا ستراتەگيالىق تۇراقتىلىق تۋرالى بىرلەسكەن مالىمدەمە قابىلداندى.

ارينە، ءوزارا جويۋعا كەپىلدىك بەرەتىن دوكترينا يادرولىق دەرجاۆالاردىڭ جۋىق ارادا ءوز ارسەنالىنان باس تارتۋى ەكىتالاي ەكەنىن بىلدىرەدى. سوندىقتان 2045-جىلعا دەيىن يادرولىق قارۋدان ازات، بەيبىت ءومىر قالىپتاستىرۋعا ۇمتىلاتىنىمىز تۋرالى مالىمدەي وتىرىپ، كوڭىلدەگىنى ناقتى ىسكە اسىراتىنىمىزعا سكەپتيكتەر كۇمانمەن قاراۋى مۇمكىن. ءبىزدىڭ تاريحي تاجىريبەمىز مۇنىڭ باسقاشا بولاتىنىن كورسەتەدى.

قازاقستاننىڭ سەمەي يادرولىق پوليگونىن جابۋ تۋرالى شەشىم قابىلداپ، يادرولىق قۋاتى جاعىنان ءتورتىنشى سانالاتىن ارسەنالىنان باس تارتقانىنا بيىل 30 جىل تولدى. ون بەس جىلدان كەيىن ورتالىق ازيا مەملەكەتتەرى ءوز وڭىرلەرىن يادرولىق قارۋدان ازات ايماق دەپ جاريالادى.

بۇل - تولىقتاي سولتۇستىك جارتى شاردا ورنالاسقان العاشقى يادروسىز ءوڭىر. يادرولىق قارۋ ساياسي تاڭداۋ بولعاندىقتان جاعداي مەن ستراتەگيالىق ادىستەر تەز وزگەرۋى مۇمكىن.

قۇرمەتتى پرەزيدەنت!

قازاقستاننىڭ يادرولىق سىناقتارعا جان-جاقتى تىيىم سالۋ تۋرالى شارتتىڭ تەزىرەك كۇشىنە ەنۋىنە قول جەتكىزۋگە بەل بايلاعانىن تاعى دا ناقتىلايمىن. قازاقستان ادامزاتتىڭ دامۋى جولىندا يادرولىق قارۋدان باس تارتۋ جونىندەگى باسىمدىعىن ودان ءارى پايدالانا بەرەتىنىن بۇل باعىتتاعى وڭ قادام رەتىندە اتاپ وتكىم كەلەدى.

يادرولىق قارۋدى تاراتپاۋ جونىندەگى شارت يادرولىق ەنەرگيانى ازاماتتىق ماقساتقا زاڭدى ءتۇردى پايدالانۋ مەن يادرولىق قارۋدى تاراتۋدىڭ ارا-جىگىن اجىراتادى.

يادرولىق قۋات بىرتە-بىرتە تومەن كومىرتەكتى ەنەرگيانىڭ ماڭىزدى كوزىنە اينالۋدا. قازاقستاندا ءوز اتوم ونەركاسىبىن دامىتۋ ءۇشىن كەشەندى تەحنيكالىق-ەكونوميكالىق نەگىزدەمە جاسالىپ جاتىر.

حانىمدار مەن مىرزالار!

يادرولىق قارۋدان ازات، بەيبىت ءومىر قالىپتاستىرۋ مەنىڭ ۇكىمەتىمنىڭ ساياساتىنداعى باسىمدىق بولىپ قالا بەرەدى. بۇل ۇمتىلىس سوڭعى وتىز جىل ىشىندە قازاقستاندى يادرولىق قارۋعا قارسى جاھاندىق قوزعالىستىڭ جاقتاۋشىسى ەتتى.

سونىمەن قاتار ءبىزدىڭ ۇلتتىق تۇتاستىعىمىزدىڭ ءبىر بولىگىنە اينالدى. ءبىز قارۋسىزدانۋ جانە يادرولىق قارۋدى تاراتپاۋ جولىنداعى كۇش-جىگەرىمىزدى الداعى ۋاقىتتا سىزدەرمەن بىرلەسە جۇمساۋعا دايىنبىز. راقمەت!