قازاقستاندا كارتوپ باعاسى تاعى قىمباتتاي ما؟
بۇل سۇراقتارعا ق ر ا ش م وسىمدىك شارۋاشىلىعى ونىمدەرىن ءوندىرۋ جانە قايتا وڭدەۋ دەپارتامەنتىنىڭ ديرەكتورى ازات سۇلتانوۆ جاۋاپ بەردى، دەپ حابارلايدى قازاقپارات ءتىلشىسى.
«قازىر ءوڭىر اكىمدىكتەرى الدىنداعى كەزەك كۇتتىرمەيتىن ءىس - كارتوپ وندىرۋشىلەرمەن كەلىسىمشارت جاساسىپ، كارتوپ قورىن جاساقتاۋ. ول ءۇشىن مينيسترلىك تاراپىنان بارلىق جاعداي جاسالعان، ءار اكىمدىككە كارتوپ وندىرۋشىلەردىڭ ءتىزىمىن بەردىك. بىزدە كارتوپ وندىرەتىن 4 ايماق بار، ول - پاۆلودار، قاراعاندى، س ق و جانە اقمولا وبلىستارى. ەگەر اكىمدىكتەر كارتوپ قورىن قازىردەن باستاپ جاساقتاسا، تاپشىلىق پەن باعا ءوسىمى بولمايدى. قورداعى ءونىم كەلەسى جىلدىڭ مامىر ايىنا دەيىن جەتسە، ودان ءارى كوكتەمگى جاڭا كارتوپ ناۋقانى باستالادى»، - دەدى ازات سۇلتانوۆ و ك ق- دە ونلاين وتكەن باسپا ءسوز ءماسليحاتىندا.
ونىڭ ايتۋىنشا، وتاندىق كارتوپ وندىرۋشىلەر باعا تۇراقتىلىعىن ساقتاپ، ءونىم تاپشىلىعى بولماۋى ءۇشىن كەلىسىمشارتقا وتىرۋدى ۇسىنىپ وتىر.
«ارينە، ماۋسىمدىق باعا ءوسىمى كۇتىلەدى. ءبىراق باعا قولجەتىمدى بولادى. ءبىزدىڭ بولجامىمىزعا سايكەس، كەلەر جىلى ماۋسىم كەزىندە كارتوپتىڭ كەلىسى 200-250 تەڭگەنى قۇراسا، ءسابىز بەن قىزىلشانىڭ باعاسى 300 تەڭگەگە دەيىن بارىپ قالادى دەپ جوسپارلانىپ وتىر»، - دەيدى ول.
سونداي-اق، ا ش م وكىلىنىڭ مالىمدەۋىنشە، كارتوپ تاپشىلىعى مەن باعا ءوسۋىنىڭ الدىن الۋدا ءونىمدى دۇرىس ساقتاۋ وتە ماڭىزدى.
بۇعان دەيىن ازات سۇلتانوۆ حالىق ءجيى تۇتىناتىن ونىمدەردىڭ ءبىرى ناننىڭ باعاسىنا قاتىستى ءوز بولجامىن جاسادى.