+7 (701) 759 90 19
USD 426.32 EUR 496.24
RUB 6.04 CNY 66.74
جاڭالىقتار

پاندەميا باسپا باسىلىمدارىنىڭ ينتەرنەتكە اۋىسۋىن جەدەلدەتتى

28 قىركۇيەك 19:55
:ءبولىسۋ
پاندەميا باسپا باسىلىمدارىنىڭ ينتەرنەتكە اۋىسۋىن جەدەلدەتتى

نۇر-سۇلتان. قازاقپارات - پاندەميا سالدارىنان باسپا باسىلىمدارىنىڭ ينتەرنەتكە اۋىسۋ پروتسەسى جەدەلدەدى.

بۇل پىكىردى Nur Media حولدينگىنىڭ باس ديرەكتورى بولات كاليانبەكوۆ ايتتى، دەپ حابارلايدى قازاقپارات ءتىلشىسى.

«قازاقستان قوعامىندا اقپاراتتى تۇتىنۋ دەڭگەيى وتە جوعارى، ءتىپتى بازالىق قاجەتتىلىككە اينالدى دەۋگە بولادى. كوپ ادامدار ۇيقىدان تۇرىسىمەن سمارتفونىن ىزدەيدى. وسىعان بايلانىستى بىزگە ب ا ق رەتىندە باسەكەنى كۇشەيتۋ قاجەت. پاندەميا سالدارىنان باسپا باسىلىمدارىنىڭ ينتەرنەتكە اۋىسۋ پروتسەسى جەدەلدەدى. قازىرگى ۋاقىتتا باسپا گازەتتەرىنىڭ اقپارات بەرۋ جۇيەسى وتە كۇردەلى، وندا قاعاز جەتكىزۋ، تيپوگرافيا جۇمىسى، گازەتتى وقىرمانعا جەتكىزەتىن ديستريبۋتسيا سىندى اۋقىمدى تەحنولوگيالىق تىزبەكتەر بار. پاندەميا كەزىندە وسى تىزبەكتەرگە اۋىر سوققى ءتيدى. شەكارالار جابىلىپ، قاعاز جەتكىزۋ ءىسى قيىندادى، تيپوگرافيا شىعىنى كوبەيدى. سالدارىنان گازەت تيراجى ازايدى»، - دەدى سپيكەر Astana Media Week فورۋمىنىڭ «جاڭا، كوۆيدتان كەيىنگى الەمدەگى قوعام جانە ب ا ق» پانەلدىك سەسسياسىندا.

ونىڭ ايتۋىنشا، باسپا باسىلىمدارىنىڭ ماڭىزى ازايعانىن جارناما ءىسى دە كورسەتىپ وتىر.

ەل ىشىندە سوڭعى 5 جىلدا باسپا باسىلىمىنىڭ جارناماداعى ۇلەسى 8 پايىزدان 4 پايىزعا دەيىن تومەندەگەن.

جالپى 2020-جىلى قازاقستاندا جارناما نارىعى 11 پايىزعا تومەندەدى. اسىرەسە راديودا 90 پايىزدىق تومەندەۋ بار، ويتكەنى ادامدار كولىكپەن ەشقايدا بارمادى، ادەتتە راديو تىڭدايتىن مەيرامحانالار مەن ساۋدا ورتالىقتارى جۇمىس ىستەمەدى.

«مۇنىڭ ءبارى باسپا باسىلىمدارىنىڭ ينتەرنەتكە كوشۋىن جەدەلدەتتى. سيفرلىق فورماتقا اۋىسۋ ترەندكە اينالدى دەۋگە بولادى. وتكەن جىلى بىرنەشە جىلدىق تاريحى بار «ەكسپرەسس-ك» گازەتى باسپا نۇسقاسىنان باس تارتىپ، تولىعىمەن ينتەرنەتكە اۋىستى.

ارينە، باسپا باسىلىمدارىنىڭ كۇنى ءبىتتى دەپ بولجاۋعا ءالى ەرتە. ويتكەنى ولاردىڭ ءوز وقىرمانى بار. تەك قانا باسپا گازەتتەرى جەدەل اقپارات بەرۋدە ارتتا قالدى. ال كۇن تارتىبىندەگى وزەكتى ماسەلەلەردى تالقىلاۋدا وزەكتىلىگىن جوعالتپادى. ينتەرۆيۋ، جان-جاقتى ساراپتامالار ينتەرنەتتە دۇرىس وقىلماسا دا، باسپا بەتتەرىندە جاقسى وقىلادى. ءبىز مۇنى تۇسىنەمىز»، - دەپ قورىتىندىلادى ب. كاليانبەكوۆ.

ەسكە سالا كەتسەك، كەشە ەلوردادا Astana Media Week - 2021-جىل سايىنعى مەديااپتالىعى باستالدى. AMW-2021 بارىسىندا حالىقارالىق مەدياقاۋىمداستىق مۇشەلەرى اقپاراتتىق كۇن ءتارتىبىنىڭ وزەكتى ماسەلەلەرىن كوتەرەدى. ونداعى ءىس-شارالار ونلاين جانە وفلاين-الاڭداردا دا جوسپارلانعان.


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر

مۇراعات