سىرتقى ىستەر مينيسترلىگى مەملەكەتتىك ءتىلدى قولدانۋدا الدىڭعى شەپتەن كورىنۋى ءتيىس - ەرلان الىمبايەۆ
بۇل تۋرالى «ەلىمىزدە مەملەكەتتىك ءتىلدىڭ قولدانىلۋ اياسى جانە سىرتقى ىستەر مينيسترلىگىندە مەملەكەتتىك ءتىلدى ۇلىقتاۋ شارالارى» اتتى دوڭگەلەك ۇستەل وتىرىسىندا اتالعان ۆەدومستۆودا ءمينيستردىڭ ورىنباسارى ەرلان الىمبايەۆ ايتتى، دەپ حابارلايدى قازاقپارات ءتىلشىسى.
«وزدەرىڭىزگە بەلگىلى، سوڭعى جىلدارى مەملەكەت باسشىلىعىنىڭ قولداۋىمەن ەلىمىزدە مەملەكەتتىك ءتىلدى قولدانۋ سالاسىندا ءبىراز ىلگەرلەۋشىلىكتەر بولىپ جاتىر. مەملەكەتتىك ءتىل توڭىرەگىندەگى تۇيتكىلدى ماسەلەلەر حالىق اراسىندا، الەۋمەتتىك جەلىلەردە تولاسسىز تالقىلانۋدا. وسى ورايدا، ەل اراسىندا تىلگە تيەك بولىپ جاتقان ماسەلەلەردىڭ بيلىككە جەتۋى جانە جەرگىلىكتى اتقارۋشى ورگانداردىڭ وعان لايىقتى ارەكەت جاساۋى - ۋاقىت تالابى. قازاقستان رەسپۋبليكاسىنىڭ سىرتقى ىستەر مينيسترلىگى مەملەكەتتىك ءتىلدى قولدانۋ سالاسىندا الدىڭعى شەپتەن كورىنۋى ءتيىس ورگان. سەبەبى، حالىقارالىق ءىس- شارالاردىڭ نەگىزگى ۇيىتقىسى رەتىندە ءبىزدىڭ مينيسترلىك - مەملەكەت ايناسى. سوندىقتان مينيسترلىك پەن ەلشىلىكتەرىمىزدىڭ قىزمەتكەرلەرى كۇندەلىكتى ومىردە جانە قىزمەت بارىسىندا مەملەكەتتىك ءتىلدى قولدانۋى شەتەلدىكتەر الدىنداعى بەدەلىمىزدى كوتەرۋگە سەپتىگىن تيگىزەدى»، - دەدى ەرلان الىمبايەۆ.
ونىڭ ايتۋىنشا، مينيسترلىك باسشىلىعى ءتىل ساياساتى سالاسىنداعى جۇكتەلگەن جاۋاپكەرشىلىكتى سەزىنە وتىرىپ، شەشۋشى قادامدار جاساۋدا.
«اتاپ ايتقاندا، ءمينيستردىڭ 2021 -جىلعى 25- قاڭتارداعى بۇيرىعىمەن مەملەكەتتىك ءتىل ساياساتى باسقارماسى دەربەس بولىمشە بولىپ قۇرىلىپ، ءمينيستردىڭ ءبىرىنشى ورىنباسارىنا تىكەلەي باعىناتىن قۇرىلىمعا اينالدى. ءتىلدى قولدانۋ سالاسىنداعى جۇمىستاردى كۇشەيتۋ ماقساتىندا قازاقستان رەسپۋبليكاسى سىرتقى ىستەر مينيسترلىگىنىڭ مەملەكەتتىك ءتىل كوميسسياسى قۇرىلدى»، - دەدى ول.
بۇل كوميسسيانىڭ مىندەتتەرىنە مينيسترلىكتە مەملەكەتتىك ءتىل ساياساتىن كۇشەيتۋ ءۇشىن ۇسىنىستار ازىرلەۋ، ديپلوماتيالىق قىزمەت پەرسونالىنىڭ مەملەكەتتىك ءتىلدى ءبىلۋىن جەتىلدىرۋ كىرەدى.
«ءتىل كوميسسياسى ديپلوماتيالىق قىزمەت پەرسونالىنىڭ مەملەكەتتىك ءتىلدى ءبىلۋىن جەتىلدىرۋ ءۇشىن «قازتەست» ناتيجەلەرىن ەسكەرە وتىرىپ، جىلىنا 2 رەت باعالاۋ جۇرگىزەدى. اتالعان شارالار مينيسترلىكتە اتقارىلعان نەگىزگى ىستەردىڭ ناقتى مىسالى عانا. ءالى دە قولعا الاتىن، اتقاراتىن ىستەر جەتەرلىك»، - دەدى ە. الىمبايەۆ.
اۆتور: رۋسلان عابباسوۆ