قازاقستاننىڭ «ۇلى دالا التىنى» ۇلى بريتانيا جۇرتشىلىعىنىڭ نازارىنا ۇسىنىلدى

لوندون، قازاقپارات - كەمبريدج ۋنيۆەرسيتەتىنىڭ فيتسۋيليام مۇراجايىندا «ۇلى دالا التىنى» كورمەسى اشىلدى.

وعان شىعىس قازاقستان وبلىسىنداعى ەجەلگى ساق قورعاندارىنان تابىلعان التىن ارتەفاكتىلەر قويىلدى. شارا قازاقستان تاۋەلسىزدىگىنىڭ 30 جىلدىعى قۇرمەتىنە ۇيىمداستىرىلدى، دەپ حابارلايدى قازاقپارات ءتىلشىسى.

ۇلى بريتانيا جۇرتشىلىعى ءبىزدىڭ داۋىرىمىزگە دەيىنگى VIII- III عاسىرلاردا ورتالىق ازيادا، اتاپ ايتقاندا قازاقستاننىڭ التاي تاۋ جۇيەسىندە ۇستەمدىك ەتكەن سكيف وركەنيەتىنىڭ جادىگەرلەرى، ساق قورعاندارىنان تابىلعان قۇندى دۇنيەلەرىن تاماشالاۋ مۇمكىندىگىنە يە بولدى. كورمەدە بەرەل، شىلىكتى جانە ەلەكە سازى سياقتى ءۇش ءتۇرلى قورىمنان شىققان جۇزگە جۋىق ارحەولوگيالىق ولجا قويىلعان. ەكسپوزيتسيا ەجەلگى ساقتاردىڭ كوشپەلى مال شارۋاشىلىعى، تاۋ- كەن ءوندىرىسى جانە مەتاللۋرگيا سالالارىندا بىرەگەي مادەنيەتى مەن تەرەڭ ءبىلىمى بولعانىن كورسەتەدى. بۇل كەزەڭدى ەجەلگى قازاقتار تاريحىنداعى «التىن عاسىر» دەپ تە اتايدى.

ەڭ باعالى ەكسپوناتتاردىڭ ءبىرى - كيىمدەرى 15000 التىن زاتتان تۇراتىن «التىن ادامنىڭ» قالدىقتارى. «ۇلى بريتانياعا جانە البەتتە بۇكىل الەمگە قازاقستاننىڭ ەجەلگى مادەنيەتىن تانىتۋعا ارنالعان ەرەكشە مۇمكىندىك. مەنىڭشە، بۇل جاھان تاريحىن قايتا جازاتىنداي تاريحي جاعداي. ىشىنە تالاي سىردى بۇككەن ارحەولوگيالىق قازبالاردى زەرتتەي وتىرىپ، ءبىز تالاي عىلىمي جاڭالىقتاردى بىرگە اشامىز دەگەن ويدامىن»، دەيدى كەمبريدج ۋنيۆەرسيتەتى جانىنداعى فيتسۋيليام مۇراجايىنىڭ ديرەكتورى ليۋك سايسون.

شىعىس قازاقستان جانە فيتسۋيليام مۇراجايى اراسىنداعى ارىپتەستىك كوپىرى بۇعان دەيىن ورناعانى بەلگىلى. وتاندىق ارحەولوگتار قورعانداردان تابىلعان جادىگەرلەردى بريتانيالىق ارىپتەستەرىمەن بىرگە زەرتتەپ كەلەدى. كەمبريدج ۋنيۆەرسيتەتى جانىنداعى ماكدونالد ارحەولوگيالىق زەرتتەۋ ينستيتۋتىنىڭ عالىمدارى جاڭا ءينۆازيۆتى ەمەس تەحنولوگيالاردى قولدانا وتىرىپ، بىرەگەي ارتەفاكتىلەردىڭ قۇپيالارىن اشىپ جاتىر.

«ءبىز ميكرواناليزدەر جاسايتىن بولامىز. زاماناۋي ميكروسكوپتىڭ كومەگىمەن ەجەلگى ساقتاردىڭ قانداي تەحنولوگيالار پايدالانعانىن جانە قولونەر بۇيىمدارىن قالاي جاساعانىن زەرتتەي الامىز»، دەدى «ۇلى دالا التىنى» كورمەسىنىڭ ۇلى بريتانياداعى كۋراتورى رەبەنكا روبەرتس.

بىرەگەي التىن ارتەفاكتىلەردىڭ ەۋروپالىق اۋديتورياعا بۇل العاش رەت ۇسىنىلۋى. ولاردى بريتانيالىق بۇقارالىق اقپارات قۇرالدارى حالىقارالىق ارحەولوگيالىق سەنساتسيا دەپ اتاپ، شارا تۋرالى جارىسا جازىپ، تاسپاعا ءتۇسىرىپ جاتىر. كورمەگە كىرۋ تەگىن. ەكسپوزيتسيا فيتسۋيليام مۇراجايىندا كەلەر جىلدىڭ 30-قاڭتارىنا دەيىن وتەدى.

اۆتور: عالىمجان قارامان ۇلى