قازاقتىڭ ەپوستىق جىرلارى كوميكس تىلىندە سويلەدى

نۇر- سۇلتان. قازاقپارات - نۇرسۇلتان نازاربايەۆ قورى جانىنداعى مەملەكەتتىك ءتىلدى دامىتۋ قورى ق ر تۇڭعىش پرەزيدەنتى - ەلباسى مۋزەيىندە «ۇلى دالانىڭ اڭىزدارى» توپتاماسىمەن شىققان جاڭا كوميكستەردىڭ تۇساۋكەسەرىن وتكىزدى، حابارلايدى قازاقپارات ءتىلشىسى.

«ەڭلىك- كەبەك»، «ەستاي- قورلان»، «قوزى كورپەش- بايان سۇلۋ»، «جۇمباقتاس»، «ايشا ءبيبى»، «شايتانكول»، «بالقاش». «ۇلى دالانىڭ اڭىزدارى» دەگەن اتپەن شىعارىلعان قازاق كوميكستەرىنىڭ جاڭا توپتاماسىنا قازاق اۋىز ادەبيەتىنىڭ وسىنداي تۋىندىلارى ەنىپتى. ۇيىمداستىرۋشىلار كوميكستەر جەلىسىمەن تۇسىرىلگەن كوركەم فوتوسۋرەتتەر كورمەسىن دە ۇسىندى. «جوبا ەلباسىنىڭ «ۇلى دالانىڭ جەتى قىرى» اتتى باعدارلامالىق ماقالاسىن ىسكە اسىرۋ اياسىندا قولعا الىنعان. بۇل جولعى توپتاماعا قازاق دالاسىنداعى جەتى ليرو- ەپوستىق جىر مەن باتىرلار تۋرالى اڭىزداردى وزەك ەتىپ الدىق. ونداعى ماقساتىمىز - قازاقتىڭ ءتول فولكلورىن جاس بۋىنعا زاماناۋي تاسىلدەرمەن مەڭگەرتۋ. مىسالى، «قوزى كورپەش - بايان سۇلۋ» ەپوسىنىڭ 89 بەتكە سوزىلاتىن نۇسقاسى بار. ونى قازىرگى بالالار وقىپ وتىرمايتىنى تۇسىنىكتى. سونى ءبىزدىڭ جاس اقىن- جازۋشىلار قىسقاشا مازمۇناپ، ەڭ نەگىزى تۇستارىنان ديالوگتار قۇراپ، كوميكسكە يكەمدەپ جازىپ شىعادى. سۋرەتشىلەر سونىڭ جەلىسىمەن كوميكس سالادى. ازىرگە كوميكس سسەناريىن دوسقان جىلقىبايەۆ دەگەن جىگىت جازىپ ءجۇر. ال سۋرەتتەرىن اۋەلدى مۇرات ءدىلمانوۆ سالىپ باستاعان. قازىر وعان ەكى جاس سۋرەتشى قوسىلدى»، - دەيدى نۇرسۇلتان نازاربايەۆ قورى جانىنداعى مەملەكەتتىك ءتىلدى دامىتۋ قورىنىڭ ديرەكتورى ازات شاۋەيەۆ.

سونداي- اق، ول ءبىر ەرتەگىنىڭ كوميكسى بىردەن ءۇش تىلدە بەرىلگەنىن ايتتى.

«ۇلى دالانى ۇلى ماحابباتى» دەگەن توپتامامەن قازاق فولكلورىندا كەڭ تاراعان جەتى عاشىقتىڭ جىرىن، «ۇلى دالانىڭ باتىرلارى» دەگەن توپتامامەن ەر توستىك پەن الپامىستان باستاپ، كەنەسارىمەن تۇيىندەلەتىن 7 باتىردى بەردىك.

باتىرلار توپتاماسىن بەرتىنگى باتىرلارعا دەيىن تۇگەل قامتىماقپىز. ودان كەيىن «ۇلى دالا حاندارى» جانە «ۇلى دالانىڭ ارۋلارى» دەگەن توپتامالاردى جوسپارلاپ وتىرمىز. وندا توميريس پەن زارينادان باستاپ ءاليا، مانشۇكتەرگە دەيىنگى تۇلعالار قامتىلادى»، - دەيدى مەملەكەتتىك ءتىلدى دامىتۋ قورىنىڭ ديرەكتورى.

كوميكستىڭ ەلەكتروندى نۇسقاسى ارنايى سايتتا تەگىن ۇسىنىلعانىمەن، ءۇش تىلدەگى جيناق كىتابى ساتىلىمعا شىعارىلادى.

«بۇگىن تۇساۋى كەسىلسە، ەرتەڭنەن باستاپ كىتاپ دۇكەندەرىنە تۇسەدى. شامامىز كەلگەنشە بالالار كىتاپحانالارىنا تاراتامىز. بۇل كوميكستەردىڭ كوبى قازاقستاننىڭ كيەلى جەرلەرىمەن بايلانىستى. ءبىر جاعىنان وسى كيەلى جەرلەردى ناسيحاتتاۋ ءۇشىن كوميكستەر جەلىسىمەن اياگوز، جۇمباقتاس، بالقاش سياقتى كيەلى ورىندارعا ارنايى بارىپ، كوركەم فوتوسۋرەتتەر ءتۇسىرىپ قايتتىق. جوبانى نۇرسۇلتان نازاربايەۆ قورى قارجىلاندىرىپ وتىر. الداعى توپتامالاردى وسى كوميكستەردى ساتۋدان تۇسكەن اقشامەن شىعارساق دەگەن وي بار. سوندىقتان دا كىتاپحانالارعا جاپپاي تەگىن تاراتا المايمىز. ءتىپتى قىزىققان ادام بولسا، Qazcomics.kz سايتىنا كىرىپ، تەگىن تاماشالاي الادى»، - دەيدى ازات شاۋەيەۆ.

ايتا كەتەيىك، شاراعا نۇرسۇلتان نازاربايەۆ قورىنىڭ ديرەكتورى داريعا نازاربايەۆا قاتىسىپ، شىعارماشىل قاۋىمدى قازاق كوميكسىن دامىتۋعا شاقىردى. داريعا نازاربايەۆا شىعارماشىل قاۋىمدى قازاق كوميكسىن دامىتۋعا شاقىردى.

اۆتور: ەسىمجان ناقتىباي