ۇيالى تەلەفون، ىشىك، التىن بۇيىمدار: استانالىق ينتەرنەت الاياقتار ادامداردى قالاي الدايدى

نۇر-سۇلتان. قازاقپارات - بۇگىندە ەلوردادا ينتەرنەت الاياقتىق قىلمىسى قىزىپ تۇر. اتالعان قىلمىس تۇرىمەن كۇرەسۋ ءۇشىن قالالىق پوليتسيا دەپارتامەنتى جانىنان مامانداندىرىلعان جەدەل تەرگەۋ توبى قۇرىلدى.

وسى ورايدا ينتەرنەت الاياقتار ەلوردا جۇرتىن قانداي ادىستەرمەن الدايتىنى تۋرالى نۇر-سۇلتان قالاسى پوليتسيا دەپارتامەنتىنىڭ كيبەرقىلمىسپەن كۇرەس ءبولىمىنىڭ باسشىسى تالعات بولەگەنوۆ ايتىپ بەردى، دەپ حابارلايدى قازاقپارات ءتىلشىسى.

«جالپى ينتەرنەت الاياقتىق قىلمىسىنىڭ 70 پايىزى ونلاين ساۋدامەن بايلانىستى. مىسالى، الاياق الەۋمەتتىك جەلىدە جالعان اككاۋنت اشادى نەمەسە ينتەرنەت رەسۋرستار ارقىلى جالعان حابارلاما بەرەدى. جالعان حابارلاماعا سەنىپ قالعان تۇتىنۋشىلار الاياقتىڭ قۇرىعىنا ءتۇسىپ جاتادى. تالداۋ كورسەتكەندەي، الاياقتار نەگىزىنەن ۇيالى تەلەفون ساتۋ جانە جوندەۋ، ايەلدەردىڭ ىشىك-تونى، التىننان جاسالعان بۇيىمدار مەن اۆتوموبيل قۇرال-سايماندارى ساتىلادى دەگەن جالعان حابارلاما بەرەدى. ودان بولەك، قالادا پاتەر نەمەسە عيماراتتى جالعا بەرۋ، جۇرگىزۋشى كۋالىگىن جاساپ بەرۋ بويىنشا الاياقتىق قىلمىس ءجيى ورىن الىپ جاتادى»، - دەدى تالعات بولەگەنوۆ ەلوردانىڭ پوليتسيا دەپارتامەنتىندە وتكەن باسپا ءسوز ءماسليحاتىندا.

سونداي-اق، ءبولىم باسشىسى ەلوردادا كريپتوۆاليۋتا بويىنشا دا الاياقتىقتىڭ ءورشىپ تۇرعانىن جەتكىزدى.

«الاياقتار ادامدارعا تىركەلمەگەن نومىردەن حابارلاسىپ، كريپتوۆاليۋتاعا ينۆەستيتسيا قۇيىپ جەڭىل تابىس تابۋدى ۇسىنادى. باسىندا از سوما ۇسىنادى، مىسالى 100 دوللار قۇيساڭىز، 200 دوللار تاباسىز دەپ اربايدى. سايكەسىنشە جەڭىل تابىستىڭ ءدامىن كورگەن ادام قۇنىعا باستايدى. ونىڭ سوڭى الاياقتىڭ ارباۋىنا تۇسۋمەن اياقتالادى. پاتەردى جالعان تۇردە جالعا بەرۋ بويىنشا دا سولاي. جۋىردا پاتەر جالعا بەرىلەدى دەگەن جالعان حابارلاما ارقىلى وڭاي اقشا تاپقان ەلوردا تۇرعىنى (ورال قالاسىنىڭ تۋماسى) ۇستالدى. ول بوگدە پاتەرلەردىڭ سۋرەتىن جاريالاۋ ارقىلى جالعان حابارلاما بەرىپ 65 ادامدى 6 ميلليوننان استام تەڭگەگە الداپ سوققان. بۇگىندە قىلمىسكەر ۇستالىپ، جاۋاپقا تارتىلدى»، - دەيدى ول.

ءسوز سوڭىندا دەپارتامەنت وكىلى ەلوردا تۇرعىندارىن ساق بولۋعا شاقىرىپ، جەكە دەرەكتەر مەن بانكتىك ەسەپشوتتارىن بوگدە كىسىگە بەرمەۋگە كەڭەس بەردى. بۇعان دەيىن حابارلاعانىمىزداي، ەلوردادا جىل باسىنان بەرى 3250 ينتەرنەت الاياقتىق قىلمىسى انىقتالىپ، ول بويىنشا 100 ادام ۇستالدى. ولار بارلىق سوماسى 150 ميلليون تەڭگەگە شىعىن كەلتىرگەن.

اۆتور: ءالي يبرايەۆ