تارازداعى اسكەري قويماداعى جارىلىس: يۋري يلين دەرەكتەرمەن ءبولىستى

None
None
نۇر- سۇلتان. قازاقپارات - جامبىل وبلىسى بايزاق اۋدانىنداعى اسكەري ءبولىمنىڭ وق- ءدارى قويماسىندا بولعان جارىلىستىڭ سەبەبى قازان ايىندا بەلگىلى بولادى.

بۇل تۋرالى «حابار» تەلەارناسىنىڭ «ۇلتتىق مۇددە» باعدارلاماسىنا سۇحبات بەرگەن ق ر توتەنشە جاعدايلار ءمينيسترى يۋري يلين ايتتى، دەپ حابارلايدى قازاقپارات ءتىلشىسى.

«تارازدا ورىن العان قايعىلى وقيعاعا بايلانىستى قازىرگى ۋاقىتتا تەرگەۋ ورگاندارى جۇمىسىن جالعاستىرىپ جاتىر. وتكەن اپتادا عانا مەملەكەت باسشىسىنىڭ تاپسىرماسىمەن جۇمىس ساپارىن جاساپ، قازا تاپقانداردىڭ وتباسىلارىنا وردەن تاپسىردىم. بۇگىندە جەكە قۇرامنان قازا تاپقانداردىڭ جالپى سانى - 10 ادام. سول جارىلىستىڭ سالدارىنان 49 مامانىمىز زارداپ شەكتى، ولاردىڭ ىشىندە ەكەۋىنە وتە كۇردەلى ەم- دوم قاجەت، ال قالعاندارى ءتۇرلى دەڭگەيدە جاراقات الدى. قورعانىس مينيسترلىگىنىڭ دە قىزمەتكەرلەرى قاتارىنان قازا تاپقاندار بار. قازىرگى ۋاقىتتا قورعانىس مينيسترلىگىنىڭ ءىز- ءتۇزسىز جوعالعان قىزمەتكەرىن قوسپاعاندا قازا تاپقاندار 17 ادامعا جەتىپ وتىر. ال جارىلىستىڭ نەدەن شىققانىن تەرگەۋ انىقتاي جاتار. قالاي دەسەك تە، بۇگىندە قولىمىزداعى اقپاراتقا سايكەس، تەرگەۋ ورگاندارى ءتۇرلى نۇسقالارعا قاتىستى جان- جاقتى جۇمىس ىستەپ جاتىر. بۇل وزدىگىنەن جانۋ، قاساقانا ورتەپ جىبەرۋ بولۋى مۇمكىن. سوندىقتان ۋاقىت تا، كۇتۋ دە قاجەت. تۋعان- تۋىستارى دا «قاۋىپ- قاتەر بولعان كەزدە نەگە جىبەردىڭىزدەر؟» دەپ سۇراپ جاتىر. «وفيتسەرلەر» دەگەن فيلمدە ايتىلعانداي، وتاندى قورعاۋ دەگەن ماماندىق بار ەكەندىگىن ەسكە سالامىن. بۇل ءبىزدىڭ ماماندىعىمىزعا دا قاتىستى. قۇتقارۋشىلار توتەنشە جاعدايدى كورگەن كەزدە وزدەرىنىڭ كاسىبي مىندەتتەرىن سوڭىنا دەيىن ورىنداۋى ءتيىس»، - دەدى مينيستر.

ۆەدومستۆو باسشىسىنىڭ اتاپ وتۋىنشە، بايزاق اۋدانىنداعى اسكەري وق- ءدارى قويماسىندا جارىلىس بولعان كەزدە وقيعا ورنىنا جەتكەن ءبىرىنشى ءورت ءسوندىرۋ بولىمشەسى نىسان باسشىلىعىنان قانداي تاۋەكەلدىڭ بار ەكەندىگىن سۇراعان. قويمادا تراتيل بار ەكەندىگى، وزگە جارىلعىش زاتتىڭ جوق ەكەندىگى ايتىلعان. سوندىقتان دا ءورت سوندىرۋشىلەر قىزىل جالىنمەن كۇرەسكە كىرىسكەن.

«تراتيل فيزيكالىق قاسيەتى جاعىنان تۇتاندىرعىشسىز جارىلمايدى. ول تەك جانىپ قانا كەتۋى ءتيىس. بەينەباقىلاۋ كامەرالاردان دا وسىنداي جايتتىڭ ورىن العانىن، اتالعان قويماداعى ءتراتيلدىڭ قاتتى جانعانىن بايقاۋعا بولادى. ءبىراق، تۇپتەپ كەلگەندە جارىلىس ورىن الدى. مەنىڭشە، قازان ايىندا جارىلىستىڭ قانداي دا ءبىر ناتيجەسى بەلگىلى بولادى»، - دەدى يۋري يلين.

ەستەرىڭىزگە سالا كەتسەك، 26-تامىزدا ساعات شامامەن 19:00 دە جامبىل وبلىسىنىڭ بايزاق اۋدانىندا ورنالاسقان اسكەري ءبولىم قويمالارىنىڭ بىرىنەن ءورت شىعىپ، جويقىن جارىلىس بولدى. بىرنەشە ادام قازا تاپتى. وقيعاعا بايلانىستى ق ر پرەزيدەنتى قاسىم- جومارت توقايەۆ 29-تامىزدى جالپى ۇلتتىق ازا تۇتۋ كۇنى دەپ جاريالادى.

سوڭعى جاڭالىقتار