بالالار اراسىندا وتەتىن «ايبىن» جيىنىنا بيىلدان باستاپ توعىزقۇمالاق ەنگىزىلدى

نۇر-سۇلتان. قازاقپارات - «جاس سارباز» جاس وسپىرىمدەر اسكەري-پاتريوتىق قوزعالىسى رەسپۋبليكالىق قوعامدىق بىرلەستىگىنىڭ ءتوراعاسى مەيىربەك مەندىعاليەۆ بيىل «ايبىن» ونلاين اسكەري-پاتريوتتىق جيىنىندا قانداي بايقاۋلار وتەتىنىن ايتتى، حابارلايدى قازاقپارات ءتىلشىسى.

ونىڭ ايتۋىنشا، سوڭعى 6 جىلدان بەرى وتكىزىلىپ كەلە جاتقان ءداستۇرلى بايقاۋلار مەن سايىستاردىڭ ءبارى وزگەرىسسىز قالعان. «ايبىن دارىنى» زياتكەرلىك ويىنى جالپى ءبىلىم بەرەتىن پاندەر مەن ءارتۇرلى سالاداعى اۋديو، ۆيدەو سۇراقتاردان تۇرادى. ءار كوماندا 1 قاتىسۋشىدان قاتىستىرادى.

«مەيىرىم بىرىكتىرەدى» سايىسىندا ءار كوماندا الەۋمەتتىك جەلىدە چەللەندجدى ىسكە قوسادى. ەڭ كوپ «لايك» جيناعان كوماندا جەڭىسكە جەتەدى.

«ايبىن جۇلدىزى» شىعارماشىلىق بايقاۋىندا تاۋەلسىزدىكتىڭ 30 جىلدىق مەرەيتويىنا ارنالعان شىعارماشىلىق بەينەبايان دايىنداۋ قاجەت. روبوت تەحنيكاسى بويىنشا «SMART SARBAZ» كونكۋرسى اياسىندا ءار كوماندا ءبىر جوبانى ۇسىنۋعا ءتيىس. ول ءۇشىن 5 مينۋتقا دەيىن ۋاقىت بەرىلەدى. ءموبيلدى قوسىمشانىڭ كامەراسىنا ءتۇسۋ ارقىلى ءوز جوبالارىن تورەشىلەر الدىندا قورعايدى»، - دەدى بىرلەستىك ءتوراعاسى ورتالىق كوممۋنيكاتسيالار قىزمەتىندە وتكەن بريفينگىدە.

سونداي-اق، ول سپورتتىق جانە اسكەري دايىندىق بويىنشا نورماتيۆ تاپسىرۋ بيىل دا بولاتىنىن ەسكەرتتى.

«نورماتيۆتەرگە كەرمەدە تارتىلۋ، شالقالاپ جاتىپ دەنەنى كوتەرۋ، ا ك-74 ءىشىنارا بولشەكتەۋ مەن جيناقتاۋ كىرەدى.

«سالاماتتى جاس سارباز» كونكۋرسىندا كوماندالاردىڭ العاشقى مەديتسينالىق كومەك كورسەتۋ قابىلەتتەرى تەكسەرىلەدى. بۇل كونكۋرس جاستاردىڭ اراسىندا مەديتسينالىق ۆولونتەرلىككە باۋلۋ ءۇشىن دە نازارعا الىندى. رۋحاني قۇندىلىقتاردىڭ وزەكتىلىگىن ارتتىرۋ ءۇشىن «توعىزقۇمالاق» ۇلتتىق ويىنى جيىن شەڭبەرىندە العاشقى رەت وتكىزىلەتىن بولادى. جاستاردىڭ ويلانۋ قابىلەتىن دامىتۋعا ىقپال ەتەتىن جاڭا بايقاۋ قاتىسۋشىلار اراسىندا ۇلكەن سۇرانىسقا يە بولاتىنىنا سەنىمدىمىز»، - دەدى مەيىربەك مەندىعاليەۆ.