قاسىم-جومارت توقايەۆ ساۋد ارابياسىنىڭ ينۆەستيتسيا ءمينيسترىن قابىلدادى
بۇل تۋرالى قازاقپارات اقورداعا سىلتەمە جاساپ حابارلايدى.
مەملەكەت باسشىسى قازاقستانعا 30 جىلدان بەرى كورسەتىپ كەلە جاتقان قولداۋى ءۇشىن ساۋد ارابياسىنا ريزاشىلىعىن ءبىلدىردى.
- ەلدەرىمىز اراسىنداعى ىنتىماقتاستىقتى ىلگەرىلەتۋ جانە ونىڭ ءمانىن تەرەڭدەتە ءتۇسۋ ءۇشىن كوپتەگەن مۇمكىندىك بار ەكەنىنە سەنىمدىمىز. وسى ورايدا، تاق مۇراگەرىمەن تەلەفون ارقىلى اڭگىمەلەسۋ كەزىندە بولاشاقتا قولعا الىناتىن ءبىرقاتار جوبانى تالقىلادىق. ءوزارا ءىس-قيمىلدارىمىز تەرەڭدەي تۇسەدى. ەلىمىزگە جاساعان ساپارىڭىزعا ريزاشىلىعىمىزدى بىلدىرەمىز. ءسىزدىڭ قولداۋىڭىزبەن جانە مەنىڭ اكىمشىلىگىمنىڭ جۇمىس جۇرگىزۋىمەن ەكىجاقتى بايلانىستارىمىزدى شىنايى ىلگەرىلەتەمىز دەپ ويلايمىن، - دەدى قازاقستان پرەزيدەنتى.
ءوز كەزەگىندە حاليد ءال-فاليح قاسىم-جومارت توقايەۆقا قابىلداعانى ءۇشىن العىس ءبىلدىرىپ، ساۋد ارابياسىنىڭ كورولى سالمان بەن ابدەل ءازيز ءال ساۋدتىڭ جانە كورولدىكتىڭ تاق مۇراگەرىنىڭ سالەمدەرىن جەتكىزدى.
- ولار قازاقستانعا ودان ءارى وركەندەۋ مەن يگىلىك جولىندا قولداۋ كورسەتۋدى جالعاستىرا بەرەتىندەرىن ناقتىلادى. قازاقستاننىڭ جۇرگىزىپ وتىرعان رەفورمالارى مەن ورتالىق ازياداعى كوشباسشىلىعىن، سونىمەن قاتار 30 جىل بۇرىن تاڭداعان بىرەگەي جولىن جوعارى باعالايدى. وسى ۋاقىت ارالىعىندا قازاقستاننىڭ تۇڭعىش پرەزيدەنتى نەگىزىن قالاعان سىندارلى ساياسات ءوزىڭىزدىڭ پاراساتتى باسشىلىعىڭىزبەن جالعاسىپ كەلەدى، - دەپ اتاپ ءوتتى ساۋد ارابياسىنىڭ ءمينيسترى.
