قازاقستاندى ب ا ق ءۇشىن جاڭا ۇعىم ەنگىزىلەدى

نۇر-سۇلتان. قازاقپارات - قازاقستاندا بۇقارالىق اقپارات قۇرالدارى ءۇشىن جاڭا ۇعىم ەنگىزىلەدى. بۇل تۋرالى ق ر اقپارات جانە قوعامدىق دامۋ ۆيتسە-ءمينيسترى كەمەلبەك ويشىبايەۆ ايتتى، دەپ حابارلايدى قازاقپارات ءتىلشىسى.

«جاڭا تەحنولوگيالاردىڭ دامۋىنا بايلانىستى ب ا ق-تى زاڭنامالىق دامىتۋ ماسەلەسىن پىسىقتاپ جاتىرمىز. اتاپ ايتار بولساق، زاڭعا وزگەرتۋلەر ەنگىزۋدى جوسپارلاپ وتىرمىز. ونى جۋرناليستەر قوعامداستىعىمەن تالقىلايمىز جانە ول 2023 -جىلى قابىلدانۋى مۇمكىن»، - دەدى ول «Astana Media Week - 2021» مەديا اپتالىعى اياسىنداعى «مەديانى دامىتۋ ستراتەگياسى» اتتى دوڭگەلەك ۇستەل بارىسىندا.

ونىڭ اتاپ وتۋىنشە، بۇقارالىق اقپارات قۇرالدارى ءۇشىن جاڭا ۇعىم ەنگىزىلەتىن بولادى.

«جاڭا مەدياعا انىقتاما بەرەمىز. بۇل - ينتەرنەتتەگى بارلىق جاڭا پلاتفورمالار، دامۋشى اقپاراتتار. وعان ىزدەۋ جۇيەسىن، و ت ت پلاتفورماسى مەن الەۋمەتتىك جەلىلەردى جاتقىزامىز. قازاقستانداعى جۇمىس ەرەجەسىن بەكىتەمىز. مەديا- ولشەم پروتسەدۋراسى زاڭنامالىق تۇرعىدا ەنگىزىلەدى. ءبىز ءۇشىن قازاقستاندا مەديا- ولشەم جاڭا تەحنولوگيالاردى قولدانۋمەن بولعانى جانە حالىقتى 100 پايىز قامتىعانى ماڭىزدى. بۇل بارلىق قازاقستاندىقتىڭ قانداي مەديانى ۇناتاتىندىعى تۇسىنىكتى بولۋى ءۇشىن قاجەت»، - دەدى كەمەلبەك ويشىبايەۆ.

اۆتور: مارلان جيەمباي