قۇلدىققا تاپ بولماۋ ءۇشىن نە ىستەۋ كەرەك

نۇر-سۇلتان. قازاقپارات - ىشكى ىستەر مينيسترلىگىنىڭ اقپارات الاڭىندا كريمينالدىق پوليتسيا دەپارتامەنتى باستىعىنىڭ ورىنباسارى قانات نۇرماعامبەتوۆ قۇلدىققا تۇسپەۋدىڭ ساقتىق شارالارى مەن ودان قۇتىلۋدىڭ امالدارى تۋرالى كەڭەس بەردى، حابارلايدى قازاقپارات ءتىلشىسى.

«ءسوز سوڭىندا قۇلدىققا تۇسپەۋ ءۇشىن قانداي ساقتىق شارالارى كەرەك ەكەنىن ايتقىم كەلەدى. جەڭىل تابىس تابۋعا بولاتىنى تۋرالى كۇماندى ۇسىنىستارعا الدانباڭىز. ەشكىمگە جەكە باسىڭىزدى كۋالاندىراتىن قۇجاتتاردى بەرمەڭىز. وزگە ەلگە نەمەسە قالاعا شىعار كەزدە جاقىندارىڭىز بەن تۋعان- تۋىسقاندارىڭىزعا قايدا بارا جاتقانىڭىزدى ايتىپ، ىقتيمال مەكەنجايىڭىزدى، بايلانىس دەرەكتەرىن بەرىپ كەتىڭىز»، - دەدى ول ۆەدومستۆونىڭ اقپارات الاڭىندا وتكەن ونلاين بريفينگىدە. سونداي- اق، پوليتسيا وكىلى قوعامدى دا بۇل ىسكە بەي-جاي قاراماۋعا ۇندەدى.

«ونداي زاڭ بۇزۋ فاكتىلەرى تۋرالى بىلسەڭىزدەر نەمەسە كۋاسى بولساڭىزدار، ارەكەتسىز قالماۋلارىڭىزدى سۇرايمىز. كىمدە- كىم مۇنداي جاعدايعا تاپ كەلگەن بولسا، دەرەۋ جاقىن جەردەگى پوليتسيا بولىمىنە حابارلاسۋ كەرەك. «102» نومىرىنە نەمەسە «1616» سەنىم تەلەفونىنا حابارلاسسىن. ءار وڭىردە پوليتسيامەن بىرگە ۇكىمەتتىك ەمەس ۇيىمدار دا وسى باعىتتا جۇمىس ىستەيدى. ولار دا ادام ساۋداسىنىڭ قۇرباندارىنا كومەك كورسەتۋگە دايىن»، - دەدى قانات نۇرماعامبەتوۆ.

اۆتور: ەسىمجان ناقتىباي