اقتاۋداعى كوپقاباتتى ۇيلەردىڭ بىرىندە ليفت قۇلادى - ۆيدەو

اقتاۋ. قازاقپارات - اقتاۋداعى كوپقاباتتى ۇيلەردىڭ بىرىندە ىشىندە ادامدارى بار ليفت شاحتاعا ءتۇسىپ كەتتى، دەپ حابارلايدى قازاقپارات ءتىلشىسى.

وقيعا 17-شاعىن اۋدانداعى «Aktau Plaza» تۇرعىن ءۇي كەشەنىندە بولعان. تۇرعىنداردىڭ ايتۋىنشا، 25-قىركۇيەك كۇنى كەشكى ساعات 19:30-دا بولعان. ىشىندە ادامدارى بار ليفت شاحتاعا قۇلاعان. ەشكىم زارداپ شەككەن جوق. تۇرعىندار ءبىر-بىرىنە كومەكتەسىپ، شاحتادان شىققان. تۇرعىنداردىڭ ايتۋىنشا، بۇل جاعداي ورىن العاندا ليفتىدە كىشكەنتاي بالالار، جاس انالار بولعان. ولار ليفتىنىڭ ىستەن شىعۋى ءبىرىنشى رەت ەمەس دەپ شاعىمداندى.

قۇرىلىستى سالعان كومپانيا ليفتىنىڭ دۇرىس جۇمىس ىستەمەي تۇرعانىنان حاباردار. ءبىراق سوعان قاراماستان ەشقانداي شارا قولدانباي وتىر. سونداي-اق، جاڭادان سالىنعان ۇيگە ءبىر جىل بۇرىن تۇرعىندار قونىستانا باستاعان. ءبىراق ولار ءالى كۇنگە دەيىن پاتەردىڭ قۇجاتىن الا الماي وتىر. بۇدان بولەك، تۇرعىن ءۇي ءالى كۇنگە كوگىلدىر وتىنعا قوسىلماعان.

اۆتور: قاراكوز مارات