+7 (701) 759 90 19
USD 426.32 EUR 496.24
RUB 6.04 CNY 66.74
جاڭالىقتار

الەمدى اۋزىنا قاراتقان ءالىم لوندونداعى بايقاۋدا باس جۇلدەنى الدى

27 قىركۇيەك 10:04
:ءبولىسۋ
الەمدى اۋزىنا قاراتقان ءالىم لوندونداعى بايقاۋدا باس جۇلدەنى الدى

لوندون. قازاقپارات - قازاقستاندىق مۋزىكانت انگليانىڭ ليدس قالاسىندا وتكەن بەدەلدى بايقاۋدا باس جۇلدە جەڭىپ الدى.

23 جاستاعى پيانيست ءالىم بەيسەمبايەۆ ءۇش جىلدا ءبىر رەت ۇيىمداستىرىلاتىن جانە تالاي تالانتتارعا قانات بىتىرگەن حالىقارالىق ونەر دوداسىندا التىن مەدال قانجىعالادى، دەپ حابارلايدى قازاقپارات ءتىلشىسى.

ءالىم الەمنىڭ تۇكپىر- تۇكپىرىنەن كەلگەن پيانيستەردى شاڭ قاپتىرىپ، جاپونيالىق ونەرپاز ەكىنشى، يزرايلدىك - ءۇشىنشى ورىندى مىسە تۇتتى. باس جۇلدە فانني ۋوتەرمان اتىنداعى التىن مەدال. ۋوتەرمان - 20 جىلدىق تاريحى بار بايقاۋدىڭ نەگىزىن قالاۋشى الەمگە ايگىلى پيانيست. وتكەن جىلى 100 جاسقا كەلىپ، قايتىس بولعان. مەدالدان بولەك ءالىم 25 مىڭ ستەرلينگ فۋنتى كولەمىندەگى اقشالاي سىيلىققا يە بولدى جانە ەڭ باستىسى Warner Classics مۋزىكالىق لەيبلىمەن كەلىسىم- شارتقا وتىردى. ەۋروپا بويىنشا تۋرعا شىعۋ مۇمكىندىگى تاعى بار.

«بىزگە شامامەن كەمىندە 300-350 مينۋتتاي رەپەرتۋارمەن قاتىسۋ كەرەك بولدى. ورىندالاتىن شىعارمالاردىڭ كولەمى كوپ بولعاندىقتان وتە قيىن بايقاۋلاردىڭ ءبىرى سانالادى. جەڭىسىمنەن كەيىن ۋورنەر كلاسسيكس لەيبلى كۇنى كەشە مەنىڭ جەكە البومىمدى باسىپ شىعاردى. ونى ەپپل ميۋزيك جانە سپوتيفاي قوسىمشالارى ارقىلى تىڭداۋعا بولادى»، دەيدى ءالىم بەيسەمبايەۆ.

ءالىم فورتەپيانودا 5 جاسىنان وينايدى. كۇلاش بايسەيىتوۆا اتىنداعى مۋزىكالىق مەكتەپتە، ءجانيا اۋباكىروۆا مەكتەبىندە جانە ماسكەۋدەگى چايكوۆسكيي اتىنداعى كونسەرۆاتوريا جانىنداعى مەكتەپتە وقىعان. 12 جاسىنان باستاپ، انگلياداعى جاس مۋزىكانتتارعا ارنالعان پەرسەللا مەكتەبىندە، 18 جاسىنان باستاپ، مۋزىكانىڭ كورولدىك اكادەمياسىندا اتاقتى پەداگوگ تەسسا نيكولسوننىڭ قولىندا تەگىن ءبىلىم العان.

«اتا- انامنىڭ ەشقايسىسىنىڭ ونەرگە قاتىسى جوق. مەن ۇيدەگى جالعىز مۋزىكانتپىن. ول كىسىلەردىڭ ايتۋىنشا، كىشكەنتاي كەزىمدە دۇكەنگە بارعانىمدا شاعىن ويىنشىق پيانينو تاڭداپ الىپپىن. سودان بەرى فورتەپيانو مەنىڭ ومىرلىك سەرىگىمە اينالدى»، دەيدى جەڭىمپاز.

ءالىم قازىر لوندونداعى كورولدىك مۋزىكالىق كوللەدجدە ماگيستراتۋرادا وقيدى. قازاقستاندىق ونەرپازعا دەگەن سۇرانىس وتە جوعارى. ءىرى كونسەرتتەر بەرىپ، ەۋروپالىق كورەرمەننىڭ ىستىق ىقىلاسىنا بولەنىپ ءجۇر. ول تۋرالى شەتەلدىك باسىلىمدار دا جارىسىپ جازىپ جاتىر. ءالىم الەمدىك تۋرعا شىققان ۋاقىتىندا تۋعان جەرىندە دە ونەر كورسەتۋدى ارماندايدى.



:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر

مۇراعات