+7 (701) 759 90 19
USD 426.32 EUR 496.24
RUB 6.04 CNY 66.74
جاڭالىقتار

ەلوردا ماڭىندا اتپەن سەرۋەندەۋگە ارنالعان سوقپاق جول سالىندى

26 قىركۇيەك 12:32
:ءبولىسۋ
ەلوردا ماڭىندا اتپەن سەرۋەندەۋگە ارنالعان سوقپاق جول سالىندى

نۇر-سۇلتان. قازاقپارات - نۇر-سۇلتان ماڭىنداعى جاسىل بەلدەۋ اۋماعىندا ات سپورتى كەشەنىنىڭ قۇرىلىسى اياقتالدى.

قازاقپارات بۇل تۋرالى ەلوردا سايتىنا سىلتەمە جاساپ حابارلايدى.

ەندى جۇرتشىلىق شاھار ماڭىنداعى جاسىل بەلدەۋدى اتپەن ارالاي الادى. ورمان اۋماعىندا قالا اكىمدىگىنىڭ باستاماسىمەن جالپى ۇزىندىعى 13,2 شاقىرىم بولاتىن اتپەن جۇرۋگە ارنالعان سوقپاق جول پايدالانۋعا بەرىلدى. جاسىل بەلدەۋدە اتپەن سەرۋەندەگىسى كەلگەندەر ارنايى ورىنعا كەلىپ، بەلگىلى ءبىر ۋاقىت ارالىعىنا جىلقىنى جالعا الۋى كەرەك.

مۇندا ولارعا اتپەن سەرۋەندەۋگە ارنالعان قورعانىش كيىمدەرى بەرىلىپ، قاۋىپسىزدىك ەرەجەلەرى تۇسىندىرىلەدى.

«اتپەن جۇرۋگە ارنالعان سوقپاقتا قالا تۇرعىندارى مەن قوناقتارىنىڭ قاۋىپسىز دەمالىسى ءۇشىن بارلىق جاعداي قاراستىرىلعان. اتاپ ايتساق، نىسان اۋماعىندا 5 دەمالىس ايماعى، اۆتوتۇراق، مودۋلدىك اجەتحانالار بار. بەينەباقىلاۋ كامەرالارى دا ورناتىلعان. سوقپاقتا اتپەن سەرۋەندەۋ قىزمەتى جىل ون ەكى اي كورسەتىلەدى. اتتاردى كۇتىپ-باپتاۋ، كەلۋشىلەرگە قىزمەت كورسەتۋ باعىتىندا 15 جاڭا جۇمىس ورنى اشىلدى. مۇندا كەلۋشىلەرگە تابيعات اياسىندا تازا اۋادا اتپەن سەرۋەندەۋمەن بىرگە اتقا ءمىنۋدى ۇيرەتۋ قىزمەتى دە ۇسىنىلادى. جاقىندا الەۋمەتتىك جوبا اياسىندا دەنساۋلىعىندا اقاۋى بار جاندار ءۇشىن يپپوتەراپيا قىزمەتى ىسكە قوسىلماق»، - دەيدى نۇر-سۇلتان قالاسى اكىمدىگىنىڭ قورشاعان ورتانى قورعاۋ جانە تابيعاتتى پايدالانۋ باسقارماسىنىڭ ءبولىم باسشىسى قىدىر جيەنالى.

سەرۋەندەۋگە ارنالعان اتتار اۋىل شارۋاشىلىعى كووپەراتيۆتەرى ءبىرىنىڭ مەنشىگى. كووپەراتيۆ ءتوراعاسى مۇرات قاسىموۆ تا تۋريستەرگە ەرەكشە قىزمەت ءتۇرىن ۇسىنۋ جوسپارىمەن ءبولىستى.

«قازىر مۇندا 15 ات بار. ولاردىڭ قاتارىن يپپوتەراپياعا ارنالعان جىلقىلارمەن تولىقتىرۋدى جوسپارلاپ وتىرمىز. سونىمەن قاتار بالالارعا ارناپ پونيلەردى اكەلەمىز. اتتاردىڭ مىنەزى ءارقيلى. سايكەسىنشە كەلۋشىلەردىڭ اراسىندا دا بۇرىننان اتقا ءمىنىپ جۇرگەندەر نەمەسە ەندى ۇيرەنگىسى كەلەتىندەر دە تابىلىپ جاتادى. ولار ارنايى نۇسقاۋشىنىڭ كومەگىمەن اتقا ءمىنۋدى ۇيرەنىپ شىعادى. سونداي-اق جاز ايلارىندا ارباعا، قىستا شاناعا جەگۋگە ارنالعان اتتار دا بار. ءبىر سوزبەن ايتقاندا، كەز كەلگەن تالعامداعى تۇتۋشىنىڭ كوڭىلىنەن شىعۋعا بارىمىزدى سالامىز. اتپەن سەرۋەندەۋدەن بولەك قوعامدىق تاماقتانۋ ورنى، قىمىزحانا دا اشامىز»، - دەيدى كووپەراتيۆ ءتوراعاسى.

ەلوردانىڭ جاسىل بەلدەۋى ەلىمىزدىڭ تۇڭعىش پرەزيدەنتى نۇرسۇلتان نازاربايەۆتىڭ شەشىمىمەن 1997-جىلى قالانى جەلدەن قورعاۋ جانە حالىقتىڭ ءومىر ءسۇرۋى ءۇشىن قولايلى كليمات قالىپتاستىرۋ ماقساتىندا قۇرىلدى.

ءبىر سوزبەن ايتقاندا، جاسىل بەلدەۋ اۋماعى تابيعات اياسىندا ەلوردا ماڭىندا ات ۇستىندە دەمالىس وتكىزگىسى كەلەتىندەر ءۇشىن تاپتىرماس ورىن بولادى.

ايتا كەتەيىك، «تۋريستىك مارشرۋت» دەپ اتالاتىن جاڭا نىسان (جاسىل بەلدەۋ اۋماعىنداعى اتپەن جۇرۋگە ارنالعان سوقپاق جول) ورنالاسقان جاسىل بەلدەۋ - قالا قالقانى.

ونىڭ اۋماعىندا 12,1 ميلليوننان استام اعاش پەن بۇتا وسەدى. سول سياقتى مۇندا قويان، تۇلكى، قارساق، كەكىلىك، قىرعاۋىل جانە ت. ب. تىرشىلىك ەتەدى.

قالانىڭ كليماتى تىم كونتينەنتتى ەكەنىن ەسكەرسەك، «جاسىل بەلدەۋ» ەكولوگيانى ايتارلىقتاي جاقسارتىپ قانا قويماي، كليماتتىق جاعدايدى جۇمسارتۋعا مۇمكىندىك بەرەدى.


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر

مۇراعات