ەلوردادا اقىن، جازۋشىلار مۇقاعالي ماقاتايەۆ تۋرالى ەستەلىكتەرمەن ءبولىستى

نۇر- سۇلتان. قازاقپارات - ەلىمىزگە بەلگىلى اقىن، جازۋشىلار ەلوردادا باس قوسىپ، قازاق اقىنى مۇقاعالي ماقاتايەۆتى ەسكە الىپ، اقىنمەن كەزدەسكەن ساتتەردەن ەستەلىك اڭگىمەلەر ايتىپ بەردى، دەپ حابارلايدى قازاقپارات ءتىلشىسى.

«بۇگىندە مۇقاعاليدىڭ كوزىن كورىپ، ارالاسقان ادامداردىڭ قاراسى ازايىپ كەلە جاتىر. اقىندى كورىپ، ءبىلىپ، ارالاسقان ادامداردىڭ ءبىرى - ءبىز. مۇقاعالي كەزدەسكەن ساتتە اڭقىلداپ اڭگىمەسىن ايتىپ جۇرەتىن اقجارقىن جان ەدى. ول كەزدە مەن قازىرگى قازۇۋ- دە وقىتۋشىمىن. ءبىر كۇنى تالاپكەرلەردەن وقۋعا ءتۇسۋ ەمتيحانىن قابىلداپ جاتىپ، تەرەزەدەن قاراپ قالسام، بالالارىن قولداپ كەلگەن اتا- انالاردىڭ قاتارىندا مۇقاڭ دا وتىر. سويتسەم، ونىڭ دا بالاسى وقۋعا تۇسۋگە ەمتيحان تاپسىرىپ جاتىر ەكەن. استىنا گازەت ءتوسىپ العان، اعاشتىڭ كولەڭكەسىندە كوپشىلىكپەن بىرگە وتىر ەكەن. بايقاپ قالىپ، دەرەۋ سىرتقا شىقتىم، ايتپاعىم ۇلىلار قاراپايىم بولادى دەگەن وسى شىعار»، - دەدى كورنەكتى قوعام قايراتكەرى، عالىم مىرزاتاي جولداسبەكوۆ.

مەملەكەت قايراتكەرىنىڭ ايتۋىنشا، مۇقاعالي ماقاتايەۆ وتە قاراپايىم كىسى بولعان.

«ءبىر كۇنى شونا سماحان ۇلى اعامىزعا سالەم بەرەيىن دەپ جازۋشىلار وداعىنا كەلدىم. ول كەزدە اعامىز وداقتىڭ پوەزيا ءبولىمىن باسقاراتىن ەدى. سول ءبولىمنىڭ الدىندا مۇقاعاليدى كورىپ قالدىم، قولىندا ءبيتتىڭ قابىعىنداي كىتاپشاسى بار، وتكەن- كەتكەنگە تىڭداشى دەپ كىتابىنان ءۇزىندى وقىپ بەرگىسى كەلىپتى، ءبىراق وعان توقتاپ جاتقان ەشكىم جوق. مەن قاسىنا كەلىپ ەم، مىرزاش سەن تىڭداشى دەپ دەپ ماعان وقىپ بەردى. سول ءالى ەسىمدە «كوگەرشىندەر» دەگەن ولەڭىن وقىپ بەردى. وسىدان تۇيەتىن وي، ادامنىڭ بارىندا قادىرى جوق دەپ بەكەر ايتىلماعان»، - دەيدى ول.

سونداي- اق، اقىن تۋرالى جىلى لەبىزىمەن جازۋشى، دراماتۋرگ ءارى اقىن اقۇشتاپ باقتىگەرەيەۆا دا ءبولىستى.

«مۇقاعالي اعامىزدىڭ كوزىن كورگەندەر ازايىپ كەلەدى دەدى مىرزاتاي ۇلكەنىمىز. سونىڭ ءبىرى مەن ەدىم، قولىما قالام العالى جازۋشىلار وداعىنا بارىپ ءجۇرىپ سول كەزدەگى الىپتاردىڭ ءبارىن كوردىم دەسەم دە بولادى. سونىڭ ءبىرى وكىنىشكە قاراي، مۇحتار اۋەزوۆتى ءبىراق رەت كورۋ بۇيىردى. ال مۇقاعاليعا كەلسەك، مەن اعاممەن سول كەزدەگى جۇلدىز جۋرنالىندا ارىپتەس بولدىم، ول 1971-1972 -جىلدار ەدى. كوزبەن كورگەننەن كەيىن مۇقاعالي تۋرالى كوپ نارسە ايتۋعا بولادى. ءبىراق مەن مۇقاڭمەن العاش تانىسقان ءساتتى ەسكە ءتۇسىرىپ، اڭگىمەلەگەننەن گورى ولەڭمەن جەتكىزسەم دەيمىن»، - دەدى ا. باقتىگەرەيەۆا.

جانە اقىن م. ماقاتايەۆقا ارنالعان جاڭا ولەڭىن جينالعان قاۋىمعا وقىپ بەردى.

«ءبىزدىڭ وتباسىمىز مۇقاعاليمەن اسا جاقىن ارالاستى، ونىڭ جاقسى جاعىندا، ومىردەگى قيىندىققا ۇشىراعان ساتتەرىندە بىلەمىز. ءابىش كەكىلبايەۆ، اسقار سۇلەيمەنوۆ مەن ءبارىمىز مۇقاعاليدىڭ ۇيىنە قوناققا ءجيى باراتىنبىز، نە ءۇشىن بارا بەرەتىنىمىزدى بىلمەيمىن. لاشىن ەتىن اسىپ كۇتىپ الاتىن ءبىزدى، ارينە ول كەزدە جاسپىز. ولار 4 بولمەلى ۇيدە تۇراتىن. ونىڭ 2 بولمەسىندە مۇقاعالي ايەلى جانە 4 بالاسىمەن تۇرسا، قالعان 2 بولمەسىندە تايىر جاروكتىڭ بالاسى تۇرىپ جاتتى. ۇيىنە بارعاندا بىزگە جاڭا شىعارعان ولەڭدەرىن وقىپ بەرەتىن»، - دەگەن ەستىلىگىمەن ءبولىستى بەلگىلى اقىن التىنشاش جاعانوۆا.

ايتا كەتسەك، بۇگىن ەلورداداعى ۇلتتىق مۋزەيدە ەل تاۋەلسىزدىگىنىڭ 30 جىلدىعى مەن قازاق پوەزياسىنىڭ كلاسسيگى مۇقاعالي ماقاتايەۆاتىڭ 90 جىلدىعىنا ارنالعان «پوەزيا الىبى - مۇقاعالي ماقاتايەۆ» اتتى دوڭگەلەك ۇستەل ءوتتى. اتالعان جيىندى ق ر مادەنيەت جانە سپورت مينيسترلىگى قولداپ، ق ر ۇلتتىق اكادەميالىق كىتاپحاناسى، ق ر ۇلتتىق مۋزەيى جانە نۇر- سۇلتان قالاسىنىڭ مادەنيەت باسقارماسىنىڭ ۇيىمداستىرۋىمەن ءوتتى. شاراعا ەلىمىزگە بەلگىلى اقىن- جازۋشىلار مەن قوعام قايراتكەرلەرى قاتىستى.

اۆتور: ءالي يبرايەۆ