تالىپتەر راديوجۇرگىزۋشىلەرگە ايەلدەرمەن سويلەسۋگە تىيىم سالدى

نۇر- سۇلتان. قازاقپارات - اۋعانستاندا راديوجۇرگىزۋشىلەرگە قىز- كەلىنشەكتەرمەن سويلەسۋگە تىيىم سالىندى. تىكەلەي ەفيردە جۇمىس ىستەيتىن تىلشىلەرگە تالىپتەر وسىنداي تالاپ قويدى، دەپ حابارلايدى «حابار 24».

ەفير بارىسىندا راديوجۇرگىزۋشىلەرگە ايەلدەرمەن سويلەسۋگە رۇقسات جوق. اۋعانستاننىڭ حوست پروۆينتسياسىنداعى راديوستانسياسىندا وسىنداي ەرەجە قابىلداندى. ايتا كەتەيىك، بۇعان دەيىن تالىپتەر ءدال وسى بۇقارالىق اقپارات قۇرالىنىڭ باسشىلىعىنا ءان قويۋعا تىيىم سالعان ەدى. ءوز كەزەگىندە راديو قىزمەتكەرلەرى مۇنداي ءتارتىپ ءتۇبى ءبىزدى قۇردىمعا اكەلەدى دەپ شاعىمدانۋدا.

ايوب يااد، Hawa Radio وكىلى:

- سوڭعى 20 جىلدا بۇقارالىق اقپارات قۇرالدارى ۇلكەن جەتىستىككە جەتكەن ەدى. الايدا بيلىككە تالىپتەر كەلگەلى ءتۇرلى شەكتەۋلەر ەنگىزىلىپ، قيىندىقتار تۋىپ جاتىر. مەنىڭشە، شەكتەۋدىڭ ورنىنا، تاليبان اقپارات قۇرالدارىن كوپتەپ اشۋلارى كەرەك.