اكىم ايەلدىڭ العاشقى اڭگىمەسى
باعدارلامادا گۇلشارا حانىمنىڭ ساياسي ومىرىنەن بولەك، بالالىق شاعى، وتباسى تۋرالى تولىعىراق ايتىلادى. ساياساتتاعى سۇلۋلىق تاقىرىبىندا باستالعان سۇحبات، تۋعان جەر، وتباسى، اۋىل ءومىرى تۋرالى ويلارعا كوشتى.
ءتۇسىرىلىم توبىنىڭ ايتۋىنشا اكىمنىڭ ۋاقىتىنىڭ تىعىز بولعانى سونشا، سۇحبات جازىپ ۇلگەرە الماي ءجۇردى. ولار وبلىس اۋماعىندا ورنالاسقان بىرنەشە نىساندى اشۋ بارىسىندا اكىمنىڭ ەرەكشە قاسيەتىن بايقاعان. اينۇر وماردىڭ سوزىنشە، گۇلشارا ءابدىقالىقوۆا كەشىككەندى ۇناتپايدى.
«مەن ونى ەلباسىنان ۇيرەندىم. ءبىراز جىل ەلباسىنىڭ قاسىندا ىستەدىك. مينيسترلىكتە ىستەگەندە ءىس- شارالار بولىپ تۇراتىن. سوندا ەشقاشان ءبىر- ەكى مينۋت كەشىگۋ بولمايتىن. اقوردادا دا، اسسامبلەيانىڭ جينالىستارى، اۋدان- اۋىلدارداعى جينالىستار دا ءدال ۋاقىتىندا باستالاتىن»، - دەيدى باعدارلاما كەيىپكەرى گۇلشارا ءابدىقالىقوۆا.
گۇلشارا ءابدىقالىقوۆا سۇحباتتا وبلىسقا اكىم بولۋ تۋرالى ۇسىنىستى قالاي قابىلداعانىن ايتىپ بەردى. «كەز كەلگەن جوعارى لاۋازىمعا ۇسىنعاندا ويلاناسىڭ، بۇنى قالاي ىستەۋگە بولادى، قيىنشىلىعىن دا بىلەسىڭ. ەندى بۇل جەردە قورقىنىش ارينە بولدى. ءبىر جاعىنان قيىن كەزەڭگە تاپ بولدىق. مەن وسى لاۋازىمعا كەلگەن ۋاقىت - توتەنشە جاعداي جاريالانىپ، پاندەميانىڭ ناعىز باستالعان كەزى. ءبىراق جۇمىلا كوتەرگەن جۇك جەڭىل دەيدى عوي. ارىپتەستەرمەن، حالىق بولىپ، ەل بولىپ… تۋعان جەرىمە سەندىم. تۋعان جەر ءوزى قولدايدى عوي… وسى جەردەگى ەل، حالىق رۋح بەردى»، - دەيدى ايەل اكىم.
گۇلشارا ءابدىقالىقوۆا اتا-اناسى تۋرالى دا سىرىن اقتاردى. باعدارلاما بارىسىندا اكەسى تۋرالى ايتقاندا اكىمنىڭ كوڭىلى بوساعان. «اكەم سوعىسقا قاتىسقان، ارداگەر، كوپ جارالانعان. كەيىن 50 جىل ورمان شارۋاشىلىعىندا جۇمىس ىستەدى. قازىر و دۇنيەلىك بولىپ كەتتى. وتە سىپايى، مادەنيەتى جوعارى كىسى ەدى. ءبىزدى كىتاپ وقۋعا، جان-جاقتى بولۋعا ۇيرەتكەن. اكەمىزدىڭ بەرگەن تاربيەسى وتە زور. ال انام قازىر مەنىڭ جانىمدا، كوپ كومەكتەسەدى. ول كىسى دە بالا تاربيەسىنە كوپ ءمان بەردى. انام وتە مەيىرىمدى ءبىر جاعىنان وتە تالاپشىل. مەنىڭ رۋحاني قولداۋشىم»، - دەدى ول.