قارجى ءمينيسترى بيۋجەتتىڭ كىرىسىن قالاي ارتتىراتىنىن ايتتى

نۇر-سۇلتان. قازاقپارات - ق ر قارجى ءمينيسترى ەرۇلان جاماۋبايەۆ ۇكىمەت ۇيىندە وتكەن بريفينگىدە بيۋجەتتىڭ كىرىسىن قالاي ارتتىرۋعا بولاتىنىن ايتتى، دەپ حابارلايدى قازاقپارات ءتىلشىسى.

«قازىر قارجى مينيسترلىگىنىڭ پىسىقتاۋىندا 5 پيلوتتىق جوبا جاتىر. ولار تاۋاردىڭ ىلەسپە جۇك قۇجاتتارىن ەنگىزۋگە، اكسيزدىك تاۋارلاردى ماركىلەۋگە، ەلەكتروندى شوت-فاكتۋرالاردى قولدانا وتىرىپ، قوسىمشا قۇن سالىعىن اكىمشىلەندىرۋگە، ءىرى كاسىپورىندار ءۇشىن گوريزانتالدى مونيتورينگ ەنگىزۋگە جانە «Tax Free « جوباسىنا قاتىستى. بۇل جوبالارعا بيۋجەتتەن جەكە قاراجات قاراستىرعان جوقپىز. ولار قولدانىستاعى اقپارات جۇيەلەرىنىڭ اياسىندا ىسكە اسىرىلادى. پيلوتتىق جوبالار جالپى كاسىپكەرلەرمەن كەرى بايلانىس ورناتۋ ءۇشىن قولعا الىنىپ وتىر»، - دەگەن ۆەدومستۆو باسشىسى اتالمىش جوبالار زاڭنامالىق نورمالاردى ەنگىزۋ كەزىندە كاسىپكەرلەردىڭ قانداي قيىندىقتارعا تاپ بولىپ جاتقانىن ءبىلۋ ءۇشىن كەرەك ەكەنىن اتادى.

«جوبالاردىڭ تيىمدىلىگىنە كەلسەك، مەملەكەت باسشىسى بيۋجەتتىڭ كىرىس بولىگىن كوبەيتۋ بويىنشا الدىمىزعا ايقىن مىندەت قويدى. ءبىز بۇل تاپسىرمانى ءبىرىنشى كەزەكتە سالىقتىق، كەدەندىك اكىمشىلەندىرۋ جۇيەسىن جەتىلدىرۋ جانە سيفرلاندىرۋ ارقىلى ورىندايمىز. بۇل باعىتتا ۇلكەن جۇمىس ىستەلدى. سوڭعى ءۇش جىلدا وسى شارالاردىڭ ارقاسىندا بيۋجەت قوسىمشا 2 تريلليون تەڭگەدەي كىرىس الدى»، - دەدى ەرۇلان جاماۋبايەۆ.