قارجى ءمينيسترى دەپۋتاتتاردىڭ سىنىنا جاۋاپ بەردى

نۇر-سۇلتان. قازاقپارات - بۇعان دەيىن قارجى مينيسترلىگىنىڭ بيزنەستى تەكسەرۋگە قويىلعان موراتوريدى الىپ تاستاۋ تۋرالى ۇسىنىسىن ءبىرقاتار دەپۋتاتتار سىنعا الدى.

ۆەدومستۆو دەپۋتاتتاردىڭ سىنىنا قالاي قارايدى؟ ۇكىمەت ۇيىندە وتكەن بريفينگىدە قارجى ءمينيسترى ەرۇلان جاماۋبايەۆقا وسىنداي ساۋال قويىلدى، دەپ حابارلايدى قازاقپارات ءتىلشىسى.

«قارجى مينيسترلىگى كەز كەلگەن كونسترۋكتيۆتى سىندى قالىپتى قابىلدايدى. ءبىز ارقاشان ديالوگقا دايىنبىز. ءبىراق بۇل جەردە موراتوريدى الىپ تاستاۋ تۋرالى ءسوز جوق. موراتوري پرەزيدەنت جارلىعى بويىنشا 2023-جىلدىڭ 1- قاڭتارىنا دەيىن ساقتالادى. قارجى مينيسترلىگى جوسىقسىز كاسىپكەرلەردى جاۋاپقا تارتۋ بولىگىندە عانا ماسەلەس كوتەرگەن بولاتىن. بىرنەشە مىسال كەلتىرەيىن: وتكەن جىلى ساۋدا وپەراتسيالارى كەزىندە تۇبىرتەك بەرىلمەگەنى تۋرالى 19 مىڭنان استام شاعىم ءتۇستى. تاعى ءبىر مىسال: ءبىز جۇيەدە ونلاين باقىلاۋ-كاسسالىق ماشينالارىن قولداناتىن كاسىپكەرلەردىڭ 50 پايىزى ۇدايى تۇبىرتەك بەرمەيتىنىن كورىپ وتىرمىز»، - دەدى قارجى ءمينيسترى.

ونىڭ ايتۋىنشا، مەملەكەتتىك كىرىستەر كوميتەتىندە مۇنداي زاڭسىزدىقتارعا ارەكەت ەتۋ مەحانيزمى جوق.

«وسىعان بايلانىستى ءبىز قازىر تۇبىرتەك بەرمەيتىن جوسىقسىز سالىق تولەۋشىلەرگە قاتىستى سالىقتىق باقىلاۋ الگوريتمىن پىسىقتاپ جاتىرمىز. موراتوري پرەزيدەنتتىڭ جارلىعى بويىنشا جالعاساتىنىن اتاپ ءوتتىم. تۇبىرتەك بەرمەيتىن جوسىقسىز كاسىپكەرلەرگە قاتىستى ءبىز سالىقتىق جاۋاپ بەرۋ شارالارىن ازىرلەيمىز. ءتيىستى شارالاردى ءبىز بيزنەس قاۋىمداستىقتارعا ۇسىنىپ، ولارمەن تالقىلايمىز. ءبىز بيزنەستى رەتتەۋگە قاتىسى بار كەز كەلگەن شەشىمىمىزدى قوعامدىق تىڭداۋعا شىعارىپ، تالقىلايمىز. بۇل ماسەلە بويىنشا دا مىندەتتى تۇردە قوعامدىق تىڭداۋ وتەدى. دەپۋتاتتار كورپۋسىمەن دە وسى باعىتتا جۇمىس ىستەيمىز»، - دەدى مينيستر.