تۇركىستان وبلىسىندا «بۇل - ءبىزدىڭ تاۋلار» فەستيۆالى ءوتتى
شارانىڭ ماقساتى - وقۋشىلارعا ايماقتاعى تاۋلى ولكەلەردى تانىستىرۋ، تابيعات قۇندىلىقتارىن ناسيحاتتاۋ، تاۋ تۋريزمىن دامىتۋ جانە تۇركىستان وبلىسىنىڭ جاڭا تۋريستىك باعىتتارىن تانىستىرۋ.
فەستيۆالعا تۇركىستان قالاسىنداعى 30 مەكتەپتەن ۇزدىك، بەلسەندى ءارى تالانتتى 30 وقۋشى جانە «وقۋشىلار سارايىنداعى» ۇيىرمەلەرگە قاتىسۋشى، كوپتەگەن رەسپۋبليكالىق جانە حالىقارالىق دودالاردا توپ جارىپ جۇرگەن دارىندى 20 وقۋشى قاتىستى.
ولار سايرام-وگەم مەملەكەتتىك ۇلتتىق تابيعي پاركى جانە حانتاعى دەمالىس اۋماعىنا ساياحات جاساپ، ءتۇرلى قىزىقتى سايىستار مەن ويىندار ويناپ ۋاقىت وتكىزدى. الدىمەن تۇركىستان قالاسىنان جولعا شىققان فەستيۆال قاتىسۋشىلارى سايرام-وگەم مەملەكەتتىك ۇلتتىق تابيعي پاركىنە باردى.
وندا وقۋشىلار «بۇل - ءبىزدىڭ تاۋلار» تاقىرىبىندا سۋرەت سالۋدان سىنعا تۇسسە، ودان كەيىن «درون ۇشىرۋ» بويىنشا بالالار وزدەرىنىڭ قابىلەتتەرىن كورسەتتى. سونىمەن قاتار ونەردەن الىس ەمەس بالالار ولەڭ، ەسسە جازىپ جانە ءان ايتىپ تا تالانتتارىن كورسەتىپ، ۇيىمداستىرۋشىلاردىڭ جۇلدەلەرىنە يە بولدى.
ال، ەكىنشى كۇنى حانتاعى دەمالىس اۋماعىنا بارعان بالالار كەدەرگىلەر ارقىلى تاۋ شىڭدارىن باعىندىردى.
سونداي-اق پىكىرسايىس ۇيىمداستىرىپ، وزدەرىنىڭ جان-جاقتىلىقتارىن كورسەتە ءبىلدى.
«بالالاردى تابيعاتقا ءجيى الىپ بارۋ، ولارعا قىزىقتى ساتتەر سىيلاۋ وتە پايدالى. مەن ءوزىم دە تاۋعا ءجيى شىعامىن. ادام تابيعاتپەن تىلدەسۋ ارقىلى جاڭا بەلەستەرگە كۇش-قۋات الادى. سونىمەن قاتار، بۇگىنگى شارا ەڭ ءبىرىنشى كەزەكتە بالالاردى تابيعاتتى ايالاۋعا ۇيرەتەرى ءسوزسىز»، - دەيدى وقۋشىلار سارايى ديرەكتورى ينديرا سارقىت قىزى.