ەڭ تومەنگى ايلىق وسسە، سالىق تا وسە مە

نۇر- سۇلتان. قازاقپارات - ق ر ۇلتتىق ەكونوميكا ءمينيسترى اسەت ەرعاليەۆ ەڭ تومەنگى ايلىقتىڭ سالىقتىڭ مولشەرىنە قالاي اسەر ەتەتىنىن ايتتى، دەپ حابارلايدى قازاقپارات ءتىلشىسى.

ۇكىمەت ۇيىندە وتكەن بريفينگىدە اسەت ەرعاليەۆكە ب ا ق وكىلدەرى وسىنداي سۇراق قويعان بولاتىن.

«وزدەرىڭىز بىلەسىزدەر، مەملەكەت باسشىسى ەڭ تومەنگى ەڭبەكاقىنى سالىق جانە الەۋمەتتىك تولەمدەردى ەسەپتەۋ كورسەتكىشى رەتىندە قولدانۋدان كەتۋدى تاپسىرعان بولاتىن. ءبىز بىلەمىز، بۇگىندە سالىق كودەكسىندە ەڭ تومەنگى ايلىق تەك جەكە تابىس سالىعى مەن الەۋمەتتىك سالىقتاردىڭ ەڭ تومەنگى كولەمىن ەسەپتەپ شىعارۋ ستاندارتىنا عانا بايلانعان. ۇلتتىق ەكونوميكا مينيسترلىگى وسى باعىتتا جۇمىس جۇرگىزىپ جاتىر. جىل سوڭىنا دەيىن بۇل جۇمىستى اياقتايمىز»، - دەدى ۆەدومستۆو باسشىسى.

ەسكە سالساق، اتالمىش بريفينگىدە ق ر قارجى ءمينيسترى ەرۇلان جاماۋبايەۆ موبيلدى اقشا اۋدارىمدارى قالاي زاڭداستىرىلاتىنىن ءتۇسىندىردى.

«بۇل جەردە ايتا كەتەتىن نەگىزگى ءبىر ماسەلە - حالىق تاراپىنان الاڭداۋ بولماۋى كەرەك. سەبەبى ازاماتتاردىڭ قولدانىپ جۇرگەن كارتا شوتتارى ساقتالادى. ولاردىڭ كۇندەلىكتى ءوزارا ءبىر- بىرىنە اۋدارىپ جۇرگەن اقشالارىنا ەشقانداي نۇقسان كەلمەيدى. ياعني، بۇكىل پروتسەسس سول كۇيىندە ساقتالادى. الدىندا دا ايتقانىمىزداي، موبيلدى اۋدارىمداردى فيسكالدى ەتۋ ءۇشىن عانا زاڭعا بىرتىندەپ وزگەرىستەر ەنگىزەمىز. ق ر ۇلتتىق بانكى جيناقتاپ وتىرعان مالىمەت بويىنشا، 8 ايدا موبيلدىك اۋدارىمدار ارقىلى جانە ينتەرنەت جەلىسى ارقىلى جۇرگىزىلگەن اۋدارىمدار مەن تولەمدەردىڭ جالپى كولەمى 36 تريلليون تەڭگەنىڭ ماڭايىندا قالىپتاسىپ وتىر. بۇل وتە قوماقتى سوما»، - دەدى ەرۇلان جاماۋبايەۆ.

اۆتور: ەسىمجان ناقتىباي