پرەزيدەنت الماتىداعى اتىسقا قاتىستى پىكىر ءبىلدىردى
«قوعامدا رەزونانس تۋدىرعان الماتىدا تاياۋدا ورىن العان قايعىلى وقيعاعا جەكە توقتالعىم كەلەدى. قازا تاپقانداردىڭ تۋعان-تۋىستارى مەن جاقىندارىنا تاعى دا كوڭىل ايتامىن. پوليتسيا قىزمەتكەرلەرى مەن سوت ورىنداۋشىسى وزدەرىنىڭ قىزمەتتىك بورىشىن اتقاردى. وكىنىشكە وراي وزدەرىنە شابۋىل سالدارىنان قازا تاپتى. ادام ءولتىرۋدى ونىڭ قانداي دا ءبىر سەبەبى بولسا دا اقتاۋعا بولمايدى. وركەنيەتتى قوعامدى مۇنداي سيپاتتاعى كەز كەلگەن داۋ مەن پروبلەما تەك قانا قۇقىقتىق الاڭدا شەشىلۋى ءتيىس. بۇعان قوسا، ورىن العان قايعىلى جايتتىڭ ءمان-جايىن تىڭعىلىقتى اشۋ كەرەك. مۇنداي جايت نەلىكتەن ورىن العانىن انىقتاۋ قاجەت. كرەديتورلار مەن پروبلەمالى زاەمشىلار اراسىنداعى اسىرەسە تۇرعىن ۇيگە قاتىستى قارىم-قاتىناس وتە نازىك. مۇنى بىلەمىز ءارى زاڭدىق جەتىلدىرۋدى تالاپ ەتەدى»، - دەدى مەملەكەت باسشىسى ماڭعىستاۋ وبلىسىنىڭ الەۋمەتتىك- ەكونوميكالىق دامۋى جونىندەگى كەڭەس بارىسىندا.
ق ر پرەزيدەنتى مۇنىڭ بانكتەردىڭ كەپىل ساياساتىنا، باعالاۋ قىزمەتىن جەتىلدىرۋگە، جەكە سوت ورىنداۋشىلاردىڭ ءجۇمىسىنا جانە وزگە دە اسپەكتىلەرگە قاتىستى ەكەندىگىن اتاپ ءوتتى. بۇل ماسەلەدە اشىق جانە ءبىرىڭعاي سوت تاجىريبەسىن قامتاماسىز ەتۋ ماڭىزدى ەكەندىگىنە باسا نازار اۋدارتتى.
«ۇكىمەتكە، ۇلتتىق بانككە جانە قارجىلىق رەتتەۋ اگەنتتىگىنە ءبىر اي مەرزىمنىڭ ىشىندە زاڭنامالىق جانە نورماتيۆتىك تۇزەتىلەر توپتاماسىن دايىنداۋ ءتيىس. تاعى دا قايتالاپ ايتامىن، ەگەر وعان قاجەتتىلىك بولسا. دەگەنمەن، مەن مۇنداي قاجەتتىلىك تۋىنداپ وتىر دەپ سانايمىن. ءبىراق، ماماندار بۇل پروبلەمانى تاعى دا ءبىر مارتە تىڭعىلىقتى زەردەلەۋى ءتيىس. سونىمەن قاتار ۇكىمەت پەن الماتى اكىمدىگى قايعىلى وقيعادان زارداپ شەككەندەردىڭ بارلىعىنا، ءبىرىنشى كەزەكتە بالالارعا قولداۋ كورسەتۋى قاجەت»، - دەدى قاسىم-جومارت توقايەۆ.
ەسكە سالساق، الماتىدا اتىس بولىپ، 5 ادامنىڭ قازا تاپقانىن حابارلاعان بولاتىنبىز. اتالعان جاعداي بويىنشا سوتقا دەيىنگى تەرگەۋ امالدارى باستالدى. كىنالى ادام 20 جىلعا دەيىن نەمەسە ءومىر بويىنا باس بوستاندىعىنان ايىرىلۋى مۇمكىن.
اۆتور: مارلان جيەمباي