حالىق ساناعى وزەكتى ماسەلەلەردى شەشۋگە كومەكتەسەدى - الماتى سايلاۋ كوميسسياسى
مۇنداي پىكىردى الماتى قالاسى اۋماقتىق سايلاۋ كوميسسياسى ءتوراعاسىنىڭ ورىنباسارى ايگۇل قالىقوۆا ءبىلدىردى، دەپ حابارلايدى قازاقپارات ءتىلشىسى.
ونىڭ سوزىنشە، ساناق قورىتىندىسى بويىنشا ەلدە حالىقتىڭ پاندەميادان قالاي ءوتىپ جاتقانىن، ون جىلدان كەيىن ءومىر سالتى قالاي وزگەرگەنىن بىلۋگە بولادى.
ايگۇل قالىقوۆا حالىق ساناعى ەڭ الدىمەن ەل تۇرعىندارىنىڭ جاسى، جىنىسى، ۇلتى، ءبىلىمى بويىنشا ناقتى ساندىق جانە ساپالىق قۇرامىن ءبىلۋ ءۇشىن قاجەت ەكەنىن جەتكىزدى.
«ءبىز ءومىر ءسۇرۋ جاعدايىن، جۇمىسپەن قامتۋ دەڭگەيى مەن قۇرىلىمىن بىلە الامىز، ءبىراق بۇعان جەتۋ ءۇشىن ءاربىر تۇرعىنعا جەتۋىمىز كەرەك جانە بارلىق ادامدار ساناققا قاتىسۋى كەرەك. ساناقتىڭ ۇرانى: «قازاقستاندا ءار ادام ماڭىزدى!»، - دەدى ول.
ونىڭ ايتۋىنشا، ساناق ناتيجەلەرى كوپتەگەن ماسەلەلەردى شەشۋگە جانە مەملەكەتكە جوسپار قۇرۋعا كومەكتەسەدى. سونىمەن قاتار، ساناق الماتى ءۇشىن مەگاپوليس رەتىندە وتە ماڭىزدى. جاسىراتىنى جوق، قالادا تۇراتىنداردىڭ كوپشىلىگىنىڭ رەسمي تىركەۋى جوق.
«بۇل جاعداي ءداستۇرلى تۇردە ەڭبەك ميگرانتتارى مەن ولاردىڭ وتباسىلارىن قىزىقتىراتىن ورىن بولىپ تابىلاتىن بارلىق ءىرى قالالاردا دامىپ كەلەدى. ءبىلىم بەرۋ، دەنساۋلىق ساقتاۋ جانە الەۋمەتتىك سالاعا ۇلكەن جۇكتەمە بار. مەكتەپ، بالاباقشا جانە باسقا دا الەۋمەتتىك نىساندار جەتكىلىكسىز. ال حالىقتىڭ قاجەتتىلىگى تۋرالى ناقتى دەرەكتەر بولماسا، قالاي ەسەپتەۋگە بولادى؟ ءبىز بارلىعىمىز بالالارىمىز بەن نەمەرەلەرىمىزدىڭ زاماناۋي بالاباقشاعا، ەكى-ءۇش ەمەس، ءبىر اۋىسىمدا ءبىلىم الاتىن مەكتەپكە بارۋ مۇمكىندىگىن العىمىز كەلەدى. ءبىز ءبارىمىز ساپالى مەديتسينالىق قىزمەت العىمىز كەلەدى. مەملەكەت مۇنى تۇرعىنداردى ەسەپكە الماي، بەلگىلى ءبىر ەلدىمەكەندە تۇراتىن ادامداردىڭ ناقتى سانىن بىلمەي، ءوز حالقىن قامتاماسىز ەتە المايدى»، - دەدى ايگۇل قالىقوۆا.
ساناق دەرەكتەرى مالىمەتتەر بازاسىندا كورسەتىلمەگەن، قۇجاتتارى جوق ازاماتتاردى ساناۋعا كومەكتەسەدى.
بۇلار مەملەكەتتەن كومەك المايدى. ءسوزىن قورىتىندىلاعان الماتىنىڭ اۋماقتىق سايلاۋ كوميسسياسى ءتوراعاسىنىڭ ورىنباسارى قالا تۇرعىندارىن ساناق كەزىندە بەلسەندىلىك تانىتۋعا جانە جەكە مالىمەتتەرگە الاڭداماۋعا شاقىردى، ويتكەنى زاڭ ولاردىڭ ساقتالۋىنا ءتيىستى كەپىلدىك بەرەدى.
«ءبىز بارلىعىمىز حالىق ساناعى تەز ءارى ساپالى وتسە، وندا وزەكتى ماسەلەلەردىڭ شۇعىل شەشىلەتىنىن ءتۇسىنۋىمىز كەرەك. ويتكەنى، كەز كەلگەن ماسەلەنى شەشۋدىڭ العاشقى قادامى - ونىڭ ناقتى تۇجىرىمى. حالىق ساناعى وزەكتى ماسەلەلەردى شەشۋگە كومەكتەسەدى»، - دەدى سپيكەر.