توقايەۆ اقتاۋ مەن قۇرىق پورتتارىنىڭ بازاسىندا كونتەينەرلىك حاب قۇرۋدى تاپسىردى
بۇل تۋرالى ماڭعىستاۋ وبلىسىنا جۇمىس ساپارى بارىسىندا ءوڭىردىڭ الەۋمەتتىك-ەكونوميكالىق دامۋى جونىندە كەڭەس وتكىزگەن ق ر پرەزيدەنتى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
اقوردانىڭ باسپا ءسوز قىزمەتى تاراتقان مالىمەتكەن سايكەس، پرەزيدەنت كەڭەس بارىسىندا وڭىردەگى تۇرعىن ءۇي-كوممۋنالدىق شارۋاشىلىق جاعدايىن دا نازارىنان تىس قالدىرمادى.
«قالا تۇرعىندارىنىڭ سانى وسكەن سايىن ەلەكتر قۋاتىن تۇتىنۋ كولەمى دە ارتا تۇسپەك. سوندىقتان اكىمدىك 2023-جىلعا دەيىن اقتاۋداعى بوتانيكالىق باقتىڭ ماڭىنا قوسالقى ەلەكتر ستانتسياسىن سالۋعا ءتيىس»، - دەدى قاسىم-جومارت توقايەۆ.
سونىمەن قاتار مەملەكەت باسشىسى اقتاۋ قالاسىن كوگالداندىرۋ جۇمىستارىن ساپالى ۇيىمداستىرۋدى تالاپ ەتىپ، وبلىس اكىمىنە اعاش وتىرعىزۋ ماسەلەسىن شەشۋدى تاپسىردى. بۇدان بولەك پرەزيدەنت جەرگىلىكتى ەكولوگيالىق پروبلەمالارعا، سونىڭ ىشىندە «قوشقار اتا» قالدىقتار قويماسىنا قاتىستى ماسەلەگە توقتالدى.
مەملەكەت باسشىسى ۇكىمەت پەن وبلىس اكىمدىگىنە ءۇش جىل مەرزىم ىشىندە قالدىق قويماسىن قايتا قالپىنا كەلتىرۋدى جانە قالدىق جينالاتىن تولىق ينفراقۇرىلىم قالىپتاستىرۋدى، سونداي-اق قاتتى تۇرمىس قالدىقتارىن نورماتيۆتى تالاپتارعا ساي وڭدەۋ جۇمىستارىن تولىق اياقتاۋدى تاپسىردى.
قاسىم-جومارت توقايەۆ وڭىردەگى كولىك-ترانزيت الەۋەتىن دامىتۋدى تاعى ءبىر ماڭىزدى مىندەت رەتىندە اتادى.
بۇل رەتتە ەلىمىزدىڭ تەڭىز پورتى ارقىلى وتەتىن ترانسكاسپي مۋلتيمودالدى حالىقارالىق جولىنىڭ ماڭىزى ارتا تۇسەدى.
وسىعان وراي مەملەكەت باسشىسى ۇكىمەتكە اقتاۋ جانە قۇرىق پورتتارىنىڭ بازاسىندا كونتەينەرلىك حاب قۇرۋعا جانە قىتايدان كەلەتىن ەكسپورتتىق جۇكتەردىڭ ءبىر بولىگىن قايتا باعىتتاۋعا تاپسىرما بەردى.