ادامزات تاريحتاعى ەڭ ۇلكەن داعدارىستى باستان كەشىپ جاتىر- ب ۇ ۇ باس حاتشىسى

None
None
نۇر- سۇلتان. قازاقپارات - بۇگىن ب ۇ ۇ باس اسسامبلەياسىنىڭ جوعارى دەڭگەيدەگى اپتالىعى باستالدى. ۇيىمنىڭ نيۋ- يوركتەگى شتاب پاتەرىندە الەمنىڭ 100-دەن استام مەملەكەت باسشىلارى مەن دەلەگاتسيا مۇشەلەرى باس قوستى.

جيىنعا ءبىزدىڭ ەلىمىزدىڭ اتىنان قازاقستاننىڭ سىرتقى ىستەر ءمينيسترى ءارى پرەمەر- ءمينيستىردىڭ ورىنباسارى مۇحتار تىلەۋبەردى باستاعان دەلەگاتسيا وكىلدەرى قاتىسۋدا. 76- سەسسيانىڭ تاقىرىبى كليماتتىڭ وزگەرۋى، كوۆيد پاندەمياسىمەن كۇرەس جانە جاھاندىق قاۋىپسىزدىك پەن تۇراقتىلىق ماسەلەلەرىن شەشۋگە ارنالىپ وتىر. سونىمەن قاتار، بيىلعى جيىندا اۋعانستانداعى جاعدايعا، ەرەكشە نازار اۋدارىلادى دەپ كۇتىلۋدە.


ۇيىمنىڭ باس حاتشىسى انتونيۋ گۋتتەريش ءوزىنىڭ كىرىسپە سوزىندە «ادامزات بالاسى تاريحتاعى ەڭ ۇلكەن داعدارىستى باستان كەشىپ جاتقانىن» ايتىپ، كومەككە مۇقتاج ەلدەرگە قول ۇشىن سوزۋعا شاقىردى.

انتونيۋ گۋتەرريش، ب ۇ ۇ باس حاتشىسى:

- جوعارى مارتەبەلى قاتىسۋشىلار! دابىل قاعاتىن ۋاقىت كەلدى. ادامزات بۇرىس باعىتتا كەتىپ بارا جاتىر. جانە ءبىزدىڭ وياناتىن ۋاقىتىمىز جەتتى. قازىرگى پاندەميا ۋاقىتىندا دامىعان مەملەكەتتەردىڭ باسىم بولىگى ۆاكسينالانىپ ۇلگەرگەنىمەن، افريكالىقتاردىڭ 90 پروتسەنتى ەكپەنىڭ ءبىرىنشى دوزاسىن دا الا الماي وتىر.


كوۆيدتەن بولەك، ءتۇرلى ەلدەردەگى توڭكەرىستەر، ساياسي تارتىستار مەن كليماتتىڭ وزگەرۋى، ادام قۇقىقتارىنىڭ تاپتالۋى سىندى كوپتەگەن پروبلەمالار بار. جانە ولار ادامنىڭ قولىمەن جاسالدى. دەمەك ونى شەشۋ دە قولىمىزدان كەلەدى دەگەن ءسوز. قىمباتتى قاتىسۋشىلار اتالعان ماسەلەلردى شەشۋ ءۇشىن ارەكەتكە كوشەتىن ۋاقىت كەلدى.

ايتا كەتەيىك، ءبىرىنشى كۇنىنىڭ اياسىندا مۇحتار تىلەۋبەردى ليتۆا، سينگاپۋر، اۋستريا، سيريا جانە چەرنوگوريا ەلدەرىنىڭ سىرتقى ىستەر مينيسترلەرىمەن كەزدەسىپ، ءبىرقاتار ەكىجاقتى كەلىسسوز وتكىزدى. سونىمەن قاتار، قىركۇيەكتىڭ 27-نە دەيىن جالعاساتىن جيىندا ەلىمىزدىڭ اتىنان بەينە ۇندەۋ فورماتىندا مەملەكەت باسشىسى قاسىم- جومارت توقايەۆ سويلەيدى دەپ كۇتىلۋدە.

سوڭعى جاڭالىقتار