قازاقستاندىقتار قانداي ەلدەرگە ۇشىپ بارا الادى
مۇنداي شەشىمدى ق ر پرەمەر-ءمينيسترىنىڭ ورىنباسارى ەرالى توعجانوۆتىڭ توراعالىعىمەن Covid-19 تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ وتىرىسىندا قابىلداندى، دەپ حابارلايدى قازاقپارات.
اتاپ وتكەندە، قازاقستاننىڭ رەسەي فەدەراتسياسىمەن اۋە قاتىناسى 54 رەيسكە، تۇركيامەن - 7 رەيسكە، بىرىككەن اراب امىرلىكتەرىمەن - 9 رەيسكە، وزبەكستانمەن - 5 رەيسكە، گەرمانيامەن - 5 رەيسكە، مالديۆپەن - 3 رەيسكە، كورەيامەن - 6 رەيسكە، پولشامەن - 2 رەيسكە، ۆەنگريامەن - 1 رەيسكە، ساۋد ارابياسىمەن - 1 رەيسكە ۇلعايتىلدى.
قازاقستاننان چەحيا ەلىنە تۇراقتى رەيستەر اپتاسىنا ەكى رەيس جيىلىكپەن ۇشادى، قىتايعا - اپتاسىنا سەگىز رەيس، ازەربايجانعا - اپتاسىنا ءۇش رەت ۇشادى.
قازاقستاننان يتالياعا اپتاسىنا ەكى رەت، شري-لانكاعا - اپتاسىنا ءۇش رەت، كۋۆەيتكە - اپتاسىنا ءۇش رەت ۇشاتىن تۇراقتى رەيستەر اشىلدى. قازىرگى كەزدە اۋە كومپانيالار ۇشۋ كەستەسىن قۇرىپ جاتىر. رەيستەردىڭ ورىندالۋى جوعارىدا اتالعان ەلدەردىڭ ءتيىستى وكىلەتتى ورگاندارىمەن كەلىسىلەدى. بارلىق رەيستەر سانيتارلىق-ەپيدەميولوگيالىق تالاپتاردىڭ قاتاڭ ساقتالۋىمەن جانە اۋە كومپانيالارىنىڭ سايتتارىندا جاريالانعان كەستەگە سايكەس ورىندالادى.