الماتىدا كوپبالالى جانە مۇقتاج وتباسىلار باسپانامەن قالاي قامتاماسىز ەتىلەتىنى ايتىلدى

الماتى. قازاقپارات- الماتى قالالىق تۇرعىن ءۇي ساياساتى باسقارماسى باسشىسىنىڭ ورىنباسارى ەرمەك ءامىروۆ قولجەتىمدى تۇرعىن ۇيمەن قامتاماسىز ەتۋ شارالارى تۋرالى ايتتى، دەپ حابارلايدى قازاقپارات ءتىلشىسى.

ونىڭ ايتۋىنشا، وتباسى بانك ارقىلى جۇزەگە اساتىن «باقىتتى وتباسى» باعدارلاماسىنىڭ كومەگىمەن قولجەتىمدى تۇرعىن ءۇي الۋعا بولادى.

«بۇل باعدارلامانىڭ كومەگىمەن كوپبالالى جانە تولىق ەمەس وتباسىلار، سونداي- اق مۇمكىندىگى شەكتەۋلى بالالاردى تاربيەلەپ وتىرعان وتباسىلار نارىقتا باستاپقى نەمەسە قوسالقى تۇرعىن ءۇيدى قولايلى شارتتارمەن الا الادى. باعدارلامانى 3 جىلدىڭ ىشىندە 634 الماتىلىق وتباسى قولداندى»، - دەدى ەرمەك ءامىروۆ.

تۇرعىنداردىڭ الەۋمەتتىك وسال توبى ساناتىندا كەزەكتە تۇرعاندار ءۇشىن ۇلكەن كومەك - قايتارىمسىز تۇرعىن ءۇي سەرتيفيكاتتارىن الۋ مۇمكىندىگى بار. بۇل سوما وتباسى بانكىنەن جەڭىلدىكپەن يپوتەكا الۋ ءۇشىن باستاپقى تولەمنىڭ ءبىر بولىگىن جابۋ ءۇشىن كوزدەلگەن. «سەرتيفيكاتتى كەزەكتە تۇرعان I جانە II توپتاعى مۇگەدەكتەر، مۇگەدەك بالالارى بار نەمەسە تاربيەلەپ وتىرعان وتباسىلار، جەتىم بالالار، اتا-اناسىنىڭ قامقورىنسىز قالعان بالالار جانە كوپبالالى وتباسىلار الا الادى. الماتى اكىمدىگى 1 ميلليون تەڭگە سوماسىنا 2000 قايتارىمسىز تۇرعىن ءۇي سەرتيفيكاتىن بەرۋگە جەرگىلىكتى بيۋدجەتتەن 2 ميلليارد تەڭگە ءبولدى»، - دەيدى سپيكەر. جۇمىس ىستەيتىن جاستار «الماتى جاستارى» قالالىق باعدارلاماسىنا قاتىسا الادى. ونىڭ اياسىندا 1000 جاس وتباسى باسپانامەن قامتاماسىز ەتىلدى.

«بيىل ءبىز تاعى 1000 جاس وتباسىن قامتۋدى جوسپارلاپ وتىرمىز. قازىرگى تاڭدا ولاردىڭ 772 سى باسپانالى بولدى»، - دەپ تولىقتىردى ول.

سونىمەن قاتار جۇمىس ىستەيتىن 1050 جاستى 5 جىل مەرزىمگە جالعا بەرىلەتىن تۇرعىن ۇيمەن قامتاماسىز ەتۋ جوسپارلانىپ وتىر. ءسوز سوڭىندا تۇرعىن ءۇي ساياساتى باسقارماسى باسشىسىنىڭ ورىنباسارى الماتى قالاسى اكىمدىگىنىڭ ازاماتتاردى تۇرعىن ۇيمەن قامتاماسىز ەتۋ قارقىنىن ارتتىراتىنىن ايتتى.