ەلوردادا جاڭا جاعالاۋ سالىنادى

نۇر-سۇلتان.قازاقپارات -نۇر- سۇلتان قالاسىنىڭ ساۋلەت، قالا قۇرىلىسى جانە جەر قاتىناستارى باسقارماسىندا نۇرا- ەسىل كانالىنىڭ جاڭا جاعالاۋى جوباسىنىڭ ەسكيزدەرى كورسەتىلدى، دەپ حابارلايدى قالا اكىمدىگىنىڭ رەسمي سايتى.

قوعامدىق كەڭىستىك تۇجىرىمداماسى ۋربانيستىك ساۋلەتشىلەردىڭ وسى كوكتەمدە اۋدان تۇرعىندارىمەن وتكەن بىرنەشە كەزدەسۋىنەن كەيىن جاسالدى. تۇرعىندار ءوز اۋلالارىنا قانداي وزگەرىس ەنگىزگىسى كەلەتىنىن شەشەدى - ويىن الاڭدارى نەمەسە فيتنەس اۋماقتارى. اباتتاندىرۋ جۇمىسى ەكى كەزەڭگە بولىنەدى دەپ حابارلاندى.

ءبىرىنشى كەزەكتە ۇلى دالا داڭعىلىنان وڭعارسىنوۆا كوشەسىنە دەيىنگى ۋچاسكە جوندەلەدى. مۇندا شامامەن 19 مىڭ شارشى مەتر اۋماق كوگالداندىرىلادى، سول سياقتى 20 مىڭ شارشى مەتردەن اساتىن تروتۋار توسەمدەرىنىڭ الاڭى سالىنادى. ەكىنشى كەزەكتە وڭعارسىنوۆا كوشەسىنەن حۋسەين بەن تالال كوشەسىنە دەيىنگى ۋچاسكەدە وسىنداي جۇمىستار جۇرگىزىلەدى. كوگالداندىرۋ اۋدانى - 15 568,1 شارشى مەتر. تروتۋار توسەمدەرىنىڭ اۋدانى - 14 692 شارشى مەتر. بۇل اۋماقتا ەرەسەكتەر دە، بالالار دا بوس ۋاقىتىن ءتيىمدى وتكىزبەك.

جەرگىلىكتى تۇرعىندار ەلوردالىقتار ءۇشىن جايلى، ىڭعايلى، قاۋىپسىز جاعالاۋ جاسالىنسا دەگەن تىلەگىن ءبىلدىردى. سونداي- اق تۇرعىندار ءوز اۋلاسىندا سپورتپەن شۇعىلداناتىن ورىندار، بالالار الاڭدارى، ۆەلوجولدار سالىنعانىن قالايدى. جوبالىق شەشىمدە ستريتبولعا ارنالعان 2 الاڭ كورسەتىلگەن. بۇل رەتتە، فۋتبول الاڭى ۆولەيبول الاڭىنا اينالۋى مۇمكىن.

جىلدام تاماقتانۋ پاۆيلوندارى مەن ۆەلوسيپەد ستانتسيالارىن ورناتۋ، مۇمكىندىگى شەكتەۋلى جانداردىڭ ءجۇرىپ- تۇرۋى ءۇشىن كەدەرگىسىز ورتا قۇرۋ كوزدەلگەن. سونىمەن قاتار تەننيس ۇستەلدەرىن، كولەڭكەلى شاتىرلار، اتكەنشەكتەر ورناتۋ جوسپارلانىپ وتىر. بۇعان قوسا باربەكيۋ جاسايتىن ورىن دا اشىلادى. ساۋالناما ناتيجەسى بويىنشا جوبالىق شەشىمدە ەكى جەردە بالىق اۋلاۋعا ارنالعان پيرستەر ەسكەرىلدى. اۋدان تۇرعىندارىنا قولايلى جاعداي جاساۋ ءۇشىن كوپىرلەر دە سالىنادى.

«قوعامدىق كەڭىستىكتى قۇرۋ كەزىندە مۇمكىندىگى شەكتەۋلى جاندارعا ىڭعايلى بولۋ ءۇشىن «ادامدارعا ارنالعان قالا» تۇجىرىمداماسى ەسكەرىلەدى. بۇل دا «نۇر- سۇلتان - جايلى قالا» ماستەر- جوسپارى اياسىندا ۋربانيستەردىڭ تۇرعىندارمەن ورناتقان قارىم- قاتىناسىنىڭ ناتيجەسى. ارينە، ناۆيگاتسيا، ەلوردانىڭ ديزاين- كودى بويىنشا كوگالداندىرۋ ماسەلەسى دە ەسكەرىلدى»، - دەپ اتاپ ءوتتى نۇر- سۇلتان قالاسىنىڭ ساۋلەت، قالا قۇرىلىسى جانە جەر قاتىناستارى باسقارماسىنىڭ باسشىسى نۇرلان ۇرانحايەۆ.

ۋربانيستيكا ورتالىعىنىڭ باسشىسى ەلنار بازىكەننىڭ ايتۋىنشا، جوبالىق شەشىمدە جاعالاۋ بىرنەشە ۋچاسكەگە بولىنگەن، ولاردىڭ ءارقايسىسى بەلگىلى ءبىر دەمالىس تۇرىنە ارنالادى. ۋچاسكەلەر جۇگىرۋ جانە ۆەلوسيپەد جولدارىن بايلانىستىرادى. جوبانى كەلەسى جىلى ىسكە اسىرۋ جوسپارلانىپ وتىر. ەستەرىڭىزگە سالا كەتەيىك، اۋلالار مەن قوعامدىق كەڭىستىكتى اباتتاندىرۋ جۇمىسى ەلوردا اكىمى التاي كولگىنوۆتىڭ تاپسىرماسى بويىنشا «نۇر- سۇلتان - جايلى قالا» ماستەر- جوسپارىن ىسكە اسىرۋ اياسىندا جۇرگىزىلۋدە. 2020 -جىلى نۇر- سۇلتاندا 150-دەن استام اۋلا مەن 60 قوعامدىق كەڭىستىك (ساياباقتار، گۇلزارلار، جەلەكجولدار) اباتتاندىرىلدى. بيىل 190-ى سالىنىپ، جوندەلەدى.

تۇرعىندار تاراپىنان تۇسكەن تىلەكتەرگە سۇيەنە وتىرىپ، جوبالىق شەشىم جاسالىپ، يدەيا جۇزەگە اسىرىلادى. جوبالاۋ الدىندا ەلوردالىق ۋربانيستەر ساۋالناما جۇرگىزىپ، قالا تۇرعىندارىنىڭ ۇسىنىستارىن جينايدى. تۇرعىندارمەن كەزدەسۋلەردە كوماندالىق ديزاين- ويىن وتكىزىلەدى. ناتيجەسىندە جاڭا قوعامدىق كەڭىستىكتى ۇيىمداستىرۋدىڭ ەسكيزدىك ۇسىنىسى پايدا بولادى.

www.24.kz