جايىق وزەنى تارتىلىپ بارادى
وزەننىڭ ءار جەرىندە ارالدار پايدا بولعان. وتكەل بەرمەيتىن ءور وزەننىڭ قازىر قۋاتى قايتقان. وسىدان 30 جىل بۇرىن جايىققا 9 ميلليارد تەكشە مەتر سۋ جينالاتىن ەدى. ال قازىر ترانسشەكارالىق وزەندەگى سۋ كولەمى 3 ەسەگە دەيىن تومەندەگەن. دەر كەزىندە ءتۇپ تەرەڭدەتۋ جۇمىستارى قولعا الىنباسا جايىقتىڭ جاعدايى ەكولوگيالىق اپاتقا ۇلاسادى. تابيعات جاناشىرلارى وسىلاي دەدى.
ارمان حايرۋللين، قوعامدىق قوزعالىس ءتوراعاسى:
- 2004 -جىلدان بەرى ءتۇپ تەرەڭدەتۋ جۇمىستارى وسى پەرەكاتتاردا جۇرگەن بولاتىن. بارلىعى 16 پەرەكات تازالاندى. ءبىراق بۇل تاعى بىرنەشە جەردە وسىنداي تۇستار قارالماي كەتكەن. ياعني جوبانى جاساۋ كەزىندە زەرتتەۋ جۇمىستارى جۇرگىزىلمەگەن. جالپى پەرەكاتتاردىڭ سانى، ءبىز بىلسەك، 36 دان اسىپ جىعىلادى. مەملەكەتارالىق كەلىسىمدەر جۇزەگە اسپاي جاتىر.
مەملەكەتارالىق كوميسسيانىڭ دا جۇمىسى بەلگىسىز. قانداي تالاپتار قويىلدى، قانداي جۇمىستار جاسالۋى كەرەك، قانداي ماملەگە كەلدى، ەشقانداي اقپارات جوق. رەسمي مالىمەتكە سۇيەنسەك، سوڭعى 4 -جىلدا وزەندەگى سۋ دەڭگەيى 60 پروتسەنتكە دەيىن تومەندەگەن. جايىق وزەنىنىڭ 51 شاقىرىمىن، قيعاش وزەنىنىڭ 240 شاقىرىمىن ءتۇپ تەرەڭدەتۋ ءۇشىن جوبالىق- سمەتالىق قۇجاتتاما جاساقتالعان ەدى. جاۋاپتىلاردىڭ سوزىنشە، بۇل جۇمىستار كەلەسى جىلى باستالادى.
نۇرلان جانتوقوۆ، وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى:
- وبلىس كولەمىندە 2017-2020 -جىلدارى جايىق جانە قيعاش وزەندەرىنىڭ 152 شاقىرىمىندا ءتۇپ تەرەڭدەتۋ جۇمىستارى جۇرگىزىلىپ، جايىق وزەنىنىڭ 43 شاقىرىمى، قيعاش وزەنىنىڭ 109 شاقىرىمىنا جۇمىستار اياقتالدى. 2022-2024 -جىلدارى جايىق وزەنى بويىنشا 51,5 شاقىرىمىنا رەسپۋبليكالىق بيۋدجەتتەن 6 ميلليارد تەڭگە ءبولۋ جوسپارلانىپ، ونىڭ 2022 -جىلعا 2 ميلليارد تەڭگەسىنە بيۋدجەتتىك ءوتىنىش بەرىلدى.
اسلانبەك شىعىر، ءتىلشى:
- «جايىق دەگەن جاندى سۋ» دەپ كەزىندە اقىندار جىرلاعان وزەننىڭ سيقى ءدال بۇگىن مىنە وسىنداي. كەزىندە وتكەل بەرمەيتىن ءور وزەننىڭ ءقازىر ارعى بەتىنەن بەرگى بەتىنە سۋدى توبىعىڭىزدان كەشىپ ءجۇرىپ وتە الاسىز. كەزىندە ارناسىنان تاسىپ جاتاتىن، قازىر جويىلىپ كەتۋدىڭ از- اق الدىندا تۇرعان ويىل، جەم، ساعىزدىڭ كۇيىن بۇل جايىقتىڭ كەشپەسىنە كىم كەپىل؟ !
www.24.kz