+7 (701) 759 90 19
USD 425.07 EUR 494.14
RUB 6.06 CNY 66.55
جاڭالىقتار

ەل سەنىمىن اقتاعان ەليزابەت

21 قىركۇيەك 21:30
:ءبولىسۋ
ەل سەنىمىن اقتاعان ەليزابەت

نۇر-سۇلتان. قازاقپارات - قازاقستاندىق مانەرلەپ سىرعاناۋشى جاراقاتىنا بايلانىستى سپورتتاعى مانسابىن اياقتادى.

بۇل تۋرالى instagram جەلىسىندەگى پاراقشاسىندا حابارلادى.

ەليزابەت تۇرسىنبايەۆا 2000-جىلى 14- اقپاندا ماسكەۋدە دۇنيەگە كەلگەن. اناسى جۇكتى كەزدە «كلەوپاترا» سەريالىن كورىپ، ەسىمىن اكتريسا ەليزابەت تەيلور قۇرمەتىنە قويعان. كىشكەنتاي كەزىندە تىم نازىك بولعاندىقتان اتا-اناسى مانەرلەپ سىرعاناۋ سەكتسياسىنا بەرگەن.

ەڭ العاشقى جۇلدەسىن 11 جاسىندا يەلەنگەن. جاس وسپىرىمدەر اراسىنداعى NRW Trophy تۋرنيرىندە ءۇشىنشى ورىن العان. ەكى جىلدان كەيىن ماسكەۋ بىرىنشىلىگىندە توپ جارعان. ايگىلى باپكەر ەتەري تۋتبەريدزە نازارىنا ىلىگىپ، قالانىڭ قۇراماسى تىزىمىنە ەنگەن. كەيىننەن قازاقستان اتىنان قاتىسۋ ءۇشىن ماڭىزدى شەشىم قابىلداعان.

ەليزابەت 2013-جىلى تانىمال كانادالىق مامان برايان ورسەر كومانداسىنىڭ قاتارىنا قوسىلدى. 3 جىل قاتارىنان (2014-2016) قازاقستان چەمپيونى اتاندى. جاس وسپىرىمدەر اراسىنداعى گران-پري تۋرنيرىندە (گەرمانيا) ەكىنشى ورىن السا، الەم چەمپيوناتىندا كۇمىس مەدال ەنشىلەدى.

2015-جىلى ەرەسەكتەر اراسىنداعى جارىستارعا قاتىسا باستادى. ەكىنشى جارىسىندا-اق جۇلدەلى ورىننان كورىندى.

قازاقستاندىق مانەرلەپ سىرعاناۋشى جاس وسپىرىمدەر اراسىنداعى وليمپيادانىڭ كۇمىس جۇلدەگەرى بولدى. 2017-جىلى ازيا ويىندارىندا قولا الدى. ال الەم چەمپيوناتىندا ۇزدىك وندىققا ەنىپ، قازاقستانعا وليمپيادا ويىندارىنا ەكى جولداما سىيلادى.

2018-جىلى وليمپيادادا وتانداسىمىز 12-ورىننان كورىندى. بۇدان دا جوعارى ناتيجەگە قول جەتكىزۋگە ۇمتىلدى. رەسەيلىك مامان ەتەري تۋتبەريدزە كومانداسىنا قايتا قوسىلدى.

ەليزابەتتىڭ ەڭ ماڭىزدى جەڭىسى - الەم چەمپيوناتىنداعى كۇمىس جۇلدەسى. 2019-جىلى سايتاماداعى جارىستا الينا زاگيتوۆادان كەيىن ەكىنشى ورىن الدى. قىسقا باعدارلامانى ءساتتى وتكىزدى. ەركىن باعدارلامادا سالحوۆ ەلەمەنتىن ورىنداعان ەرەسەكتەر اراسىنداعى العاشقى سپورتشى اتاندى جانە وسىلاي تاريحتا قالدى.

تورتتىك ەلەمەنتتى ورىنداۋ ءۇشىن سپورتشى 3 جىل دايىندالعان. برايان ورسەرمەن بىرگە دايىنداپ، تۋتبەريدزەگە كەلگەندە پىسىقتاي تۇسكەن.

ەليزابەتتىڭ جارقىن مانسابى ەرتە اياقتالدى. وكىنىشكە قاراي سپورتشى ارقاسىنداعى اۋىر جاراقاتىنا بايلانىستى سپورتتاعى جولىن جالعاستىرمايتىن بولدى.

قازاقستان ءبىراز جىل مانەرلەپ سىرعاناۋ جارىستارىنان جۇلدە المايدى-اۋ. ليزانىڭ ورنىن باساتىن سپورتشى تاربيەلەپ ۇلگەرمەدىك. قازاقستاندا قىسقى سپورتتا ءبىر ليدەر كەتسە ونىڭ ورنىن باساتىن ءىزباسارلار جوق. ليزا ەندى جاتتىقتىرۋشى رەتىندە ءوز ءىزباسارىن تاربيەلەسە دەگەن تىلەك. ليزا ايەلدەر اراسىندا حالىقارالىق جارىستاردا تورتتىك ەلەمەنت ورىنداعان العاشقى مانەرلەپ سىرعاناۋشى رەتىندە ماڭگى تاريحتا قالماق.

جاراقات بولماعاندا اقپاندا پەكين وليمپياداسىنا جۇلدەگە تالاسۋعا بارار ەدى. رەسەي مەن جاپونيا قىزدارىمەن يىق تىرەسە جارىسقا تۇسە الاتىن ساناۋلىنىڭ ءبىرى ەدى. ەندى باپكەر بولىپ وليمپ شىڭىن باعىندىرسىن... - دەپ جازدى بەلگىلى سپورت جۋرناليسى رۋسلان مەدەلبەك.

سپورتشى وتكەن جىلى ماسكەۋدەگى ۋنيۆەرسيتەتتىڭ حالىقارالىق جۋرناليستيكا فاكۋلتەتىنە تۇسكەن. «دارىن» جاستار سىيلىعىنىڭ، «حالىق سۇيىكتىسى» ماراپاتىنىڭ جانە «جىلدىڭ ۇزدىك سپورتشىسى» اتاعىن يەلەنگەن.

ەل سەنىمىن اقتاعان ەليزابەتتىڭ الداعى ءومىر جولىنا ساتتىلىك پەن تولاعاي تابىس تىلەيمىز!


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر

مۇراعات