+7 (701) 759 90 19
USD 425.95 EUR 495.12
RUB 6 CNY 66.6
جاڭالىقتار

سەناتتا ازاماتتىق قوعام مەن مەدياسالانى دامىتۋ ماسەلەلەرى تالقىلاندى

21 قىركۇيەك 19:54
:ءبولىسۋ
سەناتتا ازاماتتىق قوعام مەن مەدياسالانى دامىتۋ ماسەلەلەرى تالقىلاندى

نۇر-سۇلتان. قازاقپارات - سەنات ءتوراعاسى ماۋلەن اشىمبايەۆتىڭ قاتىسۋىمەن پالاتا جانىنداعى جاس ساراپشىلار كلۋبىنىڭ كەزەكتى وتىرىسى ءوتتى.

التىنشى رەت ۇيىمداستىرىلىپ وتىرعان وتىرىستا قاتىسۋشىلار ازاماتتىق قوعامنىڭ دامۋ ءۇردىسى مەن ەلىمىزدەگى مەديا سالاسىنىڭ بولاشاعى تۋرالى ءسوز قوزعادى، دەپ حابارلايدى جوعارعى پالاتانىڭ باسپا ءسوز قىزمەتى.

كەزدەسۋگە قازاقستاننىڭ اقپارات جانە قوعامدىق دامۋ ءمينيسترى ايدا بالايەۆا، كلۋب مۇشەلەرى جانە ارنايى شاقىرىلعان ساراپشىلار قاتىستى.

وتىرىستى اشقان ماۋلەن اشىمبايەۆ مەملەكەت باسشىسى قاسىم-جومارت توقايەۆتىڭ ازاماتتىق جانە ساياسي سالاداعى نەگىزگى باستاماسى «حالىق ۇنىنە قۇلاق اساتىن مەملەكەت» تۇجىرىمداماسى ەكەنىن اتاپ ءوتتى. سونداي-اق وسى تۇجىرىمداما اياسىندا بيلىك پەن قوعامنىڭ تۇراقتى ديالوگىن جولعا قويۋعا جانە مەملەكەتتى باسقارۋعا ازاماتتىق قوعامنىڭ قاتىسۋىن ارتتىرۋعا ارنالعان جۇيەلى رەفورمالار قولعا الىنعانىنا نازار اۋداردى.

سەنات سپيكەرى قازىرگى تاڭدا ەلىمىزدە قوعامدىق- ساياسي سالادا كەزەڭ-كەزەڭىمەن جۇرگىزىلىپ جاتقان رەفورمالار جالعاسىپ وتىرعانىن ايتتى. بۇل جۇمىستارعا ەل پرەزيدەنتىنىڭ قازاقستان حالقىنا جولداۋىندا ايتىلعان باسىمدىقتار تىڭ سەرپىن بەردى.

«مەملەكەت باسشىسىنىڭ بيىلعى جولداۋىندا ماڭىزدى مىندەتتەر بەلگىلەندى. بىرىنشىدەن، پرەزيدەنتىمىز اۋىلدىق جەرلەردە ازاماتتىق باستامالاردى قولداۋدىڭ ءتيىمدى تەتىگىن ازىرلەۋدى مىندەت ەتىپ قويدى. ەكىنشىدەن، مەملەكەت باسشىسى دەپۋتات مانداتىن ءبولۋ كەزىندە ايەلدەر مەن جاستار ءۇشىن 30 پايىزدىق كۆوتانى مىندەتتى تۇردە ەسكەرۋ تۋرالى نورمانى زاڭمەن بەكىتۋدى تاپسىردى. ۇشىنشىدەن، پرەزيدەنتىمىز، ەرەكشە قاجەتتىلىگى بار ازاماتتارعا دا كۆوتا بەلگىلەۋ كەرەكتىگىن ايتتى. مۇنداي قادامدار حالىقتىڭ ءارتۇرلى توپتارىنىڭ ازاماتتىق قۇقىقتارىن ەسكەرەتىن ينكليۋزيۆتى قوعام قۇرۋعا ىقپال ەتەرى ءسوزسىز»، - دەدى سەنات ءتوراعاسى.

كلۋب وتىرىسىندا تالقىلانعان ماڭىزدى ماسەلەلەردىڭ ءبىرى مەديا سالاسىنا قاتىستى بولدى. ماۋلەن اشىمبايەۆ پاندەميا كەزەڭىندە مەدياكوممۋنيكاتسيانىڭ ەرەكشە ءرول اتقارعانىن تىلگە تيەك ەتتى.

«پاندەميا كەزەڭىندە ناقتى مالىمەتتەر مەن تەكسەرىلگەن اقپاراتتاردىڭ تاپشىلىعى بايقالدى. سوندىقتان ادامدار اقپارات كوزدەرىنە مۇقيات ءمان بەرىپ، بەدەلدى مەديالارعا عانا باسىمدىق بەردى. بۇدان ساپالى جاڭالىقتار تاراتاتىن جۋرناليستيكا پايدا كوردى. ناتيجەسىندە، الەمنىڭ جەتەكشى اقپارات قۇرالدارىنىڭ وقىرماندارى كوبەيىپ قانا قويماي، ولاردىڭ اقىلى جازىلىمدارى دا ارتا تۇسكەن»، - دەدى پالاتا ءتوراعاسى.

سونىمەن قاتار ماۋلەن اشىمبايەۆتىڭ ايتۋىنشا، مۇنداي ءۇردىستىڭ كەرى اسەرى دە بايقالعان. بەلگىسىزدىك پەن رەسمي اقپارات كوزدەرىنە دەگەن سەنىمسىزدىك فەيك- نيۋسدەردىڭ جانە ءارتۇرلى كونسپيرولوگيالىق تەوريالاردىڭ كوبەيۋىنە اكەلىپ سوقتىرعان.

«قازىرگىدەي اقپاراتتار اعىنىندا اداسىپ قالماۋ ءۇشىن ادامعا اق پەن قارانى اجىراتاتىن ارنايى ءبىلىم كەرەك. بۇل رەتتە جاڭا زامان ادامى ءۇشىن مەدياساۋاتتىلىقتىڭ ماڭىزى زور ەكەنى ءسوزسىز. مەنىڭشە، وسى ترەندتى ەسكەرىپ، قازاقستاندا الەمگە عىلىمي كوزقاراس قالىپتاستىراتىن سالالىق جۋرناليستيكانى دامىتۋعا جانە عىلىمدى دارىپتەيتىن قوعامدىق پىكىردىڭ كوشباسشىلارىن دايىنداۋعا كوڭىل بولگەن ءجون. بۇل مەديا سالاسىنىڭ ساپاسىن ارتتىرۋعا مۇمكىندىك بەرەدى»، - دەدى ماۋلەن اشىمبايەۆ.

جاس ساراپشىلار كلۋبىنىڭ باسقوسۋىندا قاتىسۋشىلار قوعامدىق جوبا رەتىندە تالداۋ مەكتەبىن قۇرۋدى ۇسىندى. ماۋلەن اشىمبايەۆ مۇنداي مەكتەپتە تىڭداۋشىلار تالداۋ ماتىندەرى مەن زەرتتەۋ ءادىسناماسىن جازۋ سياقتى قولدانبالى تاسىلدەردى، دەرەكتەر بازاسىمەن جۇمىس ىستەۋدى، مەملەكەتتىك باسقارۋدا، حالىقارالىق قاتىناستار مەن ديپلوماتيادا قولدانىلاتىن اناليتيكالىق ادىستەردى مەڭگەرۋگە مۇمكىندىك الاتىنىن اتاپ ءوتتى.

ءدارىس وقۋ جانە ترەنينگتەر وتكىزۋ ءۇشىن بەلگىلى قازاقستاندىق ساراپشىلار مەن زەرتتەۋشىلەردى شاقىرۋ جوسپارلانىپ وتىر.

«شىن مانىندە، قازىر كوپ سالادا تالداۋ تاسىلدەرىنىڭ السىرەگەنى بايقالادى. مۇنداي ءۇردىس، اسىرەسە، مەملەكەتتىك باسقارۋدا ايتارلىقتاي ماسەلە تۋدىرىپ وتىر. سەبەبى، بۇل سالاداعى شەشىمدەر سالماقتى تالداۋلار مەن زەرتتەۋلەر نەگىزىندە قابىلدانۋى كەرەك. وكىنىشكە قاراي، قازىر كوپتەگەن شەشىمدەر قالىپتاسقان جاعدايعا بايلانىستى، تۋىنداعان قيىندىقتارعا جاۋاپ رەتىندە عانا قابىلدانادى. كلۋبتىڭ الدىڭعى وتىرىستارىنىڭ بىرىندە مەن مۇنداي جاعداي الەمدەگى گۋمانيتارلىق ءبىلىمنىڭ داعدارىسىمەن بايلانىستى ەكەنىن ايتقان ەدىم. وسى رەتتە كلۋب مۇشەلەرىنىڭ قوعامدىق تالداۋ مەكتەبىن قۇرۋ تۋرالى ۇسىنىسىن وزەكتى جانە ۋاقتىلى دەپ ەسەپتەيمىن. الداعى ۋاقىتتا ەلىمىزدەگى جەتەكشى جوعارى وقۋ ورىندارىنىڭ ءبىرىنىڭ گۋمانيتارلىق فاكۋلتەتىمەن ىنتىماقتاسا جۇمىس ىستەۋ مۇمكىندىگى قاراستىرىلۋدا. وسى رەتتە مەكتەپ جۇمىسىنا قولداۋ كورسەتۋگە دايىن ەكەنىمدى دە ايتقىم كەلەدى»، - دەدى ماۋلەن اشىمبايەۆ.

وتىرىس بارىسىندا قاتىسۋشىلار ازاماتتىق قوعامدى جانە مەدياسفەرانى دامىتۋعا قاتىستى ءوز ويلارىن ءبىلدىرىپ، پىكىرلەرىمەن ءبولىستى. ساياسات تانۋ سالاسىنداعى PhD جۇلدىزاي ىسقاقوۆا قازاقستانداعى ساياسي ينستيتۋتتارعا دەگەن قوعامدىق سەنىم ديناميكاسىنىڭ زەرتتەۋ ناتيجەلەرىن جاريالادى. ءوز كەزەگىندە قۇقىقتانۋ سالاسىنداعى PhD ءمۇسىلىم حاسەنوۆ ازاماتتاردىڭ اقپارات الۋ قۇقىقتارىنىڭ ىسكە اسىرىلۋى جانە ولاردىڭ مەملەكەت ىستەرىن باسقارۋعا قاتىسۋى تۋرالى ءسوز قوزعادى.

ساياسي شولۋشى عازيز ابىشيەۆ قازاقستانداعى بلوگوسفەرا مەن الەۋمەتتىك جەلىلەردى زاڭنامالىق رەتتەۋگە قاتىستى ويىن ءبىلدىردى. ەۋرازيالىق ينتەگراتسيا ينستيتۋتىنىڭ ساراپشىسى نيكيتا شاتالوۆ اناليتيكالىق جۋرناليستيكانى دامىتۋ جانە مەديا نارىقتى رەتتەۋدىڭ جاڭا تاسىلدەرى تۋرالى ۇسىنىستارىن جەتكىزدى.

وتىرىستى قورىتىندىلاعان ماۋلەن اشىمبايەۆ ساراپشىلار ايتقان ۇسىنىستار مەن پىكىرلەر پارلامەنت جۇمىسىندا ەسكەرىلەتىنىن ايتىپ، اقپارات جانە قوعامدىق دامۋ مينيسترلىگىنىڭ دە نازارىنا الىناتىنىنا سەنىم ءبىلدىردى.


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049

مۇراعات