سەرىك جۇمانعارين پرەزيدەنتكە ازىق-تۇلىك پەن جانارماي باعاسىنا قاتىستى ەسەپ بەردى

نۇر-سۇلتان. قازاقپارات - مەملەكەت باسشىسى باسەكەلەستىكتى قورعاۋ جانە دامىتۋ اگەنتتىگىنىڭ ءتوراعاسى سەرىك جۇمانعاريندى قابىلدادى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.

پرەزيدەنتكە اگەنتتىكتىڭ تۇرعىن ءۇي، قۇرىلىس ماتەريالدارى، الەۋمەتتىك ماڭىزى بار ازىق-تۇلىك ونىمدەرى جانە جانار-جاعارماي نارىقتارىنداعى باعالاردى تۇراقتاندىرۋ جونىندەگى جۇمىستارى تۋرالى ەسەپ بەرىلدى.

اگەنتتىك ءتوراعاسىنىڭ ايتۋىنشا، اتالعان سالالار بويىنشا مونوپولياعا قارسى قابىلدانعان شارالاردىڭ ناتيجەسىندە ءبىرقاتار ءىرى قۇرىلىس كومپانيالارى باستاپقى تۇرعىن ءۇي باعاسىن ماۋسىم-تامىز ايلارىندا ورتا ەسەپپەن 7-20 پايىزعا تومەندەتكەن، قۇرىلىس ماتەريالدارى باعاسىنىڭ ءوسۋى ءساۋىر ايىنداعى 10,9 پايىزدان، تامىز ايىندا 3,2 پايىزعا دەيىن، بەنزين باعاسى ءساۋىر ايىنداعى 8,4 پايىزدان، مامىر ايىندا 0,2 پايىزعا دەيىن ارزانداعان.

قازىر دە وسى باعالار ساقتالىپ وتىر. الەۋمەتتىك ماڭىزى بار ازىق-تۇلىك ونىمدەرى باعاسىنىڭ اپتا سايىنعى قىمباتتاۋ كورسەتكىشى ءساۋىر ايىنداعى 0,6 پايىزدان 14 - قىركۇيەكتەگى مالىمەت بويىنشا 0,1 پايىزعا دەيىن ازايعان.

مەملەكەت باسشىسىنا تاۋار بيرجالارىنداعى كوممۋنالدىق-تۇرمىستىق كومىر ساۋداسىنىڭ بارىسى تۋرالى باياندالدى. وندا جەرگىلىكتى وپەراتورلار وتىندى شاعىن پارتيالارمەن تىكەلەي ساتىپ الۋعا مۇمكىندىك الادى.

قاسىم-جومارت توقايەۆقا اگەنتتىكتىڭ دارىلىك زاتتاردىڭ باعاسىن قايتا رەتتەۋ، راديوجيىلىكتەردى اۋكسيونعا شىعارۋ ارقىلى ءموبيلدى بايلانىس نارىعىندا باسەكەلەستىك قالىپتاستىرۋعا جاعداي جاساۋ، جولاۋشىلار تاسىمالى 2 ميلليون ادامنان اساتىن اۋەجايلارداعى جەردە قىزمەت كورسەتۋ تۇرلەرىنە تاۋەلسىز تاسىمالداۋشىلاردىڭ قول جەتكىزۋىن قامتاماسىز ەتۋ، سونداي-اق فارماتسيەۆتيكا، جول قۇرىلىسى، مەديتسينا سالالارىندا جۇرگىزىپ جاتقان مونوپولياعا قارسى باقىلاۋ شارالارى تۋرالى مالىمەت بەرىلدى.

سونىمەن قاتار سەرىك جۇمانعارين مەملەكەت باسشىسىنا اگەنتتىكتىڭ كەدەرگىلەر جونىندەگى كەڭەس الاڭدارىندا باسەكەلەستىكتى دامىتۋعا قاتىستى شەكتەۋلەردى جويۋ قىزمەتى، باسەكەلەستىك ماسەلەلەرى جونىندەگى زاڭ جوباسى، باسەكەلەستىكتى دامىتۋ تۇجىرىمداماسىنىڭ ازىرلەمەسى، ەكونوميكالىق ىنتىماقتاستىق جانە دامۋ ۇيىمىنا مۇشە ەلدەردەگى باسەكەلەستىكتى دامىتۋدىڭ سوڭعى ۇردىستەرى تۋرالى ايتتى.

كەزدەسۋ سوڭىندا مەملەكەت باسشىسى الەۋمەتتىك ازىق-تۇلىك پەن تاۋارلاردىڭ باعاسىن باقىلاۋدا ۇستاۋدى تاپسىردى.