ەرلان تۇرعىمبايەۆ قازا تاپقان پوليتسەيلەردىڭ وتباسىنا كوڭىل ايتتى

الماتى. قازاقپارات - ىشكى ىستەر ءمينيسترى ەرلان تۇرعىمبايەۆ قازا تاپقانداردىڭ وتباسىنا كوڭىل ايتتى، دەپ حابارلايدى قازاقپارات ءتىلشىسى.

«ءبىز ءۇشىن بۇگىن وتە اۋىر كۇن، ورنى تولماس قايعى. ايدىڭ كۇننىڭ امانىندا الماتى قالاسىنداعى قايعىلى وقيعا ناتيجەسىندە 5 ازاماتىمىز وققا ۇشتى. ونىڭ ىشىندە ىشكى ىستەر ورگاندارىنىڭ ەكى قىزمەتكەرى بار. پوليتسيا مايورى دارحان سۇلەيەۆ پەن پوليتسيا كاپيتانى نۇربول بايعازيەۆ ءوز جۇمىستارىن ادال اتقارىپ جۇرگەن قاتارداعى قىزمەتكەرلەر ەدى. قازاقتىڭ داڭقتى باتىرى باۋىرجان مومىش ۇلىنىڭ «ادام بولۋ - قاسيەت، ازامات بولۋ - مىندەت، پاتريوت بولۋ - پارىز» دەگەن قاناتتى ءسوزى بار. ولار ادامگەرشىلىكتەرىمەن اينالاسىنا ابىرويلى بولىپ، وتانسۇيگىشتىكتەرىمەن تالايعا ۇلگى بولا ءبىلدى. ادام رەتىندە قالىپتاستى، ازامات بولىپ اتقا قوندى، پاتريوتتىق بولمىسىمەن ەل تىنىشتىعىن قورعادى. دارحان سۇلەيەۆ ىشكى ىستەر سالاسىندا 18 جىل قىزمەت اتقارسا، نۇربول بايعازيەۆ 7 جىلدان بەرى ساپتا قىزمەت ەتىپ كەلدى. ولاردى ارىپتەستەرى قىزمەتىنە ادال، دوستىققا بەرىك، جۇرەگى ۇلكەن ازامات رەتىندە ماڭگى ەستە ساقتايدى. مارقۇمداردىڭ اكە-شەشەسى، وتباسى، تۋعان-تۋىستارىنا كوڭىل ايتىپ، قايعىلارىنا ورتاقتاسقىم كەلەدى»، - دەدى ەرلان تۇرعىمبايەۆ.

ەسكە سالايىق، 20-قىركۇيەك كۇنى الماتىدا اتىس بولىپ، 5 ادام قازا تاپتى.

اۆتور: الما مۇقانوۆا