19:03, 20 - قىركۇيەك 2021 | GMT +6
جاڭا قاۋلى: پاۆلوداردا ۆاكسينا الماعان كاسىپورىن جۇمىسشىلارى جۇمىستان شەتتەتىلەدى
نۇر- سۇلتان. قازاقپارات - پاۆلودار وبلىسىنىڭ باس سانيتار دارىگەرى ونەركاسىپ كاسىپورىندارىنىڭ ۆاكسينا الماعان قىزمەتكەرلەرىن شتاتتىق جۇمىسقا جىبەرمەۋ تۋرالى قاۋلى شىعاردى، دەپ حابارلايدى قازاقپارات ءتىلشىسى.
«ونەركاسىپ كاسىپورىندارىنىڭ COVID-19-عا قارسى ۆاكسينا الماعان جۇمىسكەرلەرىن كۇندىزگى رەجيمدە جۇمىسقا جىبەرۋ شەكتەلسىن. بۇل رەتتە ۇيىمدارىڭ ەكپە الماعان قىزمەتكەرلەرىنە 7 كۇندە ءبىر رەت پ ت ر- تەستى تاپسىرۋعا مىندەتتەلسىن»، - دەپ جازىلعان قاۋلى ماتىنىندە.
وڭىرلىك باس سانيتاردىڭ مۇنداي شەشىم قابىلداۋى ق ر باس سانيتار دارىگەرىنىڭ №38 قاۋلىسىنا سايكەس كەلەدى.
«وسى قاۋلىنىڭ 1-تارماعىنىڭ 1) تارماقشاسىنا ەنگىزىلمەگەن ۇيىمداردىڭ/وبەكتىلەردىڭ COVID-19-عا قارسى ۆاكسينا الماعان جۇمىسكەرلەرىن كۇندىزگى رەجيمدە جۇمىسقا جىبەرۋدى شەكتەۋ تۋرالى شەشىمدى قالىپتاسقان ەپيدەميولوگيالىق جاعدايعا بايلانىستى وڭىرلىك جەدەل شتابتار قابىلدايدى»، - دەپ جازىلعان ول قاۋلىدا.
اۆتور: ەسىمجان ناقتىباي