تۇركى كەڭەسىنىڭ جاستارمەن جۇمىس ىستەۋىنىڭ جاڭا قۇرالدارىن ىزدەۋ كەرەك - ايدا بالايەۆا

None
None
تاشكەنت. قازاقپارات - وزبەكستان استاناسىندا تۇركى كەڭەسىنىڭ جاستار جانە سپورت ىستەرى مينيسترلەرىنىڭ 5- وتىرىسى ءوتتى، دەپ حابارلايدى قازاقپارات ق ر اقپارات جانە قوعامدىق دامۋ مينيسترلىگىنىڭ باسپا ءسوز قىزمەتىنە سىلتەمە جاساپ.

وتىرىس اياسىندا مينيسترلەر تۇركى كەڭەسىنىڭ IDEA جاس كاسىپكەرلەرىنىڭ 1- فورۋمىنىڭ اشىلۋ راسىمىنە قاتىستى. قازاقستاندىق دەلەگاتسيانى ق ر اقپارات جانە قوعامدىق دامۋ ءمينيسترى ايدا بالايەۆا باستادى. ءوز سوزىندە ايدا بالايەۆا تۇركى كەڭەسىنىڭ قاتىسۋشىلارىن جاھاندىق پاندەميا تۋدىرعان سىن- تەگەۋرىندەرگە قارسى تۇرۋ ءۇشىن جاستارمەن جۇمىستىڭ جاڭا قۇرالدارىن ىزدەۋگە شاقىردى.


«ماجارستاندى قوسا ەسەپتەگەندە كەڭەسكە مۇشە مەملەكەتتەردىڭ حالىق سانى 150 ميلليون ادامدى قۇرايدى ەكەن. سونىڭ 30 ميلليونى جاستار. بۇل - تۇركى الەمى كەلەشەگىنىڭ زور الەۋەتىنىڭ دالەلى. جاستار - ءبىزدىڭ بولاشاعىمىز دەپ ءبىز ۇنەمى ايتىپ كەلەمىز»، - دەپ اتاپ ءوتتى ول.

بۇل رەتتە، جاستار ساياساتى سالاسىنداعى ورتاق جۇمىستاردىڭ ناتيجەلى بولۋى ءۇشىن مينيستر تۇركى كەڭەسىنىڭ قاتىسۋشىلارىنا جەتى باعىتتا بىرلەسكەن ۇسىنىمدار جاسادى.

«جاستار ساياساتى سالاسىندا ىنتىماقتاستىقتى نىعايتۋدىڭ ماڭىزى زور. ءبىزدىڭ مەملەكەت باسشىلارى بۇل باعىتتا ناقتى باعداردى كورسەتىپ، بارلىق جاعدايدى جاساپ بەرىپ وتىر. ءبىزدىڭ مىندەتىمىز وسى مۇمكىندىكتى بارىنشا تولىق پايدالانۋ. قازاقستان رەسپۋبليكاسىنىڭ اقپارات جانە قوعامدىق دامۋ مينيسترلىگى تاجىريبە الماسىپ، بىلگەنىمەن بولىسۋگە، باياندى باستامالارعا قولداۋ كورسەتىپ، ورتاق جوبالارعا بەلسەندى قاتىسۋعا قاشاندا دايىن»، - دەدى ا. بالايەۆا.


وعان قوسا، وتىرىس جۇمىسى اياسىندا مينيستر ايدا بالايەۆا تۇرىك رەسپۋبليكاسىنىڭ جاستار جانە سپورت ءمينيسترى مەحمەت مۋحاررەم كاساپوعلۋمەن جانە وزبەكستان رەسپۋبليكاسىنىڭ جاستار ىستەرى اگەنتتىگىنىڭ ديرەكتورى اليشەر سادۋللايەۆپەن كەزدەسۋلەر وتكىزدى.


سونىمەن قاتار، تۇركى كەڭەسىنە قاتىسۋشى مەملەكەتتەردىڭ مينيسترلەرى تۇركىتىلدەس مەملەكەتتەردىڭ ىنتىماقتاستىق كەڭەسى شەڭبەرىندە IDEA جاس كاسىپكەرلەرىنىڭ 1- جاستار فورۋمىنىڭ اشىلۋىنا قاتىستى. قازاقستاندىق جاس بيزنەسمەندەر 6 سەسسياعا قاتىستى: اگروبيزنەس، IT- ستارتاپ، تۋريزم، جەڭىل ونەركاسىپ، تاماق ونەركاسىبى، ماركەتينگ.

ەستەرىڭىزگە سالا كەتەيىك، مينيسترلەر وتىرىسى تۇركى كەڭەسىنە قاتىسۋشى ەلدەردىڭ جاستار ساياساتى، ءبىلىم بەرۋ جانە سپورت سالاسىنداعى ىنتىماقتاستىعىن كەڭەيتۋگە بايلانىستى ءبىرقاتار ماسەلەلەردى شەشۋگە ىقپال ەتۋگە باعىتتالعان.


سوڭعى جاڭالىقتار