قىمبات دوسجان «بالاپان» تەلەارناسىنىڭ ديرەكتورى قىزمەتىنە تاعايىندالدى

نۇر- سۇلتان. قازاقپارات - تانىمال جۋرناليست، تەلەجۇرگىزۋشى «بالاپان» تەلەارناسىنىڭ ديرەكتورى قىزمەتىنە تاعايىندالدى.

بۇل تۋرالى بۇگىن ءوزىنىڭ Facebook پاراقشاسىندا «Qazaqstan» ۇلتتىق تەلەارناسىنىڭ باسپا ءسوز حاتشىسى ايدىن دۇيسەنباي قىزى جازدى، دەپ حابارلايدى قازاقپارات.

قىمبات دوسجاننىڭ قازاق تەلەۆيزياسىندا 40 جىلعا جۋىق ۋاقىت تاجىريبەسى بار. «Qazaqstan» تەلەارناسى جاڭالىقتار قىزمەتىنىڭ پروديۋسەر- جۇرگىزۋشىسى، قازاق راديوسىنىڭ جۇرگىزۋشىسى، قازاق راديوسىنىڭ باس رەداكتورى مىندەتتەرىن اتقاردى. قازىرگى ۋاقىتتا «Qazaqstan» تەلەارناسىنداعى «قىمبات جاندار» اۆتورلىق الەۋمەتتىك باعدارلاماسىنىڭ جۇرگىزۋشىسى.

«تەلەراديوكورپوراتسيا سالادا، ونىڭ ىشىندە، كورپوراتسيا قۇرامىنداعى تەلە جانە راديوارنالاردا ۇزاق ۋاقىتتان بەرى قاجىرلى ەڭبەك ەتىپ كەلە جاتقان ماماندارعا ۇنەمى باسىمدىق بەرەدى. بۇگىنگى تاعايىنداۋلار دا وسى ۇستانىم بويىنشا جۇزەگە اسىپ وتىر»، - دەدى «قازاقستان» ر ت ر ك» ا ق باسقارما ءتوراعاسى ءلاززات تانىسباي.